Sam 118 - Bislama Bible Revised 2012

Man i talem tangkiu long Hae God from we hem i win long faet(Tok i go long ol man.)

1 1 Kron 16.34; 2 Kron 5.13; 7.3; Esra 3.11; Sam 100.5; 106.1; 107.1; 136.1; Jer 33.11 Olgeta.

Yumi talem tangkiu long Hae God,

from we hem i gud tumas.

Oltaem bambae hem i lavem yumi,

gogo i no save finis.

2Yumi ol laen* blong Isrel,*

yumi talem se,

“Oltaem bambae hem i lavem yumi,

gogo i no save finis”

3Yufala ol pris* blong hem,

yufala i talem se,

“Oltaem bambae hem i lavem yumi,

gogo i no save finis.”

4Yumi evriwan we yumi stap mekem wosip long hem,

yumi talem se,

“Oltaem bambae hem i lavem yumi,

gogo i no save finis.”

5Taem mi mi stap long trabol,

mi krae i go long hem,

mo hem i harem krae blong mi,

i mekem mi mi fri.

6 Hib 13.6 Oltaem hem i stap wetem mi,

nao bambae mi mi no save fraet.

Man i no save mekem wan samting

blong spolem mi.

7Hae God nomo i stap givhan long mi.

Mi mi savegud

we hem bambae i winim ol enemi blong mi.

8I nogud we man i putum tingting blong hem

long man nomo,

i moa gud hem i trastem Hae God.

9I nogud we man i putum tingting blong hem

long ol lida we oli man nomo,

i moa gud hem i trastem Hae God.

10Ol man blong ol narafala kantri

oli kam plante raonabaot long mi,

be mi mi flatemgud olgeta

long paoa blong hem.

11Oli kam plante raonabaot long mi

we oli plante we plante,

be mi mi flatemgud olgeta

long paoa blong hem.

12Oli kam hivap raon long mi

olsem ol sugabag,*

be mi mi flatemgud olgeta

long paoa blong hem.

Olgeta oli finis kwiktaem nomo,

olsem we faea i bonem waetgras.

13Olgeta oli strong tumas,

mo oli kam faet long mi

we klosap oli winim mi,

be hem i givhan long mi.

14 Eks 15.2; Aes 12.2 Hem i stap givim paoa long mi,

i stap mekem mi mi strong.

Hem nao i stap sevem mi.

15Mifala ol man blong Hae God,

mifala i stap long ol haos tapolen blong mifala.

Mifala i win finis,

mo mifala i glad tumas from,

nao mifala i stap singsingaot se,

“Hae God i gat bigfala paoa,

mo hem i mekem mifala i win.

16Hem i mekem samting ya

long paoa blong hem.

!Paoa blong hem i strong tumas long faet!”

17Bambae mi no save ded,

bambae mi stap,

mi talemaot ol samting

we Hae God i mekem.

18Hem i panisim mi we i meksave mi,

be hem i no letem mi mi ded.

19Plis yufala i openem ol doa blong yad

blong haos* blong Hae God long mi,

nao bambae mi go insaed,

mi talem tangkiu long hem.

20Hemia ol doa blong Hae God ya.

Ol stret man nomo oli save kam insaed long hem.

(Tok i go long Hae God.)

21Hae God.

Oltaem mi mi presem yu,

from we yu yu harem mi,

yu mekem mi mi win.

(Tok i go long ol man.)

22 Luk 20.17; Wok 4.11; 1 Pita 2.7 Mat 21.42; Mak 12.10,11 Olgeta.

Pos ya we ol man blong wokem haos oli sakem finis,

naoia hem i kam nambawan pos blong haos.

23Samting ya, Hae God i mekem,

mo yumi luk we i gud tumas.

24Dei ya,

hem i dei we hem i win long hem,

i gud yumi glad,

yumi mekem lafet.

(Tok i go long Hae God.)

25 Mat 21.9; Mak 11.9; Jon 12.13 Hae God.

Plis yu sevem mifala.

Plis yu mekem mifala i win.

(Pris i toktok long ol man.)

26 Mat 21.9; 23.39; Mak 11.9; Luk 13.35; 19.38; Jon 12.13 Olgeta.

Mifala i stap long haos blong Hae God,

mo prea blong mifala

we hem bambae i blesem man ya

we i kam long nem blong hem,

mo we bambae i blesem yufala.

27Hae God, hem nao i God,

mo hem i mekem laet blong hem

i saenaot i kam long yumi.

Yufala i kam mekem wosip,

yufala i holem ol han blong tri,

yufala i maj i goraon long olta.

(Tok i go long Hae God.)

28Hae God.

Yu yu God blong mi,

oltaem bambae mi talem tangkiu long yu,

oltaem bambae mi talemaot hae nem blong yu.

(Tok i go long ol man.)

29Olgeta.

Yumi talem tangkiu long Hae God

from we hem i gud tumas.

Oltaem bambae hem i lavem yumi,

gogo i no save finis.