Aesea 60 - Bislama Bible Revised 2012

Ol gudgudfala samting we taon ya Jerusalem bambae i kasem

1Nao profet i talemaot long ol man blong hem we Hae God i talem se,

“Ol man Jerusalem.*

!Yufala i girap!

!Naoia i taem blong taon ya blong yufala

i saen olsem san!

!Mi mi Hae God,

mo bigfala laet

we i soemaot we mi mi stap,

bambae i saen i kam long hem!

2Ol man blong olgeta ples long wol,

tudak i kavremap olgeta,

be long taon ya,

bigfala laet ya bambae i saen,

from we mi bambae mi stap long ples ya,

mo laet ya i soemaot samting ya.

3Ol man blong ol narafala kantri

bambae oli luk laet ya,

nao bambae oli kam long taon ya from,

mo ol king blong olgeta bambae oli luk

we yufala i kam long niufala dei,

nao bambae oli kam long taon ya blong luk.

4“!Yufala i luklukraon!

!Yufala i luk ol samting

we oli stap kamtru!

Ol man blong yufala oli stap hivap

blong kamhom bakegen.

Ol pikinini boe blong yufala

bambae oli aot long ol ples longwe,

oli kambak.

Mo ol dota blong yufala,

bambae ol man oli karem olgeta i kam,

olsem we oli smol pikinini nomo.

5Taem yufala i luk ol samting ya,

bambae yufala i harem gud tumas.

Bambae yufala i glad we i glad,

we yufala i jamjam from.

Ol gudgudfala samting blong ol narafala kantri,

olgeta ya bambae oli karem i kam

blong givim long yufala.

Ol gudgudfala samting

we praes blong olgeta i hae tumas,

bambae oli tekem long narasaed solwota,

oli karem i kam long ples ya.

6“Bambae ol bigfala grup blong ol man

oli aot long Midian mo Efaha,

oli wokbaot long ol kamel,*

oli kam long ples ya.

Bambae ol grup olsem oli aot long Seba,

oli karem gol mo insens* i kam.

Ol man bambae oli stap talemaot se,

‘!Ol fasin ya we Hae God i mekem,

oli gud tumas!’

7Bambae ol man oli tekem ol sipsip

blong tufala ples ya Kedara mo Nebaeot,

from we oli beswan,

oli karem i kam long ples ya

blong mekem sakrefaes long olgeta.

Bambae oli mekem ol sakrefaes long olta blong mi,

nao mi bambae mi glad long olgeta,

mo mi bambae mi kam mekem

haos* blong mi i gud moa,

i winim fastaem.

8“Bambae yufala i save talem se,

‘?Ol sip ya we oli stap spid i kam

olsem ol klaod we win i stap blu long olgeta i go,

no olsem ol sotleg*

we oli stap flae i kambak long haos blong olgeta,

oli stap kam blong mekem wanem?’

9Nao bambae mi mi talem long yufala,

se hemia ol sip we oli aot

long ol narafala kantri we i longwe,

oli stap karem ol man ples blong yufala i kamhom,

mo ol sip blong Spen

oli stap lidim olgeta i kam.

Mi mi Hae God,

mi God blong yufala.

Mi mi tabu we mi tabu,

fasin blong mi i stret olgeta,

mo mi mi mekem ol man blong ol narafala kantri

oli ona long yufala.

Ol man ya blong yufala

oli stap karem silva mo gol i kam

blong givim long mi blong ona long mi.

10“Ol man blong ol narafala kantri

bambae oli stanemap bigfala stonwol blong taon ya,

mo ol king blong olgeta bambae oli kam,

oli wok blong yufala.

Fastaem,

mi mi kros tumas long yufala,

nao mi panisim yufala,

be naoia,

long gladhat blong mi,

mi mi gat sore long yufala.

11 Rev 21.25,26 Long dei mo long naet,

ol doa* blong bigfala stonwol blong taon ya

bambae oli open i stap,

blong ol king blong ol narafala kantri

oli save lidim ol man blong olgeta,

blong karem ol gudgudfala samting i kam

blong givim long yufala.

12Be ol kantri

we ol man blong olgeta oli no kam

blong wok blong yufala,

bambae mi mi spolemgud olgeta.

13“Ol man bambae oli karem ol nambawan wud

blong kantri ya Lebanon i kam,

blong stanemap Jerusalem bakegen,

mo blong mekem haos blong mi i naes we i naes.

Bambae oli karem ol wud ya,

paentri,* mo junipa,* mo saepras,*

blong mekem taon ya blong mi i nambawan.

14 Rev 3.9 Nao ol pikinini blong ol man ya

we oli bin spolem yufala tumas,

mo oli bin mekem yufala i stap daon olgeta,

bambae oli kam long ples ya,

oli bodaon kasem graon

blong oli ona long yufala.

Olgeta ya we fastaem

oli stap lukluk nogud long yufala,

oli stap ting rabis long yufala,

bambae oli kam nildaon long fes blong yufala

blong soemaot we oli tinghevi long yufala.

Bambae oli talem long yufala se,

‘Tru, taon ya i taon blong Hae God.

Saeon* ya, hem i taon blong God blong yufala.

God ya blong yufala,

hem i tabu we i tabu,

fasin blong hem i stret olgeta.’ ”

15Mo profet i gohed, i talemaot we Hae God i talem se,

“Olgeta.

Bambae yufala i no moa save stap yufala nomo,

we ol man oli no laekem yufala,

oli stap agens long yufala.

Mo taon ya blong yufala

bambae i no moa save stap nating,

we i no gat man long hem.

Mi bambae mi mekem taon ya i naes we i naes,

we bambae i stap mekem ol man oli glad,

gogo i no save finis.

16Ol man blong ol narafala kantri

wetem ol king blong olgeta

bambae oli lukaot gud long yufala,

olsem wan mama we i stap lukaot gud

long bebi blong hem,

i stap givim titi long hem.

Nao long taem ya,

bambae yufala i save we mi mi Hae God,

mi nao mi God blong paoa,

mo mi God blong yufala,

we oltaem mi stap sevem yufala, mi stap mekem yufala i fri.

17“Fastaem yufala i stap yusum bras

blong wokem ol samting,

be bambae mi mi givim gol long yufala.

Fastaem yufala i stap yusum aean mo wud,

be bambae mi mi givim silva mo bras long yufala.

Fastaem yufala i stap yusum ston,

be bambae mi mi givim aean long yufala.

Bambae ol haeman mo ol lida

oli no moa save mekem i strong long yufala.

Mi bambae mi mekem

we pis mo stret fasin,

tufala i rul long yufala.

18Noes blong faet

bambae i no moa save kamaot

long kantri blong yufala.

Bambae ol enemi oli no moa save kam

blong spolem ples blong yufala.

Bambae mi mi lukaot gud long yufala,

mi blokemgud yufala

olsem wan bigfala stonwol we i goraon long yufala.

Mo long taem ya,

bambae yufala i save presem mi,

from we mi mi sevem yufala.

19 Rev 21.23; 22.5 “Bambae i no moa gat san

blong givim laet long yufala long dei,

mo bambae i no moa gat mun,

blong givim laet long yufala long naet.

Mi mi Hae God,

mi nomo bambae mi laet blong yufala,

gogo i no save finis.

Bigfala laet ya we i soemaot we mi mi stap,

bambae i saen i kam long yufala olwe.

20Mi mi olsem san mo mun blong yufala,

be neva bambae mi godaon samtaem.

Mi mi Hae God,

mo mi bambae mi laet blong yufala,

gogo i no save finis.

Naoia yufala i stap harem nogud,

yufala i stap krae,

be hadtaem ya bambae i finis.

21Bambae yufala evriwan i stap mekem

ol fasin we i stret,

mo bambae yufala i stap long kantri blong yufala,

gogo i no save finis.

Mi mi mekem yufala,

mo yufala i olsem wan tri

we mi planem long ples ya,

blong mi save soemaot long olgeta man,

we mi mi gat olgeta paoa.

22Ol famle long yufala we oli smol moa,

mo oli daon moa long ol narafala famle,

be olgeta we bambae oli kamaot

biaen long ol famle olsem,

bambae oli olsem ol man blong kantri

we i strong we i strong,

we ol man blong hem oli plante tumas.

Long stret taem blong hem,

bambae mi mi mekem samting ya

i kamtru kwiktaem nomo.

Mi mi Hae God,

mo hemia tok blong mi.”