Hibrus Sotfala stori blong buk ya - Bislama Bible Revised 2012

Sotfala stori blong buk yaMan we i raetem leta ya, hem i raetem i go long wan grup blong ol Kristin man we oli stap fesem hadtaem long laef blong olgeta, from we ol man we oli no Kristin oli stap agens long olgeta. Fasin ya we ol man ya oli stap agens long olgeta tumas i mekem se olgeta oli faenem i had, mo klosap oli lego bilif blong olgeta long Jisas Kraes. Nao man ya i talem long olgeta se oli mas stanap strong long bilif ya blong olgeta. Hem i talem long olgeta se Jisas Kraes nomo hem i prapa man we i soemaot God long yumi. Mo blong soemaot samting ya, hem i tokbaot tri samting.Fas samting, Jisas hem i tru pikinini blong God, mo bambae hem i stap olwe gogo i no save finis. Mo nating we hem i Pikinini blong God, be hem i lanem mining blong fasin ya blong obei long God, long ol samting we oli mekem hem i harem nogud long bodi blong hem. Nao from we hem i Pikinini blong God, hem i hae moa long ol profet, mo long ol enjel, mo long Moses tu.Seken samting, God i talemaot finis se Jisas, hem i Hae Pris* we bambae i stap gogo i no save finis. Hem i Hae Pris we i hae moa long olgeta pris* blong bifo.Mo namba tri samting, long wok blong Jisas we hem i Hae Pris, hem i ded blong sevem olgeta man, i tekemaot ol sin blong olgeta, i mekem olgeta oli no moa fraet, mo i givim laef long olgeta we i no save finis. Olgeta sakrefaes blong bifo oli pija nomo blong prapa sakrefaes we Jisas Kraes i mekem.Long japta leven, man we i raetem leta ya, hem i tokbaot sam man long Oltesteman we oli bilif strong long God. Mo hem i talem long ol man we hem i raetem leta ya i go long olgeta, se i gud blong oli folem eksampol blong olgeta ya, blong oli save stanap strong oltaem. Mo long japta twelef, hem i talem long olgeta, se oli mas stanap strong long bilif blong olgeta, gogo kasen en blong laef blong olgeta. Mo oltaem, oli mas luk long Jisas, blong oli save gotru long ol hadtaem, we oli stap kasem long ol man we oli stap mekem i strong tumas long olgeta. Mo blong finisim tok blong hem, hem i toktok gud long ol man blong hem, mo i wonem olgeta blong oli mas lukaot gud long laef blong olgeta.Ol haf blong buk yaFastok: Kraes i soemaot God long yumi 1.1-3

Kraes i hae moa long ol enjel 1.4—2.18

Kraes i hae moa long Moses mo Josua 3.1—4.13

Kraes i hae moa long ol hae pris 4.14—7.28

Niufala promes i hae moa long olfala promes 8.1—9.28

Sakrefaes we Kraes i mekem i hae moalong ol sakrefaes blong bifo 10.1-31

Fasin blong bilif i nambawan 11.1—12.29

Ol toktok we i blong mekem ol man olistanap strong, mo lastok 13.1-25