Aesea 9 - Bislama Bible Revised 2012

Wan nambawan king bambae i kamtru

1 Mat 4.15 Nao Profet Aesea i talem se, “Bifo, Hae God i mekem we ol laen* blong Sebulun,* mo ol laen blong Naftali* oli kasem bigfala sem. Nem blong ples blong olgeta i kam nogud olgeta. Be i gat taem i stap kam we bambae hem i leftemap nem blong ol ples ya bakegen, i stat long Mediterenian Si, i go kasem ol ples ya long narasaed Jodan Reva i go, mo i kavremap ol ples olbaot long Galili,* we ol man blong ol narafala kantri oli stap long hem.”

2 Mat 4.16; Luk 1.79 Mo profet i prea, i talem se,

“Hae God.

Mifala i man blong yu.

Fastaem,

mifala i stap wokbaot long tudak,

be naoia,

mifala i luk wan bigfala laet.

Bifo, mifala i stap long tudak

we i blong ded nomo,

be naoia, laet i saenaot,

i kasem mifala.

3Yu yu mekem mifala i harem gud tumas,

yu yu mekem mifala i glad.

Mifala i hapi tumas

long ol samting ya we yu yu mekem,

olsem we ol man oli hapi

long taem we oli stap tekemaot ol kakae long garen,

oli karem i kam,

olsem we oli hapi tumas

long taem we oli stap seraot ol samting

we oli winim long taem blong faet.

4Yu yu tekemaot finis hevi samting ya

we ol enemi blong mifala

oli stap fosem mifala blong karem,

mo yu brekem finis wip ya

we oli stap wipim mifala long hem.

Yu yu flatemgud olgeta,

olsem we bifo finis,

yu flatemgud ol soldia blong ol man Midian.

Yu yu smasemgud olgeta ya

we oli stap spolem mifala,

oli stap mekem i strong tumas long mifala.

5Ol but blong ol soldia ya

we oli kam blong mekem faet,

wetem ol klos blong olgeta

we oli doti tumas long blad,

bambae oli bon evriwan long faea,

we faea bambae i finisimgud olgeta.

6!Wan pikinini boe bambae i bon long mifala!

!Pikinini ya,

bambae yu yu givim long mifala,

mo hem bambae i rul long mifala!

Ol nem blong hem,

bambae oli singaot hem se,

‘Nambawan Man blong Givhan long Man’,

mo ‘God we i Gat Paoa’,

mo ‘Papa we bambae i Stap Oltaem’,

mo ‘Pikinini ya blong King,

we Hem i Stamba blong Pis’.

7 Luk 1.32,33 Taem we hem i stap rul,

oltaem paoa blong hem

bambae i stap kam bigwan moa,

mo ples we hem bambae i rul long hem,

oltaem bambae i stap kwaet.

Bambae hem i wan man

we i kamaot biaen long King Deved,

mo bambae hem i rul

long ples blong king ya.

Paoa blong hem bambae i stanap

long ol fasin blong hem we i stret olgeta,

mo long stret fasin blong hem blong jajem man,

mo bambae hem i stap rul oltaem nomo,

i stat naoia, gogo i no save finis.

Hae God.

Yu yu gat olgeta paoa,

mo yu yu mekem tingting blong yu i strong finis,

blong mekem olgeta samting ya i kamtru.”

Hae God bambae i panisim ol man Isrel ya long not

8Nao Profet Aesea i talem se, “Ol man Isrel.* Yumi ol laen* blong Jekob,* be Hae God we i Masta* blong yumi, hem i talemaot finis panis blong yufala.

9-10Yufala ol man blong taon ya Sameria,* wetem ol narafala man blong kantri ya, bambae yufala i mas save samting ya we hem i stap mekem. Yufala i stap talem se, ‘Ol haos ya we yumi wokem long brikis, ol enemi ya oli brekemdaon olgeta finis, be ol jenis blong olgeta, bambae yumi wokem evriwan long ston nomo. Ol timba insaed long ol haos ya, we yumi wokem olgeta long wud ya sikamo,* olgeta ya oli brebrekem, be ol jenis blong olgeta, bambae yumi wokem olgeta long wud ya sida* we i nambawan.’ Oltaem, tingting blong yufala i go antap tumas, mo yufala i stap tok flas from.

11“Be Hae God i bin mekem ol enemi blong yufala oli girap, oli agens long yufala. Hem i bin pusum olgeta, blong oli kam mekem faet long yufala.

12Long saed long is, ol man Siria oli stap, mo long saed long wes, ol man Filistia oli stap, mo olgeta oli openem maot blong olgeta finis, blong kakae yufala. Be ol samting ya i no mekem we kros blong hem i finis, bambae hem i stap kros yet long yufala. Hem i leftemap han blong hem finis blong kilim yufala, mo han blong hem i stap rere yet blong mekem samting ya.

13“Be yufala i no tanem tingting blong yufala nating from ol sin blong yufala. Nating we hem i panisim yufala, be yufala i no mekem wan samting nating blong kambak long hem.

14Be long wan dei nomo, bambae hem i panisim ol haeman blong yufala wetem ol narafala man tu blong yufala. Long sem taem nomo, bambae hem i katemaot hed blong yufala, mo i sakemaot tel blong yufala tu.

15Hed blong yufala, hemia ol olfala man, wetem ol man we oli gat nem, mo tel blong yufala, hemia ol narafala profet ya, we tok blong olgeta i blong giaman nomo.

16Olgeta ya we oli stap lidim yufala, oli stap mekem yufala i go krangke nomo, oli stap mekem tingting blong yufala i paspas gud.

17Be Masta blong yumi bambae i no save letem ol yang man blong yufala oli ronwe long panis ya, mo bambae hem i no save gat sore long ol wido, mo long ol pikinini we papa blong olgeta i lus, from we yufala evriwan i tanem baksaed long hem finis. Yufala i stap mekem ol fasin nomo we i nogud we i nogud olgeta, mo oltaem yufala i stap tok krangke nomo long hem. Be panis ya bambae i no save mekem we kros blong hem i finis, bambae hem i stap kros yet long yufala. Hem i leftemap han blong hem finis blong kilim yufala, mo han blong hem i stap rere yet blong mekem samting ya.

18“Fasin nogud ya blong yufala, man i no save blokem. Hem i olsem wan faea we i stap bon bigwan, we i stap kakae ol ropnil mo waetgras we oli drae finis. Hem i olsem bigfala faea we i stap kakae bus, nao smok blong hem i stap go antap olgeta.

19Hae God ya we i gat olgeta paoa, hem i kros tumas, mo from samting ya, bambae i no gat man i save blokem kros blong hem, se i no panisim yufala. Panis ya blong hem tu bambae i stap bon olsem faea, we bambae i stap kakae evri ples long kantri ya blong yufala. Bambae yufala i olsem wud nomo, we faea ya i stap kakae, mo bambae i no gat wan long yufala we i save tingbaot brata blong hem.

20Olbaot long ples ya, bambae yufala i save kakae evri samting we yufala i faenem. Bambae yufala i finisim evri kakae long ples ya, be bambae yufala i no save harem samtaem, se yufala i fulap gud. Nating we ol pikinini blong yufala nomo, be bambae yufala i kilim olgeta, yufala i kakae.

21Ol laen blong Manase* bambae oli stap go mekem faet long ol laen blong Efrem,* mo ol laen blong Efrem bambae oli stap kam mekem faet long ol laen blong Manase. Mo yufala evriwan bambae i joen wanples blong kam mekem faet long mifala ol man Juda.* Be ol samting ya bambae i no mekem we kros blong Hae God i finis, bambae hem i stap kros yet long yufala. Hem i leftemap han blong hem finis blong kilim yufala, mo han blong hem i stap rere yet blong mekem samting ya.