Eksodas Sotfala stori blong buk ya - Bislama Bible Revised 2012

Sotfala stori blong buk yaNem ya EKSODAS i min se “Oli aot oli go”. Mo buk ya i tokbaot wan bigfala samting long laef blong ol laen* blong Isrel,* we i bigfala moa, i winim ol narafala samting long laef blong olgeta. Hemia ol samting we Hae God i mekem blong tekem olgeta oli kamaot long Ijip, long ples ya we oli stap wok slef* long hem, blong mekem olgeta oli fri. Buk ya i gat fo haf blong hem.Long fas haf, i talemaot stori we Hae God i tekemaot olgeta long Ijip, i mekem olgeta oli fri.Long seken haf, i talemaot stori we hem i lidim olgeta i go long hil ya Sinae.Long namba tri haf, i talemaot stori we Hae God i mekem promes* wetem olgeta long hil ya Sinae. Hem i promes se hem bambae i God blong olgeta, mo olgeta bambae oli man blong hem, mo olgeta oli promes se bambae oli holem ol tok blong hem. Promes ya i min se olgeta wanwan oli mas folem ol loa we hem i givim long olgeta, long laef blong olgeta long niufala kantri ya we hem bambae i givim long olgeta. Mo hem i givim ol loa blong mekem wosip tu long olgeta, we olgeta oli mas folem.Mo las haf blong buk ya, i talemaot we Hae God i soemaot rod long olgeta blong oli wokem wan haos tapolen we bambae oli stap go long hem blong mekem wosip long hem. Mo hem i talemaot tu ol loa we ol pris bambae oli mas folem blong mekem wosip.Bigfala samting we buk ya i tokbaot, hemia ol samting we Hae God i mekem long taem ya we hem i tekemaot ol man ya blong hem we oli stap wok slef long Ijip, i mekem olgeta oli fri. Mo long taem ya, hem i mekem we olgeta oli kam plante, we tingting blong olgeta i no moa foldaon, i kam strong blong oli lukluk i go long fiuja. Man we buk ya i tokbaot hem moa, hemia Moses, man ya we Hae God nomo i jusumaot hem blong i tekem ol man blong hem oli goaot long Ijip, nao i lidim olgeta oli go. Mo haf blong buk ya we yumi evriwan i savegud moa, hemia Tenkomanmen we Hae God i givim long Moses.Ol stori we oli stap long buk yaHae God i tekem ol laen blong Isrel oli aot long Ijip, oli go fri 1.1—15.21

Olgeta ya oli kam slef long Ijip 1.1-22

Moses i bon, mo laef blong hem taem hem i yangfala 2.1—4.31

Moses wetem Eron tufala i go stanap long fes blong king 5.1—10.29

Hae God i kilim ol fasbon blong ol man Ijip, be i sevem ol man blong hem, nao oli go fri 11.1—13.22

Oli gokros long Red Si 14.1—15.21

Olgeta oli aot long Red Si, oli kam long hil ya Sinae 15.22—18.27

Promes we Hae God i mekem wetem olgeta, wetem ol loa blong hem 19.1—24.18

Haos Tapolen blong Hae God, mo ol stret fasin blong mekem wosip 25.1—40.38