Namba 13 - Bislama Bible Revised 2012

Ol man oli go long Kenan blong lukluksave ples(Dutronome 1.19-33)

1-3Nao long taem ya we olgeta oli stap long draeples ya Paran, Hae God i talem long Moses se, “Yu mas jusumaot twelef lida wanwan long ol twelef laen* blong yufala, mo yu mas sanem olgeta oli go long kantri ya Kenan,* blong oli go lukluksave ples ya we mi mi promes* finis blong givim long yufala.” Nao hem i mekem olsem we Hae God i talem, i jusumaot twelef lida blong olgeta, mo i sanem olgeta oli go blong lukluksave kantri ya.

4Ol lida ya we hem i sanemaot olgeta oli go, nem blong olgeta i olsem.

Long laen blong Ruben,* i gat Samua, we papa blong hem Sakuru.

5Mo long laen blong Simeon,* i gat Safat, we papa blong hem Hori.

6Mo long laen blong Juda,* i gat Keleb, we papa blong hem Jefune.

7Mo long laen blong Isakara,* i gat Igal, we papa blong hem Josef.

8Mo long laen blong Efrem,* i gat Hosea, we papa blong hem Nun.

9Mo long laen blong Benjamin,* i gat Palti, we papa blong hem Rafu.

10Mo long laen blong Sebulun,* i gat Gadiel, we papa blong hem Sodi.

11Mo laen blong Manase,* olgeta oli kamaot biaen long Josef, mo long laen ya i gat Gadi, we papa blong hem Susi.

12Mo long laen blong Dan,* i gat Amiel, we papa blong hem Gemali.

13Mo long laen blong Asere,* i gat Seturu, we papa blong hem Mikael.

14Mo long laen blong Naftali,* i gat Nabi, we papa blong hem Vofsi.

15Mo long laen blong Gad,* i gat Gehuel, we papa blong hem Maki.

16Hemia nao ol man we hem i sanem olgeta i go blong oli lukluksave kantri ya Kenan. Mo long taem ya, hem i jenisim nem blong Hosea ya we papa blong hem Nun, i kam Josua.

17Mo taem hem i sanem olgeta i go, hem i talem long olgeta se, “Taem yufala i aot long ples ya, bambae yufala i go insaed long kantri ya Kenan wantaem nomo, nao yufala i mas wokbaot i go olwe long not, go kasem ol ples blong hil.

18Yufala i mas traem blong faenemaot se ples ya i olsem wanem, mo hamas man oli stap long hem. Mo bambae yufala i mas traem blong faenemaot se ol man ya oli strong no oli no strong,

19mo ples ya i gud no i nogud, mo ol vilej blong olgeta oli gat stonwol i goraon long olgeta no nogat.

20Bambae yufala i mas faenemaot tu se graon i gud blong planem kakae no i nogud, mo i gat plante tri i stap no nogat. Mo taem yufala i kambak, bambae yufala i mas karem sam frut blong ples ya i kam.” Hem i talem olsem, from we long taem ya, ol grep* oli stat raep.

21Nao ol lida ya oli aot, oli wokbaot i go long not blong lukluksave ol samting long kantri ya. Oli stat long draeples ya long Jin, we long saed blong hem long saot, mo oli wokbaot go kasem ples ya Rehob, klosap long ples ya Hamat we i stap long not olgeta, we rod i pastru long ol hil.

22Fastaem oli go lukluk haf blong kantri ya saed i kam, long saot, nao oli go long taon ya Hebron, we i ples blong ol laen blong Ahiman, mo ol laen blong Sesae, mo ol laen blong Talmae. Ol man Hebron ya oli laen blong Anak,* we i wan lariken man bifo. Taon ya Hebron i olfala we i olfala. Ples ya Joan long Ijip i wan olfala ples, be Hebron i olfala moa long hem seven yia.

23Nao ol lida ya oli kam long wan bigfala levelples long medel blong ol hil, mo long ples ya, oli katem wan han blong grep, we i gat wan bigfala bandel grep i stap long hem. Bandel grep ya i hevi tumas, nao tufala man i karem long wan wud. Mo oli tekem sam grenadin* wetem sam fig* tu, oli karem i kam.

24Nao bigfala levelples ya, biaen oli putum nem blong hem se Eskol, we i min se “Bandel”, from bigfala bandel grep ya we olgeta ya oli katemaot long ples ya.

25Long taem ya, olgeta oli stap foti dei long kantri ya, mo oli stap wokbaot olbaot blong savegud ol ples, nao oli kambak bakegen

26long ples ya Kades, long draeples ya Paran. Hemia ples ya we Moses wetem Hae Pris Eron mo olgeta man oli stap long hem. Nao olgeta oli talemaot olgeta samting we oli luk, mo oli soemaot ol frut ya tu we oli tekem longwe, oli karem i kam.

27Mo oli talem long Moses se, “Mifala i faenemaot we kantri ya, kakae blong hem i gud tumas. !Yu luk! Hemia samfala frut we mifala i tekem longwe, mifala i karem i kam.

28Be ol man we oli stap long hem oli strong tumas, mo ol taon blong olgeta oli bigbigwan, mo oli gat ol bigbigfala stonwol i goraon gud long olgeta. Mo antap long samting ya, mifala i luk ol man we oli laen blong ol lariken man ya bifo oli stap.

29Mo mifala i luk we ol laen blong Amalek oli stap long hem saed i kam, long saot, mo ol laen blong Het, wetem ol laen blong Jebus mo ol laen blong Amoro* oli stap long ples blong hil, mo ol laen blong Kenan oli stap long saed blong Mediterenian Si mo long saed blong Jodan Reva.”

30Nao ol man ya we oli stap hivap raon long Moses oli fraet, mo oli stap toktok tumas, be Keleb i tok blong kwaetem olgeta, i talem se, “I moa gud yumi go kilim olgeta ya naoia, yumi holem ples ya. !Yumi strong ya! !Yumi naf blong winim olgeta!”

31Be olgeta we oli bin go wetem hem oli talem se, “!Nogat! !Yumi no strong ya! !Yumi no naf blong go kilim olgeta ya! !Ol man ya oli strong moa winim yumi!”

32-33Jen 6.4Nao oli girap, oli giaman, oli talem se, “!Kantri ya, graon blong hem i nogud ya! !Bambae i flatem yumi evriwan ya! Kakae blong hem i no naf blong fidim olgeta ya we oli stap long hem. Mo ol man ya we mifala i luk olgeta longwe, olgeta evriwan oli longlongfala, mo mifala i luk ol lariken man ya tu longwe, we oli laen blong Anak. Taem we mifala i luk olgeta, mifala ya i smol tumas, mifala i olsem anis nomo, mo olgeta tu oli stap luk mifala olsem.” Mo toktok ya i goraon, i kasem olgeta man.