Jeremaea 21 - Bislama Bible Revised 2012

Hae God i talemaot we ol enemi bambae oli winim ol man Jerusalem

1Long taem ya we King Jedekia i king blong Juda,* hem i sanem Pasuru, we papa blong hem Malkia, mo Sefanaea we i pris,* we papa blong hem Mahasea, blong tufala i go talemaot tingting blong hem long Profet Jeremaea.

2

5Mi mi kros finis long yufala, mo bambae mi faet agens long yufala long fulpaoa blong mi, from we mi kros tumas long yufala.

6Bambae mi kilim yufala evriwan long taon ya i ded. Yufala wetem ol anamol blong yufala, bambae yufala evriwan i ded long wan rabis sik.

7Be yu wetem ol haeman blong yu, mo ol narafala man we oli no ded long faet ya, no long hanggri, no long sik ya, bambae mi mi letem yufala i go long han blong king ya wetem ol soldia blong hem, we oli wantem kilim yufala, mo hem bambae i kilim yufala evriwan i ded. Hem i no save letem wan long yufala i stap laef. Hem i no save gat sore long yufala. Mi mi Hae God, mo hemia tok blong mi.”

8Nao Hae God i toktok long profet, blong i go talemaot long ol man we hem i talem se, “Olgeta. Mi mi Hae God, mo yufala evriwan i mas lesin. Naoia i gat tu rod i stap, we wan i rod blong laef, mo narawan i rod blong ded. Be yufala nomo i mas jusumaot rod we yufala i wantem.

9Sipos man i wantem laef, ale hem i mas letem hem i go long han blong ol man Babilonia ya we oli stap hivap raon long taon ya, nao bambae hem i no save ded, bambae i stap laef. Be sipos man i wantem ded, ale, hem i no go, i stap nomo long taon ya, nao bambae hem i ded long han blong ol enemi ya, no long hanggri, no long sik.

10Mi mi talem finis, se bambae mi no save sevem taon ya, bambae mi spolem. Bambae mi letem i go long han blong king ya, blong i putum faea long hem, i bonem i bon evriwan. Mi mi Hae God, mo hemia tok blong mi.”

Panis we king blong Juda wetem ol pikinini blong hem bambae oli kasem

11-12Nao Hae God i talem long Profet Jeremaea, blong i go talemaot tok blong hem long king blong Juda* wetem ol pikinini blong hem, we olgeta oli laen blong King Deved bifo. Nao hem i go talemaot long olgeta we Hae God i talem se, “Olgeta. Mi mi Hae God, mo yufala i mas lesin gud long tok blong mi. Evri dei, taem yufala i mekem kot, yufala i mas jajem man long stret fasin. Sipos wan man nogud i stap spolem narafala man blong stil long hem, be yufala i mas tekemaot hem long han blong man nogud ya. Sipos yufala i no mekem olsem, ol rabis fasin ya blong yufala bambae i mekem mi mi kros tumas, we kros blong mi bambae i bon olsem faea, we man i no naf blong kilim.

13Taon ya Jerusalem* i stap antap long wan hil we i hae moa long ol ples raonabaot long hem. Hem i wan strong sefples, we i stap long medel blong bigfala levelples. Mo yufala i stap tok flas, se bambae i no gat man we i naf blong kam mekem faet long yufala, mo blong kam insaed long ples blong yufala. Be mi nao, bambae mi kam faet agens long yufala.

14Bambae mi mi panisim yufala from ol samting nogud ya we yufala i stap mekem. Bambae mi bonem haos ya blong yufala, wetem evri samting we i stap klosap long hem. Mi mi Hae God, mo hemia tok blong mi.”