Kolosi Sotfala stori blong buk ya - Bislama Bible Revised 2012

Sotfala stori blong buk yaKolosi i wan taon long provins ya Esia* we i stap anda long gavman blong Rom bifo, long kantri ya we tede nem blong hem Teki. Taon ya i stap narasaed taon ya Efesas long saed i go long is, mo LETA WE POL I RAETEM I GO LONG OL KRISTIN MAN LONG KOLOSI hem i sanem i go long ol man blong jos long ples ya. Pol i no statem jos long Kolosi, be ples ya i stap long eria klosap long Efesas we i kaptel blong provins ya, mo i wan hedkwota blong Pol long wok blong hem. Mo taem Pol i stap long Efesas, hem i stap sanem ol man blong hem oli goaot blong talemaot gud nius long ol ples long eria ya, mo Kolosi i wan long ol ples ya. Nao from samting ya, hem i luk se i wok blong hem blong lukaot long olgeta long Kolosi tu. Pol i harem nius se i gat ol tija long jos long ples ya we oli stap talem ol giaman toktok, mo oli stap talem se ol man oli mas mekem wosip long ol “haeman mo ol lida blong ol devel”, blong oli save savegud God, mo blong oli save kasem laef we i fulap gud long evri samting. Mo oli stap tijim ol man se oli mas folem ol rul long saed blong kakae, mo sam narafala samting bakegen, mo oli mas sakomsaes*.Nao Pol i raetem leta ya blong tok agens long ol rabis tingting ya, mo i talemaot long olgeta ol trutok blong Jisas Kraes*. Stamba tingting we hem i talem i olsem, se Jisas Kraes i save givim laef long yumi we i fulap gud long evri samting, mo ol narafala tijing ya i pulum man i gowe long hem. Kraes i wok blong God blong mekem wol ya, mo hem i wok blong God blong tekem ol man oli kambak long hem bakegen. Man i mas joen long Kraes blong i save kasem laef, mo i no gat narafala rod bakegen. Biaen, Pol i talemaot long olgeta ol samting we oli save kasem long laef blong olgeta from we oli bilif long Jisas, mo oli joen gud long hem.I gud yumi save we man ya Tikikas, we Pol i givim leta ya long hem blong i karem i go long ol Kristin man long Kolosi, hem i sem man ya we i go wetem Onesimas, i tekem hem i gobak long ples blong hem. Onesimas, hem i wan slef*, mo hem i sem man ya we Pol i tokbaot long leta blong hem we i sanem i go long Filimon, mo i askem long Filimon blong i fogivim hem.Ol haf blong buk yaFastok 1.1-8

Fasin blong Kraes, mo wok blong hem 1.9—2.19

Niufala laef long Kraes 2.20—4.6

Lastok 4.7-18