Ol Krae 1 - Bislama Bible Revised 2012

Jerusalem i harem nogud tumas

1Taon ya Jerusalem*

we fastaem i fulap gud long ol man,

naoia i no gat man nating long hem,

mo hem i harem nogud tumas from.

Fastaem olgeta man long wol oli stap ona long hem,

be naoia hem i stap hem wan,

olsem wan woman we man blong hem i ded.

Taon ya we fastaem i gud moa

i winim ol narafala taon,

naoia hem i kam slef* finis.

2Oltaem long naet

hem i stap krae gogo kasem delaet,

we wota blong ae blong hem

i stap ron bigwan.

Ol fren blong hem oli giaman gud long hem,

nao oli kam enemi blong hem.

I no moa gat wan long olgeta i stap

blong givhan long hem.

3Ol enemi oli ronemaot ol man Juda*

i gowe long hom blong olgeta.

Naoia oli kam slef,

oli stap long ol narafala kantri.

I no gat wan ples we oli save talem

se i ples blong olgeta.

Mo ol enemi oli blokemgud olgeta,

nao oli no save ronwe.

4Naoia i no moa gat man

i save kam long haos* blong Hae God

long ol tabu dei ya

blong mekem wosip long hem.

Ol gel we fastaem oli stap sing long haos ya,

naoia oli stap harem nogud nomo,

mo ol pris tu oli harem nogud

oli stap krae.

I no moa gat man nating i stap

long ol doa* blong stonwol blong taon ya,

mo hil ya Saeon* i stap harem nogud tumas.

5Ol enemi blong hem oli winim hem

nao hem i stap long han blong olgeta.

Hae God nao i mekem hem i harem nogud

from we sin blong hem i plante we plante.

Ol enemi oli holem ol man blong hem

oli tekemaot olgeta

oli go wok slef longwe.

6Taon ya Jerusalem,

fastaem i flas gud,

be naoia i nogud we i nogud.

Ol lida blong hem

oli olsem anamol we i hanggri tumas

nao i slak from,

mo taem man i stap ronem hem

be hem i stap ronwe

we i no gat paoa nating.

7Naoia we Jerusalem i harem nogud,

mo ol man blong hem

oli no moa gat ples blong olgeta,

hem i stap tingbaot

laef ya blong hem bifo we i flas gud.

Taem ol enemi oli winim hem,

i no gat man nating i stap

blong givhan long hem.

Olgeta ya we oli winim hem,

oli stap laf long hem

from we hem i lus.

8Jerusalem ya,

hem nomo i mekem hem i kam doti

long ol sin blong hem we i nogud tumas.

Hem i stap neked nomo,

nao ol man oli no moa ona long hem,

oli stap lukluk rabis long hem.

Hem i harem nogud i stap krae,

mo i haedem fes blong hem

from we i sem tumas.

9Bifo ol enemi oli stap luk sin blong hem,

be hem i no wari nating

se bambae hem i ded from ol sin ya.

Be naoia ol enemi blong hem

oli daonemgud hem,

mo i no gat man i save mekem

tingting blong hem i kam gud bakegen.

Ol enemi blong hem oli winim hem,

nao hem i stap krae long Hae God

blong i sore long hem.

10Hae God i bin talem

se i tabu blong ol man afsaed

oli go long haos blong hem

long ples ya we ol laen* blong Isrel*

oli stap go long hem blong mekem wosip.

Be ol man Jerusalem oli luk

we ol enemi blong olgeta oli go moa,

oli go insaed long haos ya

oli stilim ol gudgudfala samting blong hem.

11Oltaem ol man Jerusalem oli harem nogud,

oli stap krae,

from we oli trabol tumas

blong kasem kakae blong olgeta.

Oli stap yusum ol gudgudfala samting blong olgeta

blong pem kakae blong olgeta long hem

blong oli save stap laef.

Taon ya i stap krae, i talem se,

“!Hae God,

mi mi stap harem nogud tumas!

!Plis yu lukluk i kam long mi!”

12Hem i stap krae, i talem long olgeta

we oli stap pas klosap long hem se,

“Yufala i luk.

Mi mi stap harem nogud tumas,

i no gat narafala man i harem nogud olsem mi.

Hae God i kros long mi,

nao i mekem mi mi stap harem nogud olsem.

13“Hem i stap long ples blong hem antap,

i sanem faea i kam,

mo faea ya i stap bon insaed long mi.

Hem i putum wan trap blong kasem mi,

i mekem mi mi foldaon,

nao hem i lego mi,

i livim mi mi stap,

we mi stap harem nogud oltaem nomo.

14“Masta* blong mi,

hem i stap makem ol sin blong mi,

mo i putum olgeta i stap wanples.

Olgeta oli olsem hevi samting

we hem i putum long solda blong mi,

nao i mekem mi mi slak we mi slak.

Hem i putum mi long han blong ol enemi blong mi

we mi mi no gat paoa nating,

blong faet agens long olgeta.

15“Hae God i laf nogud

long ol nambawan soldia blong mi.

Hem i sanem ol enemi i kam

blong spolem ol yang man ya blong mi.

Mo hem i smasem olgeta man blong mi

olsem we man i stap purumpurumbut

long ol grep*

blong wokem waen long wota blong hem.

16“Taswe mi mi stap krae tumas,

from we ol man we oli save leftemap tingting blong mi

blong mekem mi mi harem gud bakegen,

oli go stap longwe long mi.

Ol enemi ya oli winim mi,

nao ol man blong mi

oli no moa gat wan samting i stap.

17“Mi stap pusumaot han blong mi

blong man i halpem mi,

be i no gat man i wantem givhan long mi.

Hae God i sanem ol enemi ya,

oli kam long evri saed,

oli agens long mi,

mo oli mekem long mi

olsem we mi mi wan samting

we i doti tumas.

18“Be Hae God hem i stret olgeta.

Mi nomo mi no stap obei long tok blong hem.

!Ol man blong ol narafala kantri!

!Plis yufala i lesin long mi!

Mi mi stap harem nogud tumas.

Yufala i luk i kam long mi.

Ol yang boe blong mi

mo ol yang gel blong mi,

ol enemi oli tekemaot olgeta finis

oli go wok slef long narafala kantri.

19“Mi singaot i go long ol kantri

we oli fren blong mi

be oli no wantem kam givhan long mi.

Nao ol pris mo ol lida blong mi,

oli stap lukaot kakae blong olgeta

be oli no save faenem,

nao oli stap ded long hanggri

olbaot long taon.

20“Hae God, yu luk.

Mi mi harem nogud tumas,

mo tingting blong mi i trabol olgeta.

Mi sore we mi sore tumas,

from we mi girap agens long yu.

Insaed long haos,

ol man blong mi oli stap ded,

mo afsaed, sam long olgeta,

ol enemi oli stap kilim olgeta oli ded.

21“Plis yu lesin long krae blong mi,

i no gat man i stap blong givhan long mi.

Ol enemi blong mi

oli harem we mi mi stap harem nogud,

nao oli glad tumas

from we yu yu sanem trabol ya i kam long mi.

Dei ya we yu bin talemaot,

plis yu mekem i kamtru.

Yu mekem ol enemi blong mi

oli harem nogud olsem mi.

22“Plis yu luk sin blong olgeta,

mo yu panisim olgeta

olsem we yu panisim mi from ol sin blong mi.

Mi mi harem nogud tumas,

nao mi krae we mi krae.”