Sekaraea 11 - Bislama Bible Revised 2012

Ol rabis king bambae oli lus

1Mo Profet Sekaraea i talem se,

“Lebanon.

Yu mas openem ol doa blong yu,

blong faea i kam bonem ol tri ya sida*

we i stap long yu.

2Ol paentri.*

Yufala i mas krae bigwan

from ol sida ya we oli folfoldaon finis.

Ol gudgudfala tri ya,

faea i kakae olgeta evriwan finis.

Ol oktri* blong Basan.

Yufala tu i mas krae bigwan,

from we ol bigbigfala tri long bus,

ol man oli katemdaon evriwan finis.

3Ol lida blong kantri ya oli krae tumas,

oli harem nogud

from we ol gudgudfala samting blong olgeta

oli lus evriwan finis.

Ol laeon tu oli stap krae,

from we bigfala bus ya klosap long Jodan Reva,

we i ples blong olgeta,

ol man oli spolem evriwan finis.”

Man blong lukaot long sipsip we fasin blong hem i gud

4Nao Profet Sekaraea i talem se, “Hae God i God blong mi, mo hem i talem long mi se, ‘Yu mas kam olsem man blong lukaot long sipsip, blong lukaot gud long ol sipsip ya we ol man oli makemaot olgeta blong kakae.

5Ol man we oli stap pem ol sipsip we oli blong karem pikinini, oli stap go kilim olgeta be oli no kasem panis from. Mo olgeta we oli stap salem ol sipsip ya, oli stap talem se, “!O, naoia yumi kam rijman! !Yumi mas presem God from!” Mo ol man blong lukaot long ol sipsip ya, olgeta tu oli no gat sore long olgeta.’

6(“Hae God i talem se, ‘Bambae mi mi no moa gat sore long ol man blong wol ya. Bambae mi mekem ol man oli foldaon wanwan long han blong ol king blong olgeta. Nao bambae mi mekem we olgeta ya oli flatemgud olgeta ples long wol ya. Mo bambae mi no save tekemaot ol man ya bakegen long han blong olgeta.’ ”)

7Nao profet i talem se, “Nao mi mi mekem olsem we Hae God i talem long mi. Mi go luk olgeta ya we oli stap pem ol sipsip, mo oli stap salem olgeta, blong oli pem mi, blong mi go lukaot long ol sipsip ya blong olgeta, we oli makemaot olgeta blong kakae. Nao mi holem tu stik blong lukaot long sipsip, wan mi putum nem blong hem se, ‘Givhan long Gladhat’, mo narawan mi putum nem blong hem se, ‘Joen Wanples’, mo mi stap lukaot gud long olgeta.

8I gat tri narafala man blong lukaot long sipsip we mifala i wok wanples, be trifala i no laekem mi nating, trifala i stap agens long mi. Nao mi no moa gat sore long trifala, mo long wan manis nomo mi mi sakemaot trifala.

9Nao mi talem long ol sipsip ya blong mi se, ‘Bambae mi no moa save lukaot long yufala bakegen. Yufala we i blong ded, mi mas letem yufala i go ded, mo yufala we i blong ol man oli kilim yufala i ded, oli mas kilim yufala. Mo yufala ya we i blong stap, bambae yufala nomo i stap kilkilim yufala gogo yufala i ded evriwan.’

10Nao mi tekem stik ya we nem blong hem ‘Givhan long Gladhat’, mi brekem blong soemaot we promes* we Hae God i mekem wetem olgeta kantri, naoia i finis.

11Nao long sem dei ya nomo, promes ya i finis olgeta. Taem mi stap mekem ol samting ya, olgeta we oli stap pem ol sipsip ya, mo olgeta we oli stap salem, oli stap lukluk mi, mo oli save we Hae God i toktok long olgeta long ol samting ya we mi mi stap mekem.

12Mat 27.9,10

Mat 26.15Mo mi talem long olgeta se, ‘Sipos yufala i wantem, mi mi wantem se yufala i pem mi, be sipos yufala i no wantem, yufala i holem pei blong mi i stap fastaem.’ Nao olgeta oli skelem toti sekel silva we i olsem fiftin taosen vatu 0, oli givim long mi blong pem mi.

13“Nao Hae God i talem long mi se, ‘Yu go putum mane ya long ples blong mane long haos* blong mi.’

Nao mi luk we pei blong mi i no kasem stret mak blong hem nating, be mi tekem mane ya, mi go putum long ples blong mane long haos blong God, olsem we hem i talem.

14Nao mi girap, mi brekem narafala stik ya we nem blong hem ‘Joen Wanples’, blong soemaot we tufala kantri ya Juda* mo Isrel,* tufala i seraot.”

Man blong lukaot long sipsip we fasin blong hem i nogud

15Nao Profet Sekaraea i talemaot we Hae God i talem long hem bakegen se, “Naoia mi mi wantem blong yu yu mekem olsem we yu yu man blong lukaot long sipsip, be fasin blong yu bambae i nogud.

16Samting ya bambae i soemaot we mi bambae mi putum wan man blong i lukaot long ol sipsip blong mi. Be man ya bambae i no save givhan nating long olgeta ya we bambae oli stap long trabol we klosap oli ded from, mo bambae hem i no save lukaot olgeta we oli lus, mo i no save givhan long olgeta we oli gat so. Mo olgeta we oli strong, oli stap gud, bambae hem i no save tekem olgeta i go long gudfala gras blong oli kakae. Bambae hem i girap, i stap kilim olgeta we oli fatfat gud, nao i kakae olgeta we i finisimgud.

17Man blong lukaot long sipsip we fasin blong hem i nogud olsem, nao i lego ol sipsip blong hem, hem bambae i mas kasem panis. Long taem blong faet, bambae hem i lusum olgeta paoa blong hem. Han blong hem bambae i kam nogud, mo raet ae blong hem bambae i kam blaen.”