Hosea 14 - Bislama Bible Revised 2012

Profet Hosea i singaot ol man Isrel blong oli kambak long Hae God

1Nao Profet Hosea i talem long ol man Isrel* se, “Olgeta. Hae God i God blong yumi, mo yufala i mas kambak long hem. Ol sin blong yufala i plante tumas, i mekem yufala i stambol, yufala i foldaon.

2Yufala i mas tanem tingting blong yufala, blong kambak long hem bakegen. Yufala i mas kam prea long hem, yufala i mas talem se, ‘Hae God. Plis yu fogivim mifala, yu tekemaot ol sin blong mifala, mo yu lesin long prea blong mifala, nao bambae mifala i stap presem yu bakegen, olsem we mifala i promes bifo.

3Ol man Asiria bambae oli no save sevem mifala, mo ol hos blong faet blong mifala neva bambae oli save blokem mifala long taem blong faet. Neva bambae mifala i save singaot ol narafala god ya bakegen, se oli god blong mifala. Hae God, i no moa gat narafala man blong givhan long mifala. Plis yu soemaot we yu yu gat sore long mifala.’ ”

Hae God i promes se bambae i givhan long olgeta

4Nao Profet Hosea i talemaot we Hae God i talem se,

“Ol man Isrel.*

Naoia mi mi no moa kros long yufala.

Bambae mi tekem yufala

i kambak long mi bakegen,

nao bambae mi lavem yufala

long olgeta tingting blong mi.

5Bambae mi mekem i gud long yufala,

olsem we ren i foldaon

long graon we i drae,

i mekem i kam gud bakegen.

Bambae yufala i olsem tri

we i karem ol gudgudfala flaoa blong hem.

Bambae yufala i stanap strong

olsem ol sida* blong Lebanon,

we rus blong olgeta i godaon olgeta.

6Bambae laef blong yufala

i kam niuwan bakegen,

i olsem bigfala tri ya olif*

we i gat ol niufala lif blong hem.

Bambae yufala i gat gudfala laef,

we ol man oli harem gud long hem,

olsem we oli save harem smel blong sida blong Lebanon

we i naes we i naes.

7Bambae yufala i stap bakegen

aninit long han blong mi,

mo mi bambae mi lukaot gud long yufala.

Bambae yufala i olsem garen

we i stap karem plante kakae.

Bambae yufala i olsem plantesen blong grep,*

we i stap karem fulap frut long hem.

Nem blong yufala

bambae i go kasem evri ples,

olsem nem blong waen blong Lebanon.

8Long taem ya,

bambae yufala i no moa save mekem wosip

long ol narafala god bakegen.

Taem yufala i prea long mi,

mi bambae mi harem prea blong yufala,

mo mi bambae mi lukaot long yufala.

Bambae mi olsem wan gudfala tri

we lif blong hem i no save foldaon,

we yufala bambae i save kam haed

long gudfala sed blong hem.

Olgeta gudgudfala samting

we bambae yufala i kasem,

mi nomo bambae mi stamba blong olgeta.”

Lastok

9Nao Profet Hosea i talem se, “Olgeta we oli waes oli mas savegud ol tok ya we mi mi talem, mo oli mas holem i stap gud long tingting blong olgeta. Olgeta fasin blong Hae God i stret gud olgeta, mo oltaem, ol stret man oli stap longtaem, from we oli stap folem ol fasin ya. Be ol man nogud oli stambol, mo oli foldaon, from we oli no save tinghevi long olgeta.”