1Nao olgeta laen* blong Isrel,* oli kam wanples long Hebron blong luk King Deved long ples ya, mo oli talem long hem se, “King. Yumi ya, yumi evriwan i wan famle nomo.
2Bifo, nating we King Sol i king blong yumi, be yu nao yu stap lidim yumi long faet, mo yu stap tekem mifala i kambak we mifala i sef gud nomo. Hae God i God blong yumi, mo yumi ol man blong hem, mo hem i promes finis long yu, se bambae yu yu lida blong mifala, mo yu yu king blong mifala.”
3Nao long fasin ya nao, olgeta lida blong ol laen blong Isrel oli kam long Hebron, oli kam stanap long fes blong King Deved, mo hem i mekem wan promes wetem olgeta long fes blong Hae God, we oli agri se hem bambae i king blong olgeta mo olgeta bambae oli man blong hem. Nao olgeta oli kafsaedem oel i go long hed blong hem blong putumap hem i kam king blong ol laen blong Isrel, olsem we Hae God i bin promes long Profet Samuel bifo.
4 Jos 15.63; Jaj 1.21 Nao King Deved wetem ol laen blong Isrel oli go blong mekem faet long taon ya Jerusalem*. Long taem ya, taon ya, nem blong hem Jebus yet, mo ol laen blong Jebus we oli man blong ples ya bifo olgeta, oli stap yet long hem.
5Olgeta ya oli talem long hem, se bambae hem i no save go insaed long taon ya blong olgeta, be hem i go holem taon ya wetem strong ples blong haed blong olgeta we nem blong hem Saeon,* mo biaen hem i putum narafala nem blong hem se, “Taon* blong King Deved”.
6Long dei ya, King Deved i talem long ol man blong hem se, “!Olgeta! !Sipos wan long yufala i kilim wan man Jebus i ded fastaem, hem bambae i kam komanda blong ol soldia blong yumi!” Nao Joab, we mama blong hem Jeruia, hem i lidim ol man i go insaed fastaem, mo hem i kam komanda blong olgeta.
7Nao from we king i go stap long ples ya we i wan strong ples blong haed, ol man oli stap kolem ples ya se, “Taon blong King Deved”.
8Nao hem i bildim taon ya bakegen, i stat long ples ya we oli berem wan krik insaed long taon ya long saed i go long is. Mo Joab i gohed, i wokemgud taon ya bakegen, i finisimgud.
9Nao oltaem, king i stap kam strong moa, from we Hae God i gat olgeta paoa, mo oltaem i stap wetem hem.
Ol nambawan soldia blong King Deved(2 Samuel 23.8-39)10Nao i gat ol nambawan soldia blong King Deved we ol man oli savegud olgeta. Olgeta ya wetem ol narafala laen* blong Isrel* oli bin givhan long hem blong i kam king blong olgeta, olsem we Hae God i bin promes long olgeta, mo oli stap mekem kingdom blong hem i kam strong moa. Nem blong olgeta ya i olsem.
11Faswan long olgeta Jasobeam, we i laen blong Hakmon. Hem i wan long trifala man ya we ol man oli stap singaot trifala se, “Tri man blong King Deved”, mo hem i lida blong trifala. Wan taem, hem i go faet long tri handred man, mo i kilim olgeta evriwan oli ded long spia blong hem.
12Mo narawan, Eleasara we i nambatu long trifala ya. Hem i wan laen blong Ahoho, mo papa blong hem Dodo.
13Long taem ya we King Deved i go faet long ol man Filistia long Pasdamim, man ya i stap faet strong long saed blong hem. Hem i stap stret long wan garen bale,* nao ol narafala laen blong Isrel oli stat ronwe long hem,
14be hem wetem ol man blong hem oli stanap strong long medel blong garen ya, mo oli stap faet agens long ol man Filistia ya gogo Hae God i mekem olgeta oli win gud.
15Wan dei, tri man long olgeta toti soldia ya we oli lida blong ol narafala soldia, trifala i go long bigfala ston ya we King Deved i stap long hem, klosap long hol blong ston ya long Adulam. Long taem ya ol man Filistia oli putumap ol haos tapolen blong olgeta long bigfala levelples ya Refaem,* long medel blong ol hil, mo oli stap long hem.
16Ples ya we king i stap long hem i wan strong ples blong haed antap long hil, mo ol man Filistia oli holem taon ya Betlehem, oli stap long hem.
17Nao king i stap tingbaot taon ya we i taon blong hem, mo i talem se, “O, sipos wan man i save go kasem sam wota long wel ya long doa* blong stonwol blong taon ya, i karem i kam blong mi save dring, bambae mi harem gud tumas.”
18Nao trifala ya i go pastru long ples we ol man Filistia ya oli stap long hem, trifala i go kasem wel ya, mo trifala i tekem wota, trifala i karem i kam long king blong i dring, be hem i no wantem dring. Hem i givim i go long Hae God,
19mo i talem se, “Mi no save dring wota ya. Sipos mi dring, bambae i olsem we mi dring blad blong trifala ya we i letem laef blong trifala blong go tekem i kam.” Nao hem i no dring. Hemia nao ol bigbigfala samting we trifala man ya blong King Deved i mekem.
20Mo Abisae, we i brata blong Joab, hem i lida blong grup ya we nem blong hem, “Ol Toti Man blong King Deved”. Wan taem hem i holem spia blong hem, i go faet long tri handred man, mo i kilim olgeta evriwan oli ded, mo from samting ya, ol man oli stap leftemap nem blong hem i kam hae moa long ol narafala toti man ya.
21Nao nem blong hem i stap go antap moa long nem blong ol narafala ya, mo hem i kam lida blong olgeta, be nem blong hem i no kam hae moa winim nem blong tri narafala man ya.
22Mo Benaea, wan man Kabjehel, we papa blong hem Jehoeada, hem tu i wan soldia we ol man oli stap leftemap nem blong hem. Hem i mekem plante bigbigfala samting, mo i kilim tu strong man blong Moab tu i ded. Mo wan taem, long taem blong kolkol, hem i go insaed long wan hol, nao i kilim wan laeon i ded.
23Mo hem i kilim wan man Ijip tu i ded, we hem i wan bigfala man mo i longfala i bitim tu meta, mo spia blong faet blong hem tu i bigwan tumas. Be Benaea i holem nalnal blong hem, i go faet long man ya, mo i pulumaot spia long han hem, i sperem hem i ded.
24Hemia nao ol bigbigfala samting we Benaea i mekem. Hem tu i wan long ol toti man ya,
25we ol man oli stap leftemap nem blong hem i hae moa long plante long ol narafala, be nem blong hem i no hae moa winim nem blong tri narafala man ya. Mo King Deved i putum hem i bos blong ol bodigad blong hem.
26Nem blong ol nambawan soldia blong King Deved i gat Asahel, we i brata blong Joab, mo Elanan, wan man Betlehem, we papa blong hem Dodo,
27mo Samot, we i man Harod, mo Helej, we i man Pelet,
28mo Ira, wan man Tekoa, we papa blong hem Ikes, mo Abiesa, we i man Anatot,
29mo Sibekae, we i man Husa, mo Ilae, we i man Ahoho,
30mo Maharae, we i man Netofa, mo Heled, wan man Netofa, we papa blong hem Bahanaha,
31mo Itae, wan man Gibea blong distrik ya Benjamin,* we papa blong hem Ribae, mo Benaea, we i man Piraton,
32mo Hurae, we i blong bigfala levelples long medel blong ol hil klosap long Gahas, mo Abiel, we i man Aba,
33mo Asmavet, we i man Baharum, mo Eliabaha, we i man Sahalbon,
34mo Hasem, we i man Gison, mo Jonatan, wan man Harara, we papa blong hem Sage,
35mo Ahiam, wan narafala man Harara, we papa blong hem Sakara, mo Elifal, we papa blong hem Uru,
36mo Hefa, we i man Mekera, mo Ahia, we i man Pelon,
37mo Hesro, we i man Kamel, mo Naharae, we papa blong hem Esbae,
38mo Joel, we i brata blong Natan, mo Mibara, we papa blong hem Hagri,
39mo Jelek, we i man Amon, mo Naharae, wan man Beherot, we i man blong karem ol samting blong faet blong Joab,
40mo Ira mo Gareb, we tufala i man Jatiri,
41mo Uria, we i man Het, mo Sabad, we papa blong hem Ahalae,
42mo Adina, we papa blong hem Sisaha, we i wan haeman long laen blong Ruben,* mo i lidim wan grup blong hem we i gat toti soldia long hem,
43mo Hanan, we papa blong hem Mahaka, mo Josafat, we i man Mitan,
44mo Usia, we i man Astera, mo Sama mo Jehiel, we tufala i man Aroere, we papa blong tufala Hotam
45mo Jediael mo Joha, we tufala i man Tiji, we papa blong tufala Simri,
46mo Eliel, we i man Mahava, mo Jeribae mo Josavia, we papa blong tufala Elnaham, mo Itma we i man Moab,
47mo Eliel mo Obed mo Jahasiel, we trifala i man Joba.
Who We AreWhat We EelieveWhat We Do
2025 by iamachristian.org,Inc All rights reserved.
