Sing Blong Solomon 4 - Bislama Bible Revised 2012

1Nao man ya i talem se,

“Daling,

yu yu naes we yu naes.

Nating we kaliko i blokem fes blong yu,

be mi save makem long ae blong yu

se yu yu laekem mi tumas.

Hea blong yu i stap muvmuv olbaot,

olsem ol nani ya we oli stap jamjam,

oli stap kamdaon long hil long Gilead.

2Ol tut blong yu oli waet gud

olsem sipsip we man i jes katemaot hea blong hem,

nao i wasem bodi blong hem i waet gud.

I no gat wan long ol tut blong yu i foldaon,

olgeta evriwan oli sem mak nomo,

mo oli stret gud.

3Maot blong yu i olsem riben we i red,

mo taem yu toktok,

i naes we i naes.

Nating we kaliko i blokem fes blong yu,

be kala blong hem i stap saenaot i kasem mi.

4Nek blong yu i naes tumas,

i raon mo i smut

olsem wajhaos* blong papa blong mi,

mo ol bidbid long nek blong yu

oli olsem wan taosen sil*

blong ol strong man blong faet

we oli hangem raon long wajhaos ya blong flasem.

5Tufala titi blong yu i naes tumas,

tufala i naes olsem tu anamol ya gasel.*

Tufala i olsem tu anamol ya dia*

we tufala i twin,

we tufala i stap kakae gras

long ples blong waelflaoa.

6Bambae mi go stap long hil ya

we i gat fulap senta ya mir long hem,

mo long hil ya

we i olsem hip blong senta ya frangkinsens,*

gogo kasem we kol win blong moning i blu i kam,

mo tudak i lus, delaet i kamtru.

7Daling,

yu yu naes tumas.

Bodi blong yu i nambawan,

i no gat wan mak nating i spolem hem.

8“Yu yu woman blong mi,

yu kam wetem mi.

Bambae yumitufala i aot long ol hil ya long Lebanon.

Bambae yumitufala i aot long kantri ya,

yumitu go.

Bae yumitu aot long top blong hil ya Amana

yumitu godaon.

Bae yumitu aot long hil ya Seniri

we narafala nem blong hem Hemon,

we i ples blong laeon mo leped.*

9Daling,

yu yu woman blong mi.

Long fasin ya we yu lukluk i kam long mi,

mo long jen ya we yu hangem long nek blong yu,

wantaem nomo,

yu brekemgud hat blong mi.

10Yu yu woman blong mi.

Ol fasin ya we yu stap mekem long mi

we yumitu i stap wanples,

oli stap mekem mi mi glad oltaem nomo.

Ol fasin ya blong yu i gud moa,

i winim waen,

mo senta we yu yu putum,

smel blong hem i gud moa,

i winim olgeta lif we oli gat gudfala smel.

11Daling,

maot blong yu i swit olsem hani,*

mo tang blong yu i swit olsem melek wetem hani.

Smel blong klos blong yu i gud tumas,

i olsem smel blong senta ya

we i kam long Lebanon.

12“Daling,

yu yu woman blong mi.

Yu yu olsem wan gudfala ples blong spel

we i blong mi, mi wan.

Yu yu olsem wan smol ples blong spel blong mi,

we stonwol i goraon long hem.

Yu yu olsem wan springwota

we mi wan nomo mi save dring long hem.

13Long ples ya,

ol tri oli stap gru gud tumas.

Oli stap gru olsem plantesen blong grenadin*

we i stap karem ol nambawan frut.

Long ples ya,

i gat ol gudgudfala samting oli stap gru long hem.

14I gat hena* mo nad*

mo safron* mo kalamas* mo sinamon.*

Mo i gat olkaen insens i stap long hem.

Mir* mo alos* tu

i gru long ples ya,

wetem ol narafala samting blong wokem senta

we smel blong olgeta i gud tumas.

15Oltaem, ol springwota oli stap wasem ples ya,

mo ol wota oli stap ron i kam long hem,

wetem ol smosmol wota

we oli kamaot long ol hil

long kantri ya Lebanon.”

16Nao woman ya i talem se,

“Not win, yu girap.

Saot win, yu blu i kam long mi.

Yutufala i mekem

we ples ya i fulap long gudfala smel.

Yutufala i mekem

we daling blong mi i kam

long gudfala ples ya blong spel blong hem,

blong i kakae ol nambawan frut blong ples ya.”