Sam 16 - Bislama Bible Revised 2012

Prea blong man we tingting blong hem i stap strong long Hae God(Sing ya, Deved i wokem.)(Tok i go long Hae God.)

1Hae God.

Plis yu lukaot gud long mi,

from we oltaem mi stap trastem yu

blong yu yu blokemgud mi,

yu sevem mi.

2Yu yu Masta* blong mi.

Ol gudgudfala samting we mi mi gat

oli kamaot long yu nomo.

(Tok i go long ol man.)

3Ol man blong Hae God

we oli putum tingting blong olgeta

i stap strong long hem,

olgeta oli gudfala man.

Mi mi wantem tumas

blong stap wetem olgeta.

4Olgeta we oli stap biaen long ol narafala god

oli stap pulum plante trabol nomo

i kam long olgeta.

Mi bambae mi no save joen wetem olgeta

long ol sakrefaes blong olgeta,

mo bambae mi no save mekem wosip

long ol god blong olgeta.

(Tok i go long Hae God.)

5Hae God.

Yu nomo yu stamba blong olgeta laef blong mi,

yu yu stap givim olgeta samting ya long mi

we mi mi sot long hem.

Laef blong mi long fiuja

i stap long han blong yu.

6Olgeta samting we yu yu givim long mi

oli gud tumas,

oli gud we i gud.

(Tok i go long ol man.)

7Mi mi stap presem Hae God,

from we oltaem hem i stap lidim mi,

mo long naet,

tingting blong mi i stap toktok long mi,

i stap soemaot rod long mi.

8Oltaem mi mi save

we Hae God i stap wetem mi,

i stap klosap long mi,

nao i no gat wan samting i save muvum mi.

(Tok i go long Hae God.)

9Nao from samting ya mi mi glad tumas,

mi talem tangkiu long yu,

mo mi mi harem we mi sef gud,

10 Wok 13.35 from we yu yu stap lukaot gud long mi,

nao yu no save letem mi

mi go long Hom* blong ol Dedman.

Oltaem mi mi stap strong long wok blong yu,

taswe yu no save livim mi mi stap

olwe long ples ya.

11 Wok 2.25-28 Yu bambae yu soem rod ya long mi

we i blong go kasem laef.

Nao taem mi mi stap wetem yu,

bambae mi harem we mi glad tumas,

tingting blong mi bambae i glad oltaem nomo.