Jajes 16 - Bislama Bible Revised 2012

Samson i stap long taon ya Gasa

1Nao wan dei, Samson i wokbaot, i go long taon ya Gasa, we i blong ol man Filistia. Long ples ya, hem i faenem wan woman blong rod, nao i go long haos blong hem, i slip wetem hem.

2Taem ol man Gasa oli harem we hem i stap long ples ya, oli kam raonem haos ya, mo oli stap wet tu long doa* blong bigfala stonwol blong taon ya blong kilim hem. Nao long naet ya, oli no mekem wan samting, oli stap kwaet nomo, oli stap wet long doa ya, from we oli stap taltalem long olgeta se, “Bambae yumi stap wet go kasem delaet, nao yumi kilim hem i ded.”

3Be Samson i stap slip kasem medel naet nomo, nao i girap, i kam holem bigfala doa blong stonwol blong taon ya, i pulumaot doa ya wetem ol pos blong hem, mo lok blong hem, mo ol narafala samting blong hem, nao i karem olgeta evriwan i go. Hem i karem i go antap long hil ya we yu save lukluk i godaon long taon ya Hebron.

Samson wetem Delila

4Biaen long ol samting ya, Samson i faenem wan woman, nem blong hem Delila, mo i laekem hem tumas. Woman ya, vilej blong hem i stap daon, klosap long Sorek Reva.

5Nao ol faef king blong ol man Filistia oli go luk woman ya, oli talem long hem se, “Mifala i wantem se bambae yu trikim Samson, blong hem i talemaot long yu ol samting ya we i stap mekem hem i strong tumas olsem. Yu mas faenemaot wan rod we mifala i save fasem hem blong mekem we hem i no moa save mekem wan samting. Sipos yu mekem olsem, bambae mifala wanwan i givim faef handred fifti taosen vatu* long yu.”

6Nao Delila i go talem long Samson se, “Plis, yu talem long mi. ?Wanem samting ya we i mekem yu yu strong tumas olsem? ?Sipos wan man i wantem fasem yu, bambae i fasem yu long wanem samting, blong yu yu no moa save mekem wan samting?”

7Mo Samson i talem se, “Sipos oli fasem mi long seven rop blong bonara we oli niuwan nomo, bambae mi mi no moa save mekem wan samting, mi olsem ol narafala man nomo.”

8Taem ol king ya oli harem tok ya, oli tekem seven rop olsem i kam long Delila, nao hem i fasem Samson long hem.

9Be fastaem, hem i bin putum sam man oli stap haedrere finis long wan rum, nao i singaot hem se, “!Samson! !Yu girap! !Ol man Filistia oli kam!” Nao Samson i girap, i brekem ol string ya wantaem nomo, olsem string we faea i kakae. Nao olgeta oli no save yet wanem samting i stap mekem hem i kam strong tumas olsem.

10Nao Delila i talem long hem se, “Man, yu yu stap spolem mi nomo, yu stap giamangud long mi. Plis yu talem tru long mi. ?Sipos wan man i wantem fasemtaet yu, bambae i mekem olsem wanem?”

11Mo Samson i talem se, “Sipos oli fasem mi long ol rop we oli niuwan nomo, bambae mi no moa save mekem wan samting, mi stap olsem ol narafala man nomo.”

12Ale, Delila i tekem ol rop olsem, mo i kam fasemtaet Samson long hem, nao i singaot hem se, “!Samson! !Yu girap! !Ol man Filistia oli kam!” Ol man ya oli stap haedrere long narafala rum, be Samson i girap, i brekemaot ol rop ya long han blong hem wantaem nomo, we oli brobrok olsem wan pis tred nomo.

13Nao Delila i talem long hem se, “Yu stap trikim mi yet ya. Yu stap giaman nomo long mi. Ol samting ya we yu talem oli no tru nating. Plis yu talem long mi. ?Sipos wan man i wantem fasemtaet yu, bambae i mekem olsem wanem?”

Mo Samson i talem se, “Mi mi tantanem ol hea blong mi long seven haf finis, mo sipos yu tekem olgeta, yu wivim long masin ya blong wivim kaliko, mo yu fasemtaet long wud blong masin ya, bambae mi kam olsem ol narafala man nomo.”

14Nao Delila i mekem Samson i slip, mo i mekem olsem we hem i talem, nao i singaot hem se, “!Samson! !Yu girap! !Ol man Filistia oli kam!” Nao hem i girap, mo wantaem nomo, i pulumaot frem ya blong wivim kaliko we hea blong hem i paspas long hem, nao i wokbaot wetem i go.

15Nao woman ya i talem long hem se, “?Olsem wanem? ?Ating yu stap giaman nomo se yu laekem mi? !Yu trikim mi tri taem finis! ?Wanem samting ya we i stap mekem yu yu strong tumas olsem? ?Weswe yu no save talemaot samting ya long mi?”

16Nao hem i stap askem long hem we evri dei i stap askem long hem plante taem, gogo Samson i taed gud long hem, from we i stap askem tumas olsem.

17Hem i stap mekem gogo, nao Samson i jes talemaot ful stori blong hem long hem. Hem i talem se, “Bifo, i stat long taem we mi mi bon, be oli no katem hea blong mi samtaem, mo mi mi stap, mi man blong God we mi wan Nasiraet.* Sipos oli katem hea blong mi naoia, bambae mi no moa strong, mi kam olsem ol narafala man nomo.”

18Nao Delila i save we samting ya we Samson i talem i tru, nao i sanem tok i go long ol king ya se, “Yufala i kam wan taem moa bakegen. Naoia, hem i jes talemaot wan samting long mi we i tru.” Nao oli kam, mo oli karem mane tu i kam wetem olgeta.

19Delila i mekem Samson i pilo long leg blong hem, gogo i slip ded. Nao taem hem i stap slip olsem, woman ya i singaot wan man i kam, nao man ya i katemaot ol seven longfala bandel hea ya blong hem. Nao woman ya i jikim hem, from we hem i no moa strong.

20Hem i singaot bigwan long hem se, “!Samson! !Yu girap! !Ol man Filistia oli kam!” Nao Samson i wekap, mo i ting se bambae i oraet nomo, i save go fri olsem we i stap mekem oltaem. Be hem i no save we Hae God i gowe long hem finis.

21Nao ol man Filistia oli kam holem hem, mo oli tekemaot tufala ae blong hem. Oli fasem hem long ol bigbigfala jen we oli wokem long bras, nao oli tekem hem i go long Gasa, oli putum hem long kalabus. Oli putum wok blong hem blong i stap tanem bigfala ston blong granem wit.*

22Be taem hem i stap long ples ya, hea blong hem i stap gru bakegen.

Samson i ded

23Nao ol faef king ya blong ol man Filistia oli kam wanples blong mekem lafet, mo oli mekem bigfala sakrefaes long god ya blong olgeta, we nem blong hem Dagon. Oli stap singsing se,

“!Naoia, god blong yumi

i mekem we yumi winim Samson,

enemi ya blong yumi!”

24-25Nao ol faef king ya oli stap harem gud tumas, mo oli talem long ol man blong olgeta se, “!Yufala i go tekemaot Samson long kalabus! !Yufala i tekem hem i kam, blong yumi stap mekem plei long hem, blong yumi save laf long hem!” Nao oli go tekem hem i kam, oli mekem hem i stanap long fes blong olgeta. Mo taem ol man oli luk hem, oli stap singsing blong presem god blong olgeta, oli talem se,

“God blong yumi i mekem

we yumi winim enemi ya blong

yumi,

we i stap spolem ol ples blong

yumi,

mo i stap kilim plante man blong yumi oli ded.”

Nao oli stap mekem plei long hem, oli stap laf long hem, mo biaen oli tekem hem i go stanap long medel blong ol pos blong haos ya.

26Be Samson i talem long boe ya we i stap lidim hem i go insaed se, “Mi wantem traem holem tu bigfala pos ya we tufala i holemtaet bigfala haos ya. Mi wantem lei long wan long tufala blong spel smol.”

27Haos ya i fulap gud long ol man mo ol woman, mo ol faef king ya tu oli stap wetem olgeta. Mo long ruf* blong haos ya, i gat samting olsem tri taosen man mo woman bakegen, we oli stap lukluk i kamdaon long Samson, oli stap mekem plei long hem, mo oli stap laf long hem.

28Nao Samson i prea, i talem se, “Hae God, yu yu Masta* blong mi. Plis mi wantem blong yu yu tingbaot mi bakegen. God, plis yu mekem mi mi kam strong bakegen wan taem moa. Ol man Filistia ya oli tekemaot tufala ae blong mi, mo mi wantem givimbak samting ya long olgeta.”

29Nao hem i stretem han blong hem lelebet blong holem tufala pos ya we i holemtaet bigfala haos ya, nao i pusum tufala i go,

30mo i singaot bigwan, i talem se, “!Hae God, yu letem mi mi ded wetem ol man Filistia ya.!” Nao hem i yusum olgeta paoa ya we hem i gat, i pusumaot tufala pos ya, nao bigfala haos ya i foldaon long ol faef king ya wetem olgeta man we oli stap insaed. Long taem ya we Samson i ded, be hem i kilim plante man moa, i winim olgeta we hem i kilim long taem ya we hem i stap laef.

31Nao biaen, ol brata blong hem, mo ol narafala famle blong hem oli kam karemaot bodi blong hem, oli karem i gobak, mo oli go berem* hem long hol long ston we oli berem papa blong olgeta long hem. Ples ya i stap long medel blong tufala taon ya Jora mo Estaol, long graon blong papa blong olgeta.

Samson i stap lidim ol laen* blong Isrel* ya twanti yia, nao hem i ded.