1Nao Josua olgeta oli stap holem plante ples, mo nius blong olgeta i kasem olgeta king* blong ol ples long saed blong Jodan Reva long wes. Ol king ya, i gat ol king blong ol laen* blong Het, wetem ol king blong ol laen blong Amoro,* mo ol king blong ol laen blong Kenan,* mo ol king blong ol laen blong Perij, mo ol king blong ol laen blong Hivi,* mo ol king blong ol laen blong Jebus. Olgeta ya oli stap olbaot long ples blong hil, mo long ol smosmol hil daon saed i go long wes, mo long ol levelples klosap long solwota go kasem kantri ya Lebanon long not. Olgeta ya evriwan oli kasem nius ya blong Josua olgeta.
2Nao ol king ya oli kam wanples wetem ol soldia blong olgeta, oli joen blong kam mekem faet long Josua wetem ol man blong hem.
3Be long wan taon, nem blong hem Gibeon, ol man blong hem oli laen blong Hivi. Mo taem olgeta ya oli harem nius blong ol samting ya we Josua i mekem long ol man Jeriko mo ol man Eae,
4-5oli mekem plan blong kam giaman long hem. Oli tekem ol bag we oli brobrok, nao oli tekem ol bred* we oli drae nogud finis, oli fulumap long ol bag ya, se i kakae blong olgeta blong rod. Mo oli tekem sam botel we oli wokem long skin* blong nani we oli brobrok tu, be oli somap bakegen, nao oli fulumap waen blong olgeta long hem. Nao oli putum ol samting ya long ol dongki blong olgeta. Mo oli werem ol klos we i brobrok, mo oli putum ol sandel tu we i brobrok finis.
6Nao oli kam long Gilgal, long ples we Josua olgeta oli stap long hem. Nao oli talem long olgeta se, “Mifala ya, mifala i aot long wan kantri longwe. Mifala i wantem blong yufala i mekem promes wetem mifala, se bambae yumi kam fren.”
7 Eks 23.32; 34.12; Dut 7.2 Be oli talem long olgeta se, “I no stret blong mifala i mekem promes wetem yufala. Maet yufala i stap klosap nomo.”
8Be olgeta oli talem long Josua se, “Masta, mifala i stap long han blong yu nomo.”
Nao hem i askem long olgeta se, “?Be yufala i man wea? ?Yufala i kam wea?”
9Nao oli talem long hem se, “Masta, mifala ya i kam long wan kantri we i longwe tumas. Mifala i harem nius blong ol samting we Hae God ya we i God blong yufala i stap mekem. Mifala i harem nius blong ol samting we hem i mekem long ol man Ijip,
10Nam 21.21-35mo long tufala king ya long narasaed Jodan Reva long is, tufala king ya blong ol laen blong Amoro, King Sihon blong Hesbon, mo King Og blong Basan, we hedkwota blong hem i stap long taon ya Astarot.
11Ol lida blong mifala mo ol narafala man tu long ples blong mifala oli talem long mifala, se mifala i mas mekemrere sam kakae blong rod, nao mifala i mas kam blong luk yufala. Oli talem long mifala, se mifala i mas talem long yu, se mifala i stap long han blong yu nomo, mo mifala i mas askem long yu, blong yu yu mekem promes wetem mifala, se bambae yumi kam fren.
12Hemia ol bred ya we mifala i karem blong kakae long rod. Taem mifala i aot long ples blong mifala, ol bred ya i jes tan nomo. Be naoia yu luk, oli drae nogud finis.
13Mo ol botel ya blong mifala, taem mifala i fulumap, oli niuwan nomo. Be yu luk. Naoia oli brobrok finis. Ol klos mo ol sandel blong mifala oli brobrok from we mifala i wokbaot longwe tumas.”
14Nao Josua olgeta oli joen wetem olgeta ya, oli kakae ol kakae blong olgeta, be oli no askem long Hae God fastaem, blong faenemaot wanem we i stret blong mekem.
15Mo Josua i mekem promes wetem olgeta, se bambae hem i no save kilim olgeta, olgeta bambae oli kam fren. Mo ol lida blong hem oli mekem promes tu, se bambae oli holem promes ya we hem i mekem wetem olgeta.
16Olgeta oli mekem promes finis, nao biaen long tri dei, Josua olgeta oli jes harem se ples blong ol man ya i stap klosap nomo.
17Nao oli seftem ples blong olgeta i go, mo long namba tri dei blong hem, oli kamtru long ol fo taon blong olgeta, we nem blong olgeta, Gibeon, mo Kefira, mo Beherot mo Kiriatsearim.
18Be from we Josua olgeta oli man blong Hae God, nao oli no save kilim olgeta, from we oli mekem promes finis wetem olgeta long nem blong hem. Nao ol man oli stap tok kros long Josua wetem ol narafala lida blong olgeta from bisnes ya.
19Be olgeta oli talem se, “Hae God i God blong yumi, mo yumi mekem wan strong promes finis wetem olgeta long nem blong hem. Naoia yumi no save kilim olgeta.
20Yumi mas letem olgeta i stap, from we yumi mekem promes finis olsem. Sipos yumi kilim olgeta, God bambae i panisim yumi from.
21Yumi mas letem olgeta oli stap, be wok blong olgeta, bambae oli mas katem faeawud blong yumi, mo oli mas karem wota blong yumi.” Hemia nao tok we ol lida blong olgeta oli putum.
22Nao Josua i talem long ol man blong hem blong oli go tekem ol man Gibeon ya oli kam luk hem. Nao hem i talem long olgeta se, “?Weswe yufala i giaman long mifala? !Yufala i talem se ples blong yufala i longwe! !Yufala i giaman nomo! !Ples blong yufala i no longwe nating!
23From we yufala i giaman olsem, God i jajem yufala finis. Yufala evriwan long ples ya, yufala i mas kam slef* blong mifala, mo wok blong yufala, bambae yufala i man blong katem faeawud mo blong karem wota blong Haos Tapolen blong God blong mifala.”
24Nao olgeta oli talem long hem se, “Masta, mifala i mekem olsem from we mifala i harem we Hae God we i God blong yufala i talem long Moses man blong wok blong hem bifo, se bambae i givim kantri ya long yufala, mo taem yufala i stap kam insaed long kantri ya, bambae yufala i mas kilim mifala evriwan i ded. Mo mifala i luksave se tok ya i tru tumas, mo from samting ya, mifala i fraet tumas long yufala. Mifala i no wantem lusum laef blong mifala, nao mifala i mekem samting ya.
25Naoia mifala i stap long han blong yu nomo. Yufala i save mekem long mifala olsem we yu yu ting se i stret.”
26Nao Josua i blokem ol man blong hem, blong oli no kilim olgeta.
27Be long semtaem tu, hem i mekem olgeta oli kam slef blong olgeta, we wok blong olgeta i blong katem faeawud mo karem wota blong olgeta, mo blong Olta blong Hae God tu. Mo oli stap mekem wok ya yet, kam kasem tede, long weples we Hae God i jusumaot blong man i mekem wosip long hem.
Who We AreWhat We EelieveWhat We Do
2025 by iamachristian.org,Inc All rights reserved.
