Neham 2 - Bislama Bible Revised 2012

Profet Neham i luk we ol enemi oli kam spolem bigfala taon ya Nineve

1Nao long vison* ya, Profet Neham i gohed, i talem se, “Ol man Nineve. Ol enemi oli kam finis blong faet agens long yufala. Olgeta ya oli strong tumas, oli gat paoa, mo bambae oli spolemgud yufala. Yufala i mas stanap rere blong blokem olgeta. Yufala i mas gad long ol rod, yufala i mas mekemrere blong faet.

2(“Bambae Hae God i leftemap ol laen* blong Isrel* i givim hae nem mo paoa long olgeta bakegen. Bambae olgeta oli stap gud olsem fastaem, taem ol enemi oli no spolem olgeta yet.)

3“Ol man Nineve. Ol soldia blong ol enemi ya blong yufala, olgeta evriwan oli putum yunifom we i red, mo oli karem ol sil we i red. Olgeta oli rere finis blong kam kilim yufala. Ol kat blong faet blong olgeta, oli saen we i saen. Ol hos blong faet blong olgeta oli stap jamjam, oli glad from we oli wantem go long faet.

4“Olbaot long ol rod blong taon, mo long ol bigfala open ples insaed long taon ya, ol kat blong faet blong yufala oli stap resis krangke olbaot i go i kam, we oli spid olsem laetning, mo oli stap saen olsem toslaet.

5Ol komanda blong yufala oli singaot ol kapten blong olgeta blong oli kam faet, mo taem oli kam, oli hareap we oli stap stambol from.

“Nao ol enemi oli resis i go long bigfala stonwol blong taon ya, oli stanemap bigfala sil blong blokemgud ol man ya blong olgeta we oli stap pusum bigfala wud ya blong brekemdaon stonwol ya, blong ol ara blong yufala i no save kasem olgeta.

6Oli openem ol doa blong reva, nao wota i go flatem haos blong woman god blong yufala.

7Oli tektekemaot ol gudgudfala samting blong woman god ya, nao oli karemaot hem, oli tekem i go, mo ol woman blong wok blong hem oli harem nogud, oli krae we oli krae, olsem sotleg*. Oli stap kilkilim jes blong olgeta, from we oli harem nogud tumas.

8Taon ya Nineve i olsem wan raonwota, we ol wota blong hem i stap ronaot. Ol man blong hem oli stap ronronwe. Taem ol haeman blong olgeta oli singaot blong blokem olgeta, oli no harem tok blong olgeta nating.

9“Nao ol enemi oli stap singsingaot se, ‘Olgeta. !Bigfala taon ya Nineve i fulap long ol gudgudfala samting! !Yumi go tekemaot ol silva, mo ol gol blong olgeta!

10Taon ya i kam nogud olgeta. I no moa gat wan samting i stap long hem. Ol man blong hem oli fraet tumas, we leg blong olgeta i seksek from. Paoa blong olgeta i lus, we fes blong olgeta i kam nogud olgeta.

11-12Bifo, bigfala taon ya i gat olgeta paoa. Hem i olsem wan hol blong laeon, we laeon i stap fidim ol pikinini blong hem long hem, mo man laeon wetem woman laeon, tufala i stap haed long hem wetem ol pikinini blong tufala. Ol man blong taon ya oli olsem laeon we i stap go kilim ol anamol, nao i karem i kam long hol blong hem, mo i terem long ol smosmol pis blong woman blong hem wetem ol pikinini blong hem oli kakae, nao hol ya i fulap gud long ol mit blong ol anamol. ?Be naoia olsem wanem long bigfala taon ya?’

13Nao long vison ya, profet i talem se, “Hae God i gat olgeta paoa, mo hem i talem se, ‘Ol man Nineve. Mi mi enemi blong yufala. Mi bambae mi bonem ol kat blong faet blong yufala. Ol soldia blong yufala, bambae olgeta evriwan oli ded long taem blong faet. Mo olgeta samting we yufala i tekemaot long ol enemi blong yufala, mi bambae mi tekemaot olgeta evriwan. Bambae i no moa gat man blong karem tok blong yufala, blong ol man oli harem tok blong yufala bakegen.’ ”