Sam 120 - Bislama Bible Revised 2012

Man i prea blong Hae God i givhan long hem(Sing ya i blong ol man oli singsing long hem taem oli stap wokbaot blong go antap long Jerusalem* blong mekem lafet*)(Tok i go long ol man.)

1Olgeta.

Taem mi mi stap long trabol,

mi krae long Hae God,

mo hem i harem krae blong mi.

2Mi talem se, “Hae God,

plis yu blokemgud mi

blong ol man blong giaman mo ol man blong mekem trik

oli no save spolem mi.”

3?Yufala ol man blong giaman,

yufala i save ol samting ya

we God bambae i mekem long yufala?

4Panis blong yufala bambae i olsem

we sap ara blong soldia i stikim yufala.

Bambae yufala i harem

olsem we faea i bonem yufala.

5Taem mi stap wetem yufala,

mi harem nogud tumas,

olsem we mi stap long kantri ya Mesek,

no mi go stap wetem ol man Kedara

6Mi mi stap longtaem tumas wetem yufala

we i no laekem pis nating.

7Taem mi mi tokbaot pis,

be yufala i wantem mekem faet nomo.