Jajes 19 - Bislama Bible Revised 2012

Ol laen blong Benjamin oli spolemgud narafala woman blong wan laen blong Livae

1Bifo, long taem ya we ol laen* blong Isrel* oli no gat king blong olgeta yet, i gat wan laen blong Livae* i stap long medel bus olgeta, long haf blong distrik ya Efrem* we i ples blong hil. Hem i tekem wan woman Juda* blong vilej ya Betlehem i kam narafala woman blong hem.

2Be wan taem, woman ya i kros long hem, nao i ronwe, i gobak long haos blong papa blong hem long Betlehem, mo i stap fo manis long ples ya.

3Nao biaen, man ya i wantem go blong traem toktok gud long hem, blong i save tekem hem i kambak bakegen. Hem i tekem man blong wok blong hem, mo tufala i tekem tu dongki blong hem nao tufala i go. Taem tufala i kasem ples ya, woman ya i kam tekem hem i go long haos blong papa blong hem. Mo taem papa blong hem i luk man ya, hem i harem gud tumas long hem, nao i talem long hem se, “Mi mi glad tumas blong luk yu.

4I gud yu stap fastaem.” Nao tufala i kakae, mo man ya i stap long ples ya tri dei.

5Long namba fo dei blong hem, woman ya wetem tufala ya, trifala i girap long eli moning, trifala i mekemrere blong gobak. Be papa blong woman ya i talem long man ya se, “I moa gud yufala i kakae fastaem. Bambae yufala i kakae finis, yufala i jes go.”

6Nao hem i tekem man ya, tufala i go sidaon, tufala i kakae, tufala i dring. Be taem tufala i kakae finis, hem i talem bakegen long man ya se, “I gud yufala i stap fastaem. Bambae yumi mekem smol kakae bakegen long naet blong mekem yu yu harem gud.”

7Man ya i no wantem, i girap, i wantem go, be papa blong woman ya i strong long hem, nao oli no go, oli stap bakegen long ples ya.

8Nao long namba faef dei blong hem, man ya i girap long eli moning blong i aot, be papa blong woman ya i talem long hem se, “No, i gud yumi kakae fastaem. Bambae yufala i jes go samtaem long aftenun.” Ale, oli stap, nao tufala i kakae fastaem.

9Nao taem trifala ya i wantem aot bakegen, be papa blong woman ya i talem se, “No, be naoia i let finis. I gud yufala i stap fastaem. Bambae i no longtaem i tudak ya. Sipos yufala i stap, bambae yu save harem gud. Bambae yufala i jes go tumora long eli moning.”

10Be man ya i no wantem slip bakegen long ples ya. Nao hem wetem woman blong hem, mo man blong wok blong hem, mo tufala dongki ya blong hem, we oli fasemrere sarel long tufala finis, olgeta oli aot. Mo taem oli kam klosap long taon ya Jebus, we naoia nem blong hem Jerusalem,*

11be klosap i tudak. Nao man ya blong wok i talem long masta blong hem se, “Masta, taon ya Jebus i klosap nomo, i gud yumi go slip long ples ya.”

12-13Be hem i talem long hem se, “No, yumi no save stap long ples ya. Ol man blong ples ya oli no laen blong Isrel ya. Yumi mas go moa. Bambae yumi save slip long Gibea, sipos no, long Rama.”

14Nao oli go bitim Jebus, oli go. Mo taem san i godaon, oli kamtru long Gibea, wan taon blong ol laen blong Benjamin,*

15mo oli go insaed long taon ya, blong slip long ples ya. Mo oli go sidaon long ples blong storian long taon ya, oli stap wet, be i no gat man i kam tekem olgeta i go stap long haos blong hem.

16Oli stap sidaon gogo, nao wan olfala man i kamtru, we i jes kambak long garen. Olfala ya, hem i bon long haf blong distrik ya Efrem we i ples blong hil, mo biaen i kam stap long Gibea. Be olgeta man blong taon ya oli laen blong Benjamin.

17Olfala ya i luk olgeta ya we oli stap sidaon long ples blong storian, nao i luksave we oli strenja, mo i askem long olgeta se, “?Yufala i kam wea? ?Yufala i stap go wea?”

18-19Nao man ya i talem se, “Mifala i bin go long Betlehem long Juda, mo naoia, mifala i stap kambak blong gohom bakegen. Ples blong mifala i stap long medel bus olgeta, long haf blong distrik ya Efrem we i ples blong hil. Mifala i wantem slip long ples ya. Mifala i gat ol bred* mo waen blong mifala, wetem ol kakae blong tufala dongki ya blong mifala. Mifala i no sot long wan samting, be i no gat man i tekem mifala i go long haos blong hem.”

20Nao olfala ya i talem se, “Yufala i no wari. Yumi go long haos. I nogud yufala i stap long ples ya long naet. Mi bambae mi lukaot long yufala.”

21Nao hem i tekem olgeta i go long haos blong hem. Mo i fidim tufala dongki tu. Mo olgeta oli go wasem* leg blong olgeta, nao oli go kakae.

22 Jen 19.5-8 Olgeta oli stap kakae, oli stap harem gud, nao i no longtaem, sam krangkehed blong taon ya oli kam, oli raonem haos blong olfala ya, oli stat faetem doa blong hem. Nao oli singaot long hem se, “Man ya we i kam stap wetem yu naoia, yu tekem hem i kam afsaed. Mifala i wantem slip wetem hem.”

23Be olfala ya i go afsaed, i talem long olgeta se, “!Ol fren! !Plis yufala i no mekem olsem! !Fasin ya i nogud ya! Man ya, hem i stap long haos blong mi, mo mi mi mas lukaot gud long hem.

24Be i gat wan woman blong hem we i tekem i no longtaem i kam narafala woman blong hem, mo i gat wan gel blong mi tu we i no save man yet. Bambae mi go tekem tufala i kam, nao yufala i save go slip wetem tufala, yufala i save mekem long tufala olsem we yufala i wantem. Be man ya nomo, yufala i no mekem rabis samting ya long hem.”

25Be olgeta oli no lesin long hem nating. Nao laen ya blong Livae i tekem woman ya blong hem i kam, i pusum i go afsaed long olgeta. Nao olgeta oli tekem woman ya, oli go slip wetem hem, we oli stap fosem hem nomo. Oli mekem i nogud tumas long hem. Oli stap slip wetem hem gogo kasem delaet, nao oli letem hem i go.

26Nao taem i brok delaet, woman ya i kambak, i foldaon klosap long doa blong haos blong olfala ya, we man blong hem i stap long hem. Mo hem i stap slip long ples ya gogo san i kam antap.

27Nao taem man blong hem i openem doa blong i gohom, i sek long woman ya blong hem we i stap slip long ples ya, we han blong hem i kam kasem doa.

28Hem i talem long hem se, “Yu girap. Yumi go.” Be woman ya i no tok, from we i ded finis. Nao hem i karem bodi blong hem, i putum long wan dongki blong hem, nao i tekem i gohom.

29 1 Saml 11.7 Nao taem hem i go kasem haos blong hem, hem i go insaed, i karem naef blong hem, i brebrekem bodi blong woman ya long twelef haf, nao i sanem ol man oli karem ol twelef haf ya i go wanwan long ol twelef laen ya blong Isrel.

30Nao olgeta we oli luk samting ya oli talem se, “Tru, i stat long taem we ol bubu blong yumi bifo oli aot long Ijip, kam kasem tede, be neva yumi luk wan samting olsem. I no gat wan samting nating we i kamaot olsem. ?Bambae yumi mekem olsem wanem? !Yumi mas mekem wan samting ya!”