Esikel 11 - Bislama Bible Revised 2012

Hae God i tok agens long ol man Jerusalem

1Nao long vison ya blong mi, Spirit blong Hae God i leftemap mi mi go antap, i tekem mi mi go long doa blong yad blong haos* blong Hae God, long saed i go long is. Long ples ya, mi luk twanti faef man oli stap, mo long grup ya, i gat tu lida blong ol laen* blong Isrel* we nem blong tufala, Jahasania, we papa blong hem Asuru, mo Pelatia, we papa blong hem Benaea.

2Nao Hae God i talem long mi se, “Man blong wol ya. Ol man ya oli stap mekem ol rabis plan, mo oli stap givim ol toktok blong givhan long ol man blong taon ya, be ol toktok ya blong olgeta i nogud we i nogud.

3Oli stap talem se, ‘I no longtaem, bambae yumi stat wokem ol haos blong yumi bakegen. Taon ya i olsem wan sospen, mo yumi i olsem mit insaed long hem, be nating we i olsem, hem i stap blokem yumi blong faea i no save bonem yumi.’

4Yu yu mas tok agens long olgeta ya.”

5Nao Spirit blong Hae God i kam long mi, mo hem i talem long mi blong mi talemaot tok ya blong hem long ol man long taon ya, we i talem se, “!Olgeta! Mi mi save ol samting ya we yufala i stap tokbaot, mo ol samting ya we yufala i stap plan blong mekem.

6Yufala i kilim plante man finis long taon ya, we i mekem ol rod ya oli fulap gud long ol dedman.

7“Mi mi Hae God, mi Masta* blong yufala, mo mi talem long yufala se i tru we taon ya i wan sospen. ?Be mit we bambae i go long hem wanem? Ol man ya we yufala i stap kilim olgeta, hemia nao mit blong hem. Bambae yufala i no save stap long ples ya. Mi bambae mi sakemaot yufala i gowe long taon ya.

8?Weswe? ?Yufala i fraet long naef blong faet? Be bambae mi tekem ol man blong faet oli kam wetem ol naef blong faet blong olgeta, blong oli mekem faet long yufala.

9Mo bambae mi tekemaot yufala i gowe long taon ya, mi putum yufala long han blong ol man blong narafala kantri. Mi mi talemaot finis, se bambae yufala i mas ded,

10mo long taem ya, ol man ya bambae oli kilim yufala long faet, stret long mak blong graon blong kantri ya blong yufala.

Nao bambae yufala evriwan i savegud we mi mi Hae God.

11Taon ya bambae i no save blokem yufala olsem we sospen i blokem mit we i stap insaed long hem, from we mi bambae mi panisim yufala stret long mak blong graon blong kantri ya blong yufala.

12Bambae yufala i savegud we mi mi Hae God, mo bambae yufala i save we taem yufala i stap obei long ol loa blong ol narafala kantri raonabaot long yufala, yufala i stap brekem ol loa blong mi, mo yufala i no obei long ol tok blong mi.”

13Nao mi luk se taem mi stap talemaot tok we Hae God i givim long mi, wantaem nomo, Pelatia i foldaon i ded olgeta. Nao mi mi foldaon we fes blong mi i go kasem graon blong mi prea, nao mi singaot bigwan se, “Hae God. Yu yu Masta blong mi. ?Weswe? ?Bambae yu yu kilim olgeta laen blong Isrel evriwan oli ded?”

Hae God i givim promes blong hem long ol man we oli stap wok slef long Babilonia

14Nao long vison ya, Hae God i talem long mi se,

15“Man blong wol ya. Yu wetem ol narafala laen* blong Isrel* we yufala i stap wok slef* long Babilonia, ol laen blong yufala we oli stap long Jerusalem* oli stap tokbaot yufala. Oli stap talem se, ‘Ol man ya we oli stap wok slef long Babilonia oli stap longwe tumas blong mekem wosip long Hae God. Be yumi, Hae God i givim graon ya finis long yumi.’

16Nao from samting ya, yu mas go talem long ol fren blong yu, we mi mi talem se, ‘Mi mi Hae God, mi Masta* blong yufala, mo mi nao mi sanemaot yufala blong yufala i kam stap wetem ol man long ol narafala kantri ya, mo mi mekem yufala i kam stap olbaot long ol kantri ya. Be mi mi stap yet wetem yufala.

17Mi bambae mi tekemaot yufala long olgeta kantri ya we mi bin mekem yufala i go stap olbaot long olgeta, nao mi tekem yufala i kambak, mi givim kantri ya blong yufala i gobak long yufala bakegen.

18Taem yufala i gobak long kantri ya blong yufala, bambae yufala i sakemaot olgeta aedol we yufala i save faenem long kantri ya, from we oli nogud we i nogud.

19 blong God i leftemap mi mi go antap, i karem mi mi kambak long Babilonia long ol man ya we oli stap wok slef* long ples ya, nao vison ya i lus.

25Nao olgeta samting ya we Hae God i soemaot long mi long vison ya, mi mi talemaot long olgeta.