1Waestok, hem i olsem wan woman we i wokem haos blong hem, we ol man blong wok blong hem oli planem seven bigfala pos blong holem i strong.
2Hem i kilim wan anamol blong mekem lafet, mo i tekem waen, i putum ol lif we i gat gudfala smel i go long hem, blong mekem tes blong hem i gud, mo i putumrere ol kakae long tebol.
3Nao hem i sanem ol gel blong wok blong hem oli go stanap antap long wan ples we i hae moa long ol narafala ples long taon ya, blong oli talemaot tok blong hem.
4-5Oli stap singaot ol man we oli no save samting, wetem olgeta we oli no gat hed se, “!Olgeta! Waestok i talem se, ‘!Yufala i kam! !Kakae i rere finis! !Yufala i kam kakae! !Waen i rere finis! !Yufala i kam dring!
6Yufala i aot long ol krangke fasin blong yufala, yufala i folem rod blong mi, nao bambae yufala i gat laef.’ ”
7Sipos yu tok long wan man blong flas blong traem stretem hem, bambae hem i girap, i tok nogud long yu. Mo sipos yu tok strong long wan man nogud, blong jajem hem from fasin blong hem, bambae hem i girap i spolem yu nomo.
8I nogud yu traem stretem man blong flas, from we hem bambae i no save laekem yu nating, bambae i agens long yu. Be sipos yu tok blong stretem wan man we i waes, bambae hem i save tinghae long yu.
9Ol samting we yu talem long man olsem, bambae i mekem hem i waes moa, mo ol samting we yu talem long man we i stret, bambae i mekem hem i gat save moa.
10 Job 28.28; Sam 111.10; Prov 1.7 Sipos man i wantem kam waes, stamba blong hem, hem i mas tinghevi long Hae God, mo i mas ona gud long hem. Hae God i tabu we i tabu, mo fasin blong hem i stret olgeta, mo sipos man i wantem haremsave mining blong ol samting, hem i mas savegud Hae God.
11Waestok i save mekem laef blong man i longfala moa.
12Mo sipos man i folem, hemia bambae i mekem hem i harem gud, be sipos man i tanem baksaed long hem, hem nomo bambae i harem nogud from.
13Be krangke fasin, hem tu i olsem wan woman, be fasin blong hem i narafala. Hem i olsem woman we i no gat save, we i stap mekem tumas noes, mo i no gat sem nating.
14Haos blong hem i stap long wan hae ples long taon, mo oltaem, hem i stap sidaon long wan jea long doa blong hem.
15-16Mo ol man we oli no gat save, mo olgeta we oli no gat hed, oli stap pas i go blong mekem ol wok blong olgeta, mo hem i stap singaot long olgeta se, “!Ei! !Yufala i kam long haos blong mi!
17!Wota we yu stilim, hem i swit moa! !Mo bred we yu stilim, tes blong hem i gud tumas!”
18Be ol man ya we hem i stap singaot olgeta, oli no save se man we i go long haos blong hem bambae i ded, mo olgeta we oli go insaed long haos blong hem finis, naoia oli stap daon olgeta long Hom* blong ol Dedman.
Who We AreWhat We EelieveWhat We Do
2025 by iamachristian.org,Inc All rights reserved.
