Sam 9 - Bislama Bible Revised 2012

Prea blong talem tangkiu long God from stret fasin blong hem blong jajem man(Sing ya, Deved i wokem.)(Tok i go long Hae God.)

1Hae God.

Mi bambae mi presem yu

long olgeta tingting blong mi,

mi bambae mi talemaot

olgeta gudgudfala wok blong yu.

2God, yu yu hae we yu hae,

yu mekem mi mi glad tumas.

Oltaem bambae mi sing blong presem yu,

bambae mi stap sing

blong leftemap hae nem blong yu.

3Taem ol enemi blong mi oli luk yu,

oli tanemraon,

oli folfoldaon, oli ded.

4Taem yu yu jajem man,

fasin blong yu i stret olgeta.

Mo taem yu jajem mi,

yu talem se mi mi mekem i stret nomo.

5Yu yu jajem ol hiten man finis,

se oli mas panis,

mo ol man nogud,

yu yu spolem olgeta finis.

Nem blong olgeta i lus olgeta,

bambae man i no moa save tingbaot olgeta bakegen.

6Ol enemi blong mifala oli finis

we i finis olgeta.

Yu bin spolem ol taon blong olgeta,

mo ol man oli fogetemgud olgeta.

(Tok i go long ol man.)

7Hae God bambae i King oltaem nomo,

gogo i no save finis.

Hem i putumrere jea blong hem finis

blong jajem olgeta man.

8Hem i stap rulum wol ya

long fasin we i stret.

Hem i stap jajem olgeta man

long stret fasin nomo.

(Tok i go long Hae God.)

9Hae God.

Yu yu sefples blong olgeta ya

we ol man oli stap spolem olgeta.

Yu yu ples blong haed blong olgeta

long taem blong trabol.

10Olgeta we oli save yu,

bambae oli trastem yu.

Olgeta we oli kam long yu,

yu no save lego wan long olgeta.

(Tok i go long ol man.)

11Hae God i stap long Saeon,*

i stap rulum ol man.

Yumi sing, yumi presem hem.

Yumi talemaot ol gudgudfala wok blong hem

long olgeta man long evri ples.

12Olgeta we oli harem nogud,

hem i stap tingbaot olgeta,

mo hem i no save fogetem krae blong olgeta.

Mo hem i stap panisim ol man

we oli stap mekem i nogud long olgeta.

(Tok i go long Hae God.)

13Hae God, plis yu sore long mi.

Yu luk,

ol enemi blong mi oli mekem mi

mi harem nogud tumas.

Plis yu sevem mi blong mi mi no ded.

14Nao bambae mi save stanap

long fes blong olgeta man long Jerusalem,*

mi save talemaot long olgeta,

olgeta samting we mi mi stap presem yu from.

Bambae mi mi glad

from we yu yu sevem mi.

(Tok i go long ol man.)

15Ol hiten man oli digim wan hol long rod,

be oli foldaon long hem bakegen.

Trap we olgeta nomo oli putum

i kasem olgeta bakegen.

16Hae God i mekem ol man oli save hem

long fasin ya we hem i stap jajem ol man long stret fasin.

Be ol man nogud,

rabis fasin blong olgeta

i stap spolem olgeta bakegen.

17Ol man nogud bambae oli ded,

oli go long Hom* blong ol Dedman.

Ol man blong olgeta ples

we oli tanem baksaed long God,

bambae oli lus olgeta.

18Ol man we oli no gat man blong givhan long olgeta,

bambae oli no save trabol oltaem,

hem bambae i givhan long olgeta.

Ol puaman,

tingting blong olgeta

bambae i no save foldaon olgeta,

hem bambae i leftemap olgeta.

(Tok i go long Hae God.)

19!Hae God, plis yu kam!

!Yu no letem ol man oli winim yu!

Yu tekem ol hiten man

oli kam stanap long fes blong yu,

yu jajem olgeta.

20Plis yu mekem olgeta oli fraet.

Yu mekem olgeta oli save

we oli man nomo, oli no gat paoa.