Jeremaea 13 - Bislama Bible Revised 2012

Wan kalsong we Jeremaea i pem

1Nao Profet Jeremaea i talem se, “Mi luk wan vison,* we Hae God i talem long mi se, ‘Yu go pem wan kalsong, yu werem, be bambae yu no mas draonem long wota.’

2Ale, mi go pem, mo mi werem.

3Nao hem i talem long mi se,

4‘Yu go long Yufretes Reva, mo yu haedem kalsong ya long wan hol long ston klosap long reva ya.’

5Nao mi girap, mi go long Yufretes Reva, mi haedem kalsong ya long ples ya, olsem we hem i talem.

6“Nao biaen longtaem lelebet, hem i talem long mi se, ‘Yu gobak bakegen long Yufretes Reva, yu tekem kalsong ya we yu haedem.’

7Ale, mi gobak long ples ya bakegen we mi bin haedem kalsong ya long hem, nao mi lukaot gogo mi faenem, be mi luk we i roten finis, mi no moa save werem.

8“Nao hem i toktok long mi bakegen, i talem se,

9‘Ol fasin blong flas blong ol man Jerusalem* mo ol narafala man Juda,* bambae mi mi spolemgud, olsem we kalsong ya i kam nogud.

10Ol man nogud ya, oltaem nomo oli stap mekem stronghed blong olgeta, mo oli no wantem nating blong obei long mi. Oli stap mekem wosip long ol narafala god, mo oli stap mekem ol wok blong ol god ya tu. Nao from samting ya, bambae oli kam olsem kalsong ya stret, we man i no moa save werem bakegen.

11Mi mi wantem tumas blong ol man Isrel* bifo, mo ol man Juda naoia, oli holemtaet mi olsem we kalsong i fas strong long bodi blong man. Mi mi wantem olsem, blong oli kam man blong mi, mo blong oli stap presem nem blong mi, oli stap ona long mi oltaem. Be oli girap, oli no obei long mi nating.’ ”

Ol botel blong waen

12Nao Profet Jeremaea i talem se, “Hae God i God blong yumi, mo hem i toktok long mi bakegen i talem se, ‘Jeremaea. Yu go talemaot long ol man, se ol botel blong waen oli mas fulap long waen. Nao bambae oli talem long yu, se olgeta i save finis we ol botel ya oli mas fulap long waen.

13Nao bambae yu talem long olgeta we mi bambae mi mekem we olgeta man blong ples ya bambae oli dring waen gogo oli fuldrong. Ol king we oli laen blong King Deved, mo ol pris,* mo ol profet, mo olgeta man long Jerusalem* bambae oli fuldrong evriwan.

14Nao biaen, bambae mi mi smasem olgeta olsem we man i holem ol botel, i bangem olgeta wanples, nao oli smas. Ol olfala mo ol yangfala, bambae mi smasem olgeta evriwan long sem fasin ya nomo. Taem mi kam blong kilim olgeta, bambae mi no save sore long olgeta, mo bambae mi no save harem nogud wetem olgeta, mo bambae mi no save givhan long olgeta. Mi mi Hae God, mo hemia tok blong mi.’ ”

Profet Jeremaea i tok strong long olgeta from we oli praod tumas

15Nao Profet Jeremaea i talem se,

“Olgeta.

Hae God i God blong yumi,

mo hem i toktok long yumi finis.

Yufala i mas mekem

tingting blong yufala i stap daon,

mo yufala i mas lesin long tok blong hem.

16Taem i delaet yet,

yufala i mas kwik blong ona long hem.

Sipos no,

bambae hem i mekem

bigfala tudak i kam kavremap yumi,

nao taem yumi wokbaot long hil,

bambae yumi stambol,

yumi foldaon.

Mo delaet ya we yumi stap tingbaot

se bambae i kamtru,

hem bambae i mekem i kam tudak

we i tudak olgeta.

17Sipos yufala i no harem tok ya,

bambae mi go long ples

we man i no save luk mi,

mi stap krae from yufala,

from we yufala i praod tumas.

Bambae mi krae we mi krae,

we wota blong ae blong mi i ron bigwan,

from we ol enemi blong yumi

bambae oli kam karemaot yumi.”

18Nao Hae God i talem long profet se, “Yu talemaot long king wetem mama blong hem, blong tufala i mas go sidaon daon long graon, from we tufala i gat gudfala hat blong tufala, be tufala i lusum finis.

19Olgeta taon blong Juda* long saot, naoia ol enemi oli raonem olgeta finis blong faet agens long olgeta, mo i no gat man i save go insaed long ol taon ya blong givhan long olgeta. Naoia, ol man Juda, ol enemi oli tekemaot olgeta evriwan finis, blong oli go wok slef.*

20“!Ol man Jerusalem*! !Yufala i luk! !Naoia ol enemi blong yufala oli aot finis long not, oli kam! ?Wehem ol man ya we yufala i glad tumas long olgeta, we wok blong yufala i blong lukaot gud long olgeta? ?Naoia oli stap wea?

21Ol man blong ol narafala kantri ya we yufala i stap talem se oli fren blong yufala, sipos oli kam winim yufala, nao oli rulum yufala, be bambae yufala i talem olsem wanem? Bigfala trabol ya bambae i kam kasem yufala, stret olsem we woman i stap harem nogud blong bonem pikinini blong hem.

22Bambae yufala i stap askem se, ‘?From wanem ol samting ya oli kam kasem yumi olsem? ?From wanem ol enemi oli teremaot ol klos blong yumi, oli fosem yumi blong slip wetem olgeta?’ Ol samting ya bambae i kam kasem yufala, from we yufala i stap mekem ol sin we i nogud we i nogud.

23?Weswe? ?Yufala i ting se wan blakman i save jenisim skin blong hem, i kam waet olsem waetman? ?Weswe? ?Yufala i ting se anamol ya leped* i save jenisim ol kala blong hea blong hem? Olgeta ya oli no save jenis, mo yufala we oltaem yufala i stap mekem ol rabis fasin, yufala tu i no save jenisim fasin blong yufala blong mekem ol samting we i stret.

24Mi bambae mi sakemaot yufala i go wanwan olbaot, olsem we strong win i blu i kam long draeples, i sakem ol doti i go olbaot.

25Mi mi talem finis, se hemia nao bigfala trabol we bambae i kam kasem yufala. Mi mi tingbaot finis blong panisim yufala olsem, from we yufala i fogetemgud mi, yufala i stap trastem ol narafala god.

26Mi nomo bambae mi teremaot olgeta klos blong yufala, blong mekem yufala i stap neked, yufala i sem.

27Mi mi luk we yufala i stap mekem ol samting we mi no laekem nating. Mo mi luk tu, we oltaem yufala i wantem tumas blong biaen long ol narafala god, blong mekem wosip long olgeta, olbaot long ol hil mo long ol open ples, stret olsem man we i wantem tumas woman blong narafala man. Yufala i stap mekem olsem man hos, we i stap ron biaen long woman hos. !Ol man Jerusalem! Bigfala trabol bambae i kam kasem yufala, from we fasin blong yufala i no stret nating. ?Wetaem, bambae yufala i soemaot we yufala i stret gud long fes blong mi?”