Sam 12 - Bislama Bible Revised 2012

Prea we man i mekem blong God i givhan long hem(Sing ya, Deved i wokem. Hemia i blong sing wetem mandolin.)(Tok i go long Hae God.)

1Hae God.

Plis yu givhan long mifala.

Naoia i no moa gat wan gudfala man i stap,

olgeta stret man oli lus,

yu no moa save faenem wan.

2Ol man oli stap giagiaman

long olgeta bakegen.

Olgeta wanwan oli stap giagiaman

long ol fren blong olgeta,

long ol swit toktok blong olgeta.

3Hae God,

plis yu blokem ol swit toktok ya.

Yu satem maot blong olgeta ya

we oli stap tok flas,

oli stap talem se,

4“Mifala i stap kasem ol samting

we mifala i wantem,

long ol toktok blong mifala nomo.

Mifala bambae i talem ol samting

we mifala i wantem talem,

mo i no gat man i save blokem mifala.”

(Tok i go long ol man.)

5Be Hae God i talem se,

“Naoia bambae mi mi kam,

from we ol man nogud ya

oli stap spolem ol puaman,

oli stap mekem olgeta oli harem nogud,

oli stap krae.

Ol puaman ya oli wantem tumas

blong oli stap sef, oli harem gud,

mo mi bambae mi sevem olgeta.”

(Tok i go long Hae God.)

6Hae God.

Man i save trastem ol promes* blong yu.

Ol promes ya oli stret mo oli tru,

olsem silva we oli bonem seven taem long faea

blong mekem i klin we i klin gud.

7-8Ol man nogud oli stap olbaot long olgeta ples,

oli stap leftemap ol fasin we i nogud.

Hae God,

plis yu lukaot long mifala oltaem,

yu blokem ol man ya blong oli no kam spolem mifala,

yu seven mifala.