Josua 20 - Bislama Bible Revised 2012

Ol taon we man i save go haed long hem

1 Nam 35.9-34; Dut 4.41-43; 19.1-13 Nao Hae God i talem long Josua,

2blong i talemaot long olgeta man we hem i talem se, “Yufala i mas jusumaot ol taon blong haed, olsem we mi bin talem long Moses bifo, blong i talemaot long yufala.

3Nao sipos wan man i kilim narafala man i ded, be i no tingting blong mekem olsem, i akseden nomo, man ya bambae i save ronwe i go haed long wan long ol taon ya. Nao sipos man i kam blong kilim hem i ded, blong givimbak fasin ya we hem i mekem, bambae i no save kilim hem.

4“Sipos wan man i kilim man olsem, bambae hem i save go haed long wan long ol taon ya, be fastaem, hem i mas go luk ol lida blong taon ya long doa* blong bigfala stonwol blong hem blong talemaot ol bisnes ya blong hem long olgeta, blong oli save jajem hem. Nao bambae oli save letem hem i stap long taon ya wetem olgeta, mo oli save letem sam graon long hem.

5Nao sipos man we i gat raet blong kilim man ya i kam, i askem hem long ol man blong taon ya, bambae olgeta oli no mas letem man ya long hem. Olgeta oli mas blokem man ya, from we taem hem i kilim man i ded, be samting ya i no kamaot long kros, i akseden nomo.

6Nao man ya i save stap long taon ya gogo oli jajem hem, mo sipos tok blong hem i tru, hem i save stap long taon ya, gogo kasem taem we man we i hae pris* blong yufala long taem ya i ded. Ale, biaen, trabol blong man ya bambae i finis, mo hem i save gobak long ples blong hem.”

7Nao oli jusumaot tri taon we trifala i stap narasaed Jodan Reva long wes, we nem blong trifala, Kedes long Galili,* long ples blong hil long distrik ya Naftali,* mo Sekem long ples blong hil long distrik ya Efrem,* mo Hebron long ples blong hil long distrik ya Juda.*

8Mo oli jusumaot tri taon bakegen long narasaed Jeriko i go, long narasaed Jodan Reva long is, we nem blong trifala, Bejere long bigfala levelples ya antap long hil, long draeples long distrik ya Ruben,* mo Ramot long Gilead long distrik ya Gad,* mo Golan long Basan* long distrik ya Is Manase.*

9Hemia nao ol taon we olgeta oli jusumaot blong oli save go haed long hem, mo blong ol strenja tu we oli stap wetem olgeta oli save go haed long hem. Sipos wan man i kilim narafala man i ded, be i no tingting blong mekem olsem, i akseden nomo, man ya i save go haed long wan long ol taon ya. Nao sipos man we i gat raet blong kilim man ya i kam blong kilim hem blong givimbak samting ya we hem i mekem, bambae i no save kilim hem. Be ol lida blong taon ya oli mas jajem man ya fastaem long fes blong olgeta man, mo sipos hem i mekem akseden nomo, man ya we i kam blong kilim hem i ded bambae i no save kilim hem.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help