Josua 11 - Bislama Bible Revised 2012

Josua i go mekem faet long King Jabin wetem ol fren blong hem, i winim olgeta

1Nao taem King* Jabin blong taon ya Hajoro i harem nius we Josua olgeta oli stap holem plante ples, hem i sanem tok i go long ol king blong ol taon olbaot long not. Ol king ya, i gat King Jobab blong Madon, mo king blong Simron, mo king blong Aksaf,

2mo ol king blong ol ples blong hil long saed long not, mo ol king blong ol ples daon long Jodan Reva, klosap long Lugun* ya long Galili,* saed i kam, mo ol king blong ol ples olbaot long ol smosmol hil long saed long wes, mo ol king blong ol ples daon long solwota klosap long taon ya Doro.

3Mo hem i sanem tok i go tu long ol narafala man long kantri ya, we oli laen* blong ol olfala ya bifo. Olgeta ya, i gat ol laen blong Kenan* we oli stap olbaot long Jodan Reva, mo ol laen blong Amoro,* mo ol laen blong Het, mo ol laen blong Perij, mo ol laen blong Jebus we oli stap long ples blong hil, mo ol laen blong Hivi* we oli stap long distrik ya Mispa long botom blong bigfala hil ya Hemon.

4Olgeta ya evriwan oli kam wanples wetem ol soldia blong olgeta. Olgeta oli plante we plante, olsem sanbij long solwota, mo oli gat plante hos blong olgeta wetem plante kat blong faet we hos i pulum.

5Ol king ya oli joen wanples, nao oli kam putumap ol haos tapolen blong olgeta klosap long wan smol reva nem blong hem Merom, mo oli stap rere long ples ya blong go mekem faet long Josua olgeta.

6Nao Hae God i talem long Josua se, “Josua. Yu no mas fraet long ol man ya. Tumora long semtaem olsemia, bambae i no moa gat wan long olgeta i stap, bambae olgeta evriwan oli ded. Mi bambae mi kilim olgeta evriwan blong givhan long yufala. Taem yufala i faet long olgeta, be bambae yufala i mas katem string blong leg blong ol hos blong olgeta, mo yufala i mas bonem olgeta kat blong faet blong olgeta tu.”

7Ol king ya oli stap yet klosap long reva ya, nao oli sek nomo we Josua olgeta oli kamtru, oli stat mekem faet long olgeta.

8Nao Hae God i mekem we Josua olgeta oli winim olgeta ya. Taem oli go mekem faet long olgeta, oli ronem olgeta gogo oli go klosap long ples ya Misrefotmaem long wes, mo long ol ples raonabaot long Saedon long not, mo long bigfala levelples ya Mispa long medel blong ol hil, long is. Oli faet gogo kasem we i no moa gat wan long ol enemi blong olgeta nating we i laef.

9Mo oli mekem olsem we Hae God i talem, oli katem string blong leg blong ol hos blong olgeta, mo oli bonem ol kat blong faet blong olgeta.

10Nao Josua olgeta oli tanemraon bakegen, oli kam kilim ol man Hajoro, wetem king blong olgeta. Long taem ya, king blong Hajoro, hem i strong moa, i winim ol king blong ol narafala taon ya, mo hem i lida blong olgeta.

11Be olgeta oli kilim ol man ya, gogo i no moa gat wan i laef, mo oli bonem taon blong olgeta tu.

12Long taem ya, Josua olgeta oli winim olgeta man ya, mo oli go insaed long ol taon blong olgeta, oli kilim olgeta man ya wetem ol king blong olgeta oli ded. Oli no livim wan man i stap, olsem we Moses, man blong wok blong Hae God i talem.

13Be oli no bonem ol taon we olgeta ya oli wokem antap long hil, Hajoro nomo oli bonem.

14Oli tekemaot ol gudgudfala samting long ol taon ya, wetem ol anamol, oli holem i blong olgeta. Be oli kilim olgeta man evriwan oli ded, we i no gat wan i stap.

15Bifo finis, Hae God i bin givim tok blong hem long Moses, man blong wok blong hem, se bambae oli mas mekem olsem. Mo Moses i talemaot tok ya long Josua, nao Josua i obei gud long hem. Olgeta samting we Hae God i talem long Moses bifo, be Josua i mekem evriwan.

Ol graon we Josua i holem

16-18Long taem ya, Josua i holem olgeta graon long kantri ya Kenan.* Graon ya i stat long bigfala hil ya Halak long saot, klosap long kantri ya Edom, i finisim olgeta draeples long saot, mo olgeta ples raonabaot long taon ya Gosen, mo ol ples blong hil go kasem ol smosmol hil long is mo long wes, wetem ol ples long Jodan Reva, gogo kasem ples ya Balgad long not, long levelples ya long medel blong ol hil long Lebanon, klosap long bigfala hil ya Hemon saed i kam. Josua i stap mekem faet longtaem long ol king* blong ol ples ya, gogo i winim olgeta, mo i kilim olgeta evriwan i ded.

19Olgeta ya nomo we oli laen* blong Hivi,* we oli stap long Gibeon oli mekem pis wetem Josua olgeta, be ol narafala man, Josua olgeta oli mekem faet long olgeta, oli winim olgeta.

20

22Nao long taem ya, i no moa gat ol larikenman ya i stap long graon ya. Be i gat wanwan i stap olbaot long Gasa mo long Gat mo long Asdod.

23Long taem ya, Josua i holem olgeta graon long kantri ya, stret olsem we Hae God i talem long Moses bifo. Mo biaen, hem i seraot ol graon ya long ol distrik, i givim wanwan i go long ol twelef laen blong Isrel.

Nao biaen, oli no moa go mekem faet bakegen, oli gat pis.