Jeremaea 48 - Bislama Bible Revised 2012

Ol enemi bambae oli spolem Moab

1-2

5Bambae oli wokbaot i go antap long Luhit,

mo oli stap krae.

Mo ol man we bambae oli kamdaon long ples blong yufala,

bambae oli harem noes blong olgeta ya

we oli krae we i krae.

6Ol pikinini ya bambae oli talem se,

“Yumi resis kwik,

yumi ronwe blong yumi no ded.

Yumi mas resis strong

olsem wael dongki blong draeples.”

7“ ‘Ol man Moab.

Oltaem yufala i stap trastem

ol strong ples blong haed blong yufala,

wetem ol gudgudfala samting we yufala i gat.

Be bambae i no longtaem

ol enemi oli winim yufala tu,

oli tekemaot yufala

wetem ol haeman blong yufala,

mo Kemos, god ya blong yufala, wetem ol pris blong hem,

oli karem yufala evriwan

i go wok slef* long narafala kantri.

8Bambae ol enemi blong yufala

oli kam spolemgud olgeta taon blong yufala,

mo bambae i no gat wan taon

we trabol ya bambae i no kasem hem.

Ol bigfala levelples antap long hil,

mo ol krik,

bambae olgeta evriwan oli kam nogud.

Mi mi Hae God,

mo hemia tok blong mi.

9“ ‘Ol enemi blong ol man Moab.

Yufala i mas stanemap wan ston

we bambae i memori blong olgeta,

from we bambae i no longtaem

yufala i flatemgud ples ya.

Ol taon blong hem

bambae oli kam nogud olgeta,

we bambae i no moa gat man

i stap long olgeta bakegen.

10Man we i no mekem wok blong mi

long olgeta tingting blong hem,

trabol bambae i kasem hem.

Mo man we i no wantem yusum naef blong faet blong hem

blong kilim ol man ya i ded,

trabol bambae i kasem hem tu.

Mi mi Hae God,

mo hemia tok blong mi.’ ”

Ol enemi bambae oli spolem ol taon long Moab

11Mo bakegen, Profet Jeremaea i talemaot we Hae God i talem se, “Ol man Moab. I stat bifo olgeta, kam kasem tede, oltaem kantri ya blong yufala i stap gud, we i no gat trabol i kasem yufala. Neva ol enemi oli kam tekemaot yufala, blong yufala i go wok slef* long narafala kantri. Yufala i stap gud nomo, olsem waen we i stap gud long botel blong hem, we i no gat man i tajem, mo oli no stap jenjenisim botel blong hem. Tes blong hem i no kam nogud samtaem, oltaem i stap gud nomo.

12“Be naoia, taem i stap kam we bambae mi sanem ol enemi oli kam blong spolem yufala, olsem we man i kafsaedem gudfala waen ya, mo i brebrekem ol botel blong hem long ol smosmol pis.

13Nao bambae yufala i sem bigwan from god ya blong yufala, Kemos, olsem we bifo ol man Isrel* oli sem from Betel, narafala god ya blong olgeta, we oli bin trastem hem.

14“Ol man Moab.

?From wanem yufala i stap talem se,

‘Mifala i jampion blong faet,

mo mifala i soldia we mifala i no save fraet’?

15Be i no longtaem,

ol enemi blong yufala

bambae oli kam spolem ol taon blong yufala,

mo ol nambawan yang man blong yufala

bambae oli ded evriwan.

Mi mi Hae God, mi gat olgeta paoa,

mo mi mi King,

mo hemia tok blong mi.

16“I no longtaem,

bambae bigfala trabol i kam kasem yufala.

Naoia nomo, bambae ol enemi blong yufala

oli kam flatemgud yufala.

17Ol kantri raonabaot.

Yufala i stap tinghae long kantri ya Moab,

be i gud yufala i stap krae

from ol man blong hem.

I gud yufala i stap talem se,

‘Naoia bigfala paoa blong hem blong rul

i foldaon finis.

Hae nem blong hem i no moa gat.’

18“Ol man Dibon

Yufala i stap sidaon long ol hae ples,

blong ol man oli ona long yufala,

be yufala i mas kamdaon,

yufala i mas sidaon long asis blong graon.

Ol enemi blong kilim yufala

bambae oli kamtru long taon blong yufala,

mo bambae oli spolem

ol strong ples blong haed blong yufala.

19Ol man Aroere

Yufala i mas go stanap long rod,

yufala i wet.

Nao olgeta we bambae oli ronwe,

oli pas long rod ya,

yufala i mas askem long olgeta se,

‘!Ei! ?Olsem wanem?’

20Nao bambae oli talem se,

‘!O, kantri blong yumi i foldaon finis!

!Yumi mas sem from!

!Yumi mas harem nogud!

!Yumi mas krae bigwan!

Yumi mas go talemaot long olgeta

we oli stap olbaot long Anon Reva,

we ol enemi oli spolem kantri blong yumi finis.’ ”

21Mo profet i gohed, i talemaot we Hae God i talem se, “Olgeta taon blong yufala long levelples antap long hil, mi bambae mi panisim olgeta. Ol taon ya, i gat Holon, mo Jaja, mo Mefahat,

22mo Dibon, mo Neboho, mo Betiblataem,

23mo Kiriataem, mo Betgamul, mo Betmeon,

24mo Keriot mo Bojeraha. Mo ol narafala taon blong yufala tu, olgeta evriwan bambae oli kasem panis. Hemia olgeta we oli stap longwe mo olgeta we oli stap klosap.

25Ol enemi bambae oli flatemgud kantri blong yufala, mo bambae hem i no moa gat paoa, from we mi bambae mi spolemgud hem. Mi mi Hae God, mo hemia tok blong mi.”

Hae God bambae i daonem tingting blong ol man Moab

26Mo Profet Jeremaea i gohed, i talemaot we Hae God i talem se, “Ol enemi. Yufala i mas spolem ol man Moab gogo, oli harem olsem we oli fuldrong, from we oltaem oli flas tumas, oli stap girap agens long mi. Bambae oli harem nogud, oli traot gogo, oli foldaon long ol traot blong olgeta bakegen, mo ol man bambae oli laf nogud long olgeta.

27Ol man Moab. ?Ating yufala i fogetem finis we bifo, yufala i stap laf nogud long ol laen* blong Isrel*? Long taem ya, yufala i stap jikim olgeta, olsem we olgeta oli stap miksap wetem ol man blong stil.

28“Yufala i mas aot long ol taon blong yufala, yufala i go mekem ples blong yufala long klif, long ol hol blong ston. Yufala i mas mekem ples blong yufala long ol saed blong hil we i stip we i stip, olsem pijin ya we i stap mekem nes blong hem long ples olsem.

29“Yufala i praod tumas. Oltaem mi stap harem nius we yufala i stap leftemap yufala tumas, yufala i stap flas, mo yufala i stap tinghae long yufala, nao yufala i no gat sore long narafala man.

30Mi mi savegud we yufala i tok flas tumas, mo yufala i stap bigmaot blong nating nomo, ol wok blong yufala i no save stanap.

31Nao from samting ya, mi mi harem nogud, mo bambae mi krae from ol man blong taon ya Kireres wetem ol narafala man blong kantri ya blong yufala.

32Bambae mi krae from ol man blong taon ya Sibma, i winim we mi krae from ol man blong taon ya Jasere. Sibma, yu yu wan taon we yu olsem rop blong grep* we ol han blong hem oli gru longlongwan, we sam oli gokros long Ded Si, mo sam oli go kasem Jasere. Be ol enemi bambae oli kam spolem ol gudgudfala frut blong yu, wetem ol waen blong yu.

33Ol man Moab. Graon blong yufala i nambawan, be bambae i no moa gat man i stap, blong harem gud long garen blong hem. Mi bambae mi mekem yufala i no moa harem gud, yufala i no moa glad. Bambae mi mekem we yufala i no moa gat waen, mo we i no moa gat wan long yufala i stap wokem waen bakegen, we i harem gud, i stap singsingaot from.

34“Ol man Hesbon mo ol man Eleale bambae oli krae bigwan, nao ol man Jahaj we oli stap longwe, be bambae oli save harem olgeta. Mo ol man Joa wetem ol man Horonaem, mo ol man Eglatselisia we ol ples blong olgeta i longlongwe, be olgeta tu bambae oli save harem olgeta. Mo krik ya Nimrim tu, bambae i kam drae olgeta.

35Mi bambae mi blokem yufala, blong yufala i no moa mekem sakrefaes long ples blong mekem wosip blong yufala, mo blong yufala i no moa save bonem insens* long ol god ya blong yufala. Mi mi Hae God, mo hemia tok blong mi.

36“Mi bambae mi harem nogud tumas from yufala, wetem ol man blong taon ya Kireres, olsem man we i harem nogud, i stap blu long bambu paep, mo i stap sing long singsing blong dedman. Mi harem nogud from we bambae yufala i lusum olgeta gudgudfala samting blong yufala.

37Long taem ya, bambae yufala i pulum resa long hed blong yufala, mo yufala i sevem mustas blong yufala. Bambae yufala i katkatem han blong yufala, mo yufala i stap werem ol rabis klos. Bambae yufala i mekem ol samting ya, blong soemaot we yufala i harem nogud tumas.

38Olbaot long kantri blong yufala, long ol haos blong yufala mo long ol open ples, bambae yufala i stap krae nomo. Bambae yufala i krae from we bambae mi spolem kantri ya, mi brebrekem hem olsem graonpot we man i no moa wantem, nao i brebrekem.

39Bambae yufala i harem nogud tumas, yufala i stap krae bigwan. Bambae yufala i sem tumas, mo ol kantri we oli stap raonabaot long yufala, bambae oli stap laf nogud long yufala, be bambae oli stap fraet se ol samting ya bambae i kasem olgeta tu. Mi mi Hae God, mo hemia tok blong mi.”

Moab bambae i no save ronwe long panis blong hem

40Nao Profet Jeremaea i talemaot we Hae God i talem se, “Ol man Moab. I no longtaem, ol enemi bambae oli kam kwiktaem nomo, oli holem yufala, olsem bigfala pijin ya igel* we i stap flae antap, nao i sut i kamdaon wantaem nomo blong holem kakae blong hem.

41Bambae olgeta ya oli kam winim ol taon blong yufala, mo oli holem ol strong ples blong haed blong yufala. Long dei ya, ol soldia blong yufala bambae oli harem nogud, oli fraet, olsem woman we klosap pikinini blong hem i bon.

42Bambae olgeta oli spolem kantri blong yufala, nao bambae yufala i no moa save stap long hem bakegen, from we oltaem, yufala i stap girap agens long mi.

43Bambae yufala i fraet tumas long ol enemi ya. Ol hol wetem ol trap oli stap rere finis blong kasem yufala.

44Man we i traem blong ronwe from we i fraet tumas, bambae i foldaon long hol. Mo man we i traem blong kamaot long hol ya blong ronwe, bambae i fas long trap. Bambae ol samting ya i kamtru olsem, from we mi mi makem taem ya finis we bambae mi spolem kantri ya blong yufala. Mi mi Hae God, mo hemia tok blong mi.

45“Sipos yufala i traem ronwe, bambae i no gat man i save givhan long yufala. Sipos yufala i ronwe i go haed long taon ya Hesbon, ples ya we King Sihon i rul long hem bifo, be faea bambae i bonem taon ya. Yufala i laekem faet tumas, be ol hil blong yufala, mo ol mak blong kantri blong yufala, faea ya bambae i bonem olgeta evriwan.

46“!Ol man Moab! !Sore tumas long yufala! Yufala we i stap mekem wosip long god ya Kemos, mi bambae mi spolem yufala evriwan. Ol enemi bambae oli kam karemaot ol boe wetem ol gel blong yufala, oli go wok slef* long narafala kantri.

47Olgeta samting ya nao bambae i kam kasem kantri ya blong yufala, be i gat taem i stap kam, we mi bambae mi mekem kantri ya i kam gud bakegen. Mi mi Hae God, mo hemia tok blong mi.”