Rom Sotfala stori blong buk ya - Bislama Bible Revised 2012
Sotfala stori blong buk yaPol i raetem leta ya blong mekemrere rod blong hem, we hem i wantem go luk ol Kristin man long Rom. Long tingting blong hem, hem i wantem blong wok smoltaem wetem ol Kristin man long ples ya, nao biaen bambae oli givhan long hem, blong hem i go olwe i go kasem Spen. Hem i savegud we sipos man i bilif long Jisas* Kraes*, mo i kam man blong hem we i folemgud fasin blong hem long laef blong hem, man ya bambae i stret man long fes blong God. Nao from samting ya, hem i raetem leta ya blong talemaot fasin blong bilif ya long ol Kristin man long Rom. Buk ya i holem stamba tingting blong Pol from man we i bilif long Kraes.Fastaem, hem i talem halo long ol man blong jos long Rom, mo i talemaot long olgeta we hem i stap prea from olgeta. Nao biaen, hem i talemaot stamba tingting blong leta ya we i talem se, “Gud nius ya i stap soemaot fasin blong God blong mekem ol man oli stret man long fes blong hem. Fasin ya i stap kamtru long yumi long bilif nomo, i stat long stat blong hem gogo kasem en blong hem” (1.17).Nao Pol i gohed i tokbaot stamba tingting ya blong hem. Hem i talem se olgeta man, nating we oli laen* blong Isrel*, no oli no laen blong Isrel, be oli sem mak nomo, oli stap aninit long paoa blong sin. Mo man i save kam stret man nomo long fes blong God, sipos hem i bilif long Jisas Kraes. Nekis samting, Pol i tokbaot laef ya we man i stap joen gud long Kraes, from niufala laef ya we hem i kam stret man long fes blong God. Man we i bilif long Kraes, hem i stap long pis wetem God, mo Spirit blong God i mekem we hem i fri, paoa blong sin mo ded i no moa holem hem. Mo i stat long japta 5 i go kasem japta 8, Pol i talemaot from wanem God i givim Loa* long ol man blong hem, mo i tokbaot fasin we Spirit blong God i stap wok long laef blong man we i bilif long Kraes.Mo hem i gohed blong tokbaot fasin we ol laen blong Isrel, mo olgeta we oli no laen blong Isrel oli save joen long plan ya we God i mekem blong olgeta man long wol oli folem. Taem hem i wantem finisim tok blong hem, hem i talem se fasin ya we ol laen blong Isrel oli tanem baksaed long Jisas, hem i haf blong plan blong God, we hem i gat sore long olgeta man long wol, nao i sanem Jisas i kam, blong man we i bilif long hem, hem i save kam stret man long fes blong God. Mo Pol i bilif se ol laen blong Isrel, bambae oli no save tanem baksaed oltaem long Jisas. Long las haf blong leta ya, Pol i tokbaot fasin we i stret blong ol Kristin man oli folem long laef blong olgeta, mo antap moa, hem i tokbaot fasin ya we man i mas lavem narafala man. Hem i tokbaot fasin we man i mas folem long wok blong God, mo fasin we Kristin man i mas mekem long gavman, mo long narafala man. Mo hem i tokbaot fasin we Kristin man i mas tingting gud blong i no spolem tingting blong narafala man. Long en blong leta ya blong hem, hem i talem ol toktok blong talem halo blong hem wetem ol fren blong hem, i go long ol narafala fren blong olgeta, mo i talem ol toktok blong presem God.Ol haf blong buk yaFastok mo stamba tingting blong leta ya 1.1-17Olgeta man oli nidim niufala laef we God i givim 1.18—3.20Rod blong God blong sevem man 3.21—4.25Niufala laef blong man we i joen long Kraes 5.1—8.39Plan blong God blong ol laen blong Isrel 9.1—11.36Gudfala fasin we Kristin man i mas folem 12.1—15.13Lastok 15.14—16.27
