Ol Proveb 25 - Bislama Bible Revised 2012

Sam narafala waestok blong King Solomon

1I gat sam narafala waestok blong King Solomon i stap we biaen, ol man blong King Hesekia blong Juda* oli raetemdaon. Ol waestok ya i olsem.

2Yumi stap ona long God, from we hem i stap mekem ol wok blong hem long fasin we yumi no save luk, be yumi stap ona long ol king, from we oli stap faenemaot ol samting ya, mo oli stap talemaot i klia long ol man.

3Yumi no naf blong save tingting blong ol king. Tingting blong olgeta i moa, i winim ol tingting blong yumi, i hae olsem skae we i antap we i antap, mo i dip, olsem dipsi we i dip we i dip.

4Sipos ol man oli tekemaot ol doti long silva blong mekem i klin, bambae man blong wokem ol flas samting i save wokem ol gudgudfala samting long hem.

5Mo long sem fasin, sipos yumi ronemaot ol man nogud we oli stap givim ol krangke tok long king oli gowe long hem, bambae kantri i save gohed long stret fasin, mo ol man oli save talem se oltaem rul blong king ya, hem i stret gud.

6 Luk 14.8-10 Sipos king i singaot yu blong yu kam long haos blong hem, i nogud yu traem mekem olsem we yu yu wan haeman, nao yu go sidaon wetem ol narafala haeman blong hem.

7Sipos yu mekem olsem, maet hem i singaot wan narafala man we i hae moa long yu, blong hem i kam sidaon long ples ya. I moa gud hem nomo i talem long yu, blong yu kam sidaon long wan ples we i hae moa.

8Yu no hareap blong go long kot blong talemaot wan samting we yu yu luk. ?Sipos biaen, wan witnes i soemaot we yu yu rong, wanem nao bambae yu mekem?

9Sipos yu wetem fren blong yu we i stap klosap long yu, yutufala i rao from wan samting, i moa gud yutufala nomo i stretem bisnes ya, mo biaen, bisnes ya we i no blong tokbaot, yu no mas tokbaot bakegen.

10Sipos yu stap talemaot ol tok olsem, bambae ol man oli faenemaot we yu yu no man blong holemtaet tok haed, nao bambae yu no save mekem olgeta oli fogetem samting ya bakegen, mo oltaem, bambae yu sem from.

11Sipos yu talemaot wan tingting blong yu, we yu mekem i klia gud long ol man, hemia i olsem we yu wokem wan pija long gol, mo yu putum silva i goraon long hem blong flasem.

12Sipos man we i gat save i tok strong long narafala man blong stretem hem, mo man ya i save lesin long hem, tok ya i gud moa, i winim ring mo jen we oli wokem long gol we i beswan.

13Man blong karem tok we ol man oli save trastem hem, hem i save mekem man we i sanem hem i glad tumas. Hem i olsem kolwota, we i save mekem ol man we oli stap wok strong tumas long bigsan blong tekemaot ol kakae long garen oli harem gud.

14Man we oltaem i stap promes blong mekem samting be i no mekem, hem i olsem ol klaod blong ren long draetaem, we oli no karem ren nating i kam.

15Sipos wan man i agens long yu tumas, nating we hem i wan haeman, be sipos yu stap toktok gud wetem hem, we yu mekem tingting blong yu i longfala, fasin ya bambae i save winim hem, i save mekem hem i kam fren gud wetem yu bakegen.

16Sipos yu faenem eg* blong sugabag,* i nogud yu kakae tumas. Sipos yu kakae tumas, bambae i mekem yu yu traot.

17Mo long sem fasin, i nogud yu stap go oltaem blong visitim fren blong yu we i stap klosap long yu. I isi blong hem i kam taed tumas long yu, nao bambae i no wantem yu, i agens long yu.

18Giaman toktok we man i mekem agens long narafala man, hem i olsem naef blong faet, no nalnal, no ara we i sap we i sap. Hem i save kilim man i ded.

19Sipos trabol i kasem yu, nao yu stap trastem ol man we oli no blong trastem, hemia i olsem we yu stap traem kakae long tut blong yu we i stap muvmuv, no we yu stap wokbaot long leg blong yu we i nogud.

20Sipos yu traem singsing long man we tingting blong hem i foldaon, hemia i olsem we yu go tekemaot klos blong hem long koltaem, no we yu go ravem sol long bodi blong hem long ples we i karekil.

21 Rom 12.20 Sipos wan enemi blong yu i hanggri, yu mas go givim kakae long hem, no sipos hem i tosta, yu mas go givim wota long hem.

22Long fasin ya, bambae yu mekem hem i sem we i sem, mo bambae Hae God i givim pei long yu from.

23Fasin ya we oltaem man i stap talem ol tok olbaot blong spolem narafala man, hem i save mekem man i kros evritaem nomo, olsem we not win, oltaem i stap tekem ren i kam.

24I moa gud blong man i go slip hem wan afsaed, i winim we hem i stap long haos wetem woman blong hem we oltaem i stap toktok tumas.

25Sipos yu stap wet longtaem blong harem nius long wan kantri longwe, nao wan gud nius i kamtru, hemia i olsem we yu tosta tumas, trot blong yu i drae olgeta, nao yu dring kolwota.

26Gudfala man we i letem man nogud i gohed long fasin nogud, hem i olsem springwota we i kam doti, no wel we oli putum posen long hem.

27I nogud yu stap dring tumas suga. Samting ya bambae i spolem yu. Mo long sem fasin, i nogud yu stap traem mekem ol man oli stap leftemap yu oltaem.

28Sipos yu no save holem kros blong yu, bambae i no gat man i save givhan long yu. Bambae yu kam olsem taon we i no gat bigfala stonwol i goraon long hem, we i isi nomo blong ol enemi blong hem oli kam mekem faet long hem.