1Nao i no longtaem, King Deved i go mekem faet long ol man Filistia bakegen, mo i winim olgeta, nao i holem taon ya Gat wetem ol vilej raonabaot long hem, mo olgeta long ples ya oli kam aninit long rul blong hem.
2Mo biaen, hem i go mekem faet long ol man Moab, mo i winim olgeta, nao olgeta ya tu oli kam aninit long rul blong hem, mo oli stap pem takis long hem.
3Mo biaen bakegen, hem i go mekem faet long King Hadadesa we i king blong Joba, we i wan distrik blong kantri ya Siria, klosap long distrik ya Hamat, from we king ya i stap traem blong holem bigfala ples ya we Yufretes Reva i kamaot long hem, antap long hil.
4Nao King Deved i holem wan taosen kat blong faet blong king ya, wetem seven taosen soldia blong ron long hos, mo twanti taosen narafala soldia blong hem. Ol hos, hem i holem i naf nomo blong pulum wan handred kat blong faet, be ol narawan, hem i katem string blong leg blong olgeta blong oli no moa save wokbaot.
5Nao ol man Siria long distrik ya Damaskes oli harem nius blong samting ya, mo oli sanem sam soldia oli kam blong givhan long King Hadadesa. Be King Deved i go mekem faet long olgeta, mo i kilim twanti tu taosen man blong olgeta oli ded.
6Nao hem i putum ol soldia blong hem oli stap olbaot long distrik ya blong olgeta, mo ol man Damaskes tu oli kam aninit long rul blong hem, mo oli stap pem takis long hem. Nao long evri ples we hem i go mekem faet long hem, Hae God i stap mekem hem i win.
7Ol sil* blong blokem ara we ol kapten blong King Hadadesa oli stap karem, ol man oli wokem long gol, nao King Deved i tekemaot ol sil ya i karem i kam long Jerusalem.*
81 King 7.40-47; 2 Kron 4.11-18Mo hem i tekemaot plante bras tu long tufala taon ya Tibat mo Kun, we tufala i blong King Hadadesa, i karem i kam. Mo biaen, King Solomon i yusum ol bras ya blong mekem bigfala tang ya wetem tu bigfala pos ya mo ol narafala samting we oli wokem long bras, we oli stap yusum long haos* blong Hae God.
9Nao taem King Toe blong Hamat i harem nius we King Deved i winim olgeta soldia blong King Hadadesa,
10hem i sanem pikinini blong hem Joram i go blong talem halo long King Deved, mo blong talemaot long hem we i glad tumas blong harem we hem i winim King Hadadesa ya olsem, from we king ya i stap mekem faet agens long hem plante taem. Joram ya i karem sam presen we oli wokem long gol, wetem sam we oli wokem long silva, mo sam we oli wokem long bras, nao i givim olgeta i go long King Deved.
11Nao king i tekem ol samting ya, i putum i go wetem ol silva mo gol we i bin karemaot long ol man Edom mo ol man Moab mo ol man Amon mo ol man Filistia mo ol man Amalek, we hem i stap mekem faet long olgeta, nao i mekem prea long olgeta samting ya blong mekem olgeta oli tabu, oli blong Hae God, blong oli save yusum olgeta long wosip.
12 Sam 60 Mo biaen bakegen, Abisae, we mama blong hem Jeruia, we i sista blong King Deved, hem i go mekem faet long ol man Edom long bigfala levelples ya long medel blong ol hil we nem blong hem “Ples blong Tekem Sol”, mo i kilim eitin taosen man Edom oli ded.
13Hem i putum ol soldia blong hem oli stap olbaot long plante ples long kantri ya, mo olgeta man long kantri ya oli stap aninit long rul blong angkel blong hem.
Nao long evri ples we King Deved i go mekem faet long hem, Hae God i stap mekem hem i win.
14Long taem ya, hem i stap rul long olgeta ples long Isrel,* mo oltaem, hem i stap lukaot gud long olgeta man blong hem, long fasin we i gud mo i stret.
15Nem blong ol haeman blong hem i gat Joab, we mama blong hem Jeruia, hem i komanda blong ol soldia blong hem. Jehosafat, we papa blong hem Ahilud, hem i stap lukaot long ol ripot blong hem.
16Jadok, we papa blong hem Ahitub, mo Ahimelek, we papa blong hem Abiata, tufala i pris blong hem. Seraea, hem i sekretari blong hem.
17Benaea, we papa blong hem Jehoeada, hem i kapten blong ol bodigad blong hem. Mo ol pikinini blong king oli kam haeman long wok blong hem.
Who We AreWhat We EelieveWhat We Do
2025 by iamachristian.org,Inc All rights reserved.
