Jeremaea 43 - Bislama Bible Revised 2012

Johanan olgeta oli tekem Profet Jeremaea i go long Ijip

1Nao taem Profet Jeremaea i talemaot evri samting we Hae God we i God blong yumi i bin sanem hem blong i kam talemaot long olgeta,

2Asaria, mo Johanan mo ol narafala stronghed we oli stap long ples ya, oli talem long hem se, “Profet. Yu yu stap giaman ya. Hae God i no sanem yu, blong yu kam talem ol toktok ya, blong blokem yumi blong yumi no go stap long Ijip.

3Baruk ya we papa blong hem Neria, hem nomo i toktok long yu blong mekem yu yu agensem tingting blong mifala olsem, blong bambae ol man Babilonia oli kam winim yumi, oli kilim yumi, no oli tekem yumi i go wok slef* long kantri blong olgeta.”

4Nao Johanan wetem ol kapten blong ol soldia ya, mo ol narafala man tu, i no gat wan long olgeta nating we i obei long tok blong Hae God, we i talem se bambae oli stap nomo long Juda.*

52 King 25.26Nao Johanan olgeta oli girap, oli tekem olgeta man we oli stap long Juda, oli aot, oli go long Ijip. Long olgeta ya, i gat ol man we bifo oli bin ronwe i go long ol naranarafala kantri, be oli kambak long Juda bakegen,

6wetem ol man we Nebusaradan, komanda blong ol soldia blong Babilonia i bin putum olgeta long han blong Gedalia. Hemia ol man, mo ol woman, mo ol pikinini, mo ol dota blong king, mo Profet Jeremaea mo Baruk tu, olgeta evriwan i go wetem olgeta.

7Olgeta ya oli no obei long ol tok blong Hae God, oli aot oli go long Ijip, mo oli kasem taon ya Tafanes.

Profet Jeremaea i talemaot we bambae King Nebukadnesa i kam mekem faet long Ijip

8Nao long Tafanes, Hae God i toktok long Profet Jeremaea, i talem se,

9“Jeremaea. Yu go karem ol bigbigfala ston i kam, yu berem olgeta long rod blong taon ya, long fored blong doa blong yad blong haos blong king blong Ijip, mo bambae yu yusum laem blong mekem ol ston ya oli fas strong. Olgeta samting ya, yu mas mekem long fes blong ol man Juda,* blong oli save luk.

10Nao yu talemaot long olgeta we mi mi talem se, ‘Mi mi Hae God, mi gat olgeta paoa, mo mi mi God blong yufala ol laen* blong Isrel.* Mo mi talem long yufala, se bambae mi tekem man ya blong wok blong mi, King Nebukadnesa blong Babilonia, i kam long ples ya, mo bambae mi mekem hem i putum bigfala jea blong hem antap long ol ston ya we mi talem long yu blong yu berem. Mo bambae hem i stanemap haos tapolen blong hem long sem ples antap long ol ston ya.

11Mo taem hem i kam, bambae hem i faet long Ijip, i winim ol man ples ya. Nao ol man we oli stap long ples ya, olgeta ya we mi makemaot se bambae oli ded long bigfala sik, bambae i mas olsem. Mo olgeta we mi makemaot se bambae oli go wok slef* long narafala kantri, bambae i mas olsem. Mo olgeta we mi makemaot se bambae oli ded long faet, bambae i mas olsem.

12King ya bambae i bonem ol haos wosip blong ol man Ijip, wetem ol god blong olgeta, mo samfala, bambae hem i karem olgeta i go long ples blong hem. Mo bambae hem i tektekemaot ol man ya, olsem we man blong lukaot long sipsip i stap tekemaot ol laos blong sipsip long klos blong hem. Nao bambae hem i aot long kantri ya bakegen, we i no gat man i faet agens long hem.

13Taem hem i stap yet long Ijip, bambae hem i spolem ol tabu ston we oli stap long taon ya Heliopolis, mo bambae i bonem ol haos blong ol god blong ol man Ijip long ples ya tu.’ ”