Levitikas 22 - Bislama Bible Revised 2012

Ol presen we ol man oli givim i go long Hae God oli tabu

1Nao Hae God i givim tok blong hem long Moses,

2blong hem i go talemaot long Hae Pris Eron wetem ol pikinini blong hem. Hem i talem se, “Mi mi Hae God, mo nem blong mi i tabu. Hae pris ya wetem ol pikinini blong hem mo olgeta we bambae oli kamaot biaen long hem oli mas tinghevi long ol samting we yufala i givim blong mekem sakrefaes long mi, from we yufala i makemaot ol samting ya se oli presen blong mi, mo oli tabu. Bambae olgeta oli no mas spolem nem blong mi.

3Sipos wan long olgeta ya i kam doti long fes blong mi, nao i kam klosap long ol presen ya, bambae man ya i no moa save wok bakegen long fes blong mi. Rul ya bambae i stap olwe gogo i no save finis.

“Mi mi Hae God, mi God blong yufala,

4mo sipos wan long olgeta ya i gat rabis sik ya long skin blong hem, no i gat wan rabis soa long bodi blong hem we wota blong soa ya i stap kamkamaot long hem, man ya i doti long fes blong mi, mo hem i no save kakae haf blong ol presen ya we i blong hem, gogo kasem we hem i kam klin bakegen. Mo sipos wan long olgeta i tajem wan samting we i doti finis from we i tajem dedbodi, no wota blong hem i sut i kamaot long bodi blong hem,

5no hem i tajem wan anamol we i doti long fes blong mi, no i tajem wan man we i doti olsem, bambae hem i kam doti long fes blong mi.

6-7Mo sipos hem i kam doti olsem, bambae hem i mas stap doti go kasem long sapa, mo hem i no save kakae ol presen ya long taem ya. Taem we san i godaon, bambae hem i mas swim blong i kam klin, mo biaen, hem i save kakae haf blong ol presen ya we i blong hem.

8Bambae pris i no save kakae mit blong anamol we i ded hem wan, no we wan wael anamol i kilim i ded, from we mit ya bambae i mekem hem i doti long fes blong mi.

“Mi mi Hae God, mi God blong yufala,

9mo ol pris ya evriwan i mas holem ol rul ya we mi mi givim long olgeta. Sipos no, bambae olgeta oli kam doti long fes blong mi, mo bambae oli mas ded, from we oli no obei long ol rul ya blong mi. Mi mi Hae God mo mi mi stap mekem olgeta oli tabu, oli klin long fes blong mi.

10“Bambae ol narafala man oli no save kakae ol presen ya. Ol presen ya oli tabu, ol pris wetem ol famle blong olgeta, olgeta ya nomo oli save kakae. Man we i stap wetem wan long olgeta, no man we i stap wok blong wan long olgeta bambae i no save kakae,

11be ol slef* we ol pris oli pemaot olgeta oli blong olgeta, wetem ol slef we oli bon long haos blong olgeta, olgeta ya oli save kakae.

12Mo sipos dota blong wan pris i mared long man we i no pris, bambae hem i no save kakae ol kakae ya,

13be sipos man blong hem i ded, no i mekem divos long hem, mo woman ya i no gat pikinini, nao i kambak long haos blong papa blong hem blong stap wetem hem olsem bifo we i no mared yet, hem i save kakae ol kakae ya blong papa blong hem. Ol famle blong pris nomo oli save kakae.

14“Mo sipos narafala man i mestem, i kakae haf blong ol presen ya, bambae hem i mas givim jenis blong ol kakae ya i go long pris long fulpraes blong hem wetem smol faen antap long hem. Mo fasin blong makem faen blong hem, sipos praes blong samting ya we i kakae i faef handred vatu,* faen blong hem bambae i mas pem wan handred vatu antap bakegen long praes ya.

15Bambae ol pris oli no mas letem ol kakae ya i go long man we i no gat raet blong kakae. Fasin ya bambae i mekem ol presen ya blong mi i kam doti long fes blong mi,

16mo bambae i mekem man ya we i kakae i kam doti, from we i ravem mi, mo bambae hem i mas mekem sakrefaes from. Mi mi Hae God, mo mi mi stap mekem ol presen ya i tabu.”

17Bakegen Hae God i givim tok blong hem long Moses,

18blong i go talemaot long Hae Pris Eron wetem ol pikinini blong hem mo long ol narafala laen* blong Isrel.* Hem i talem se, “Sipos wan long yufala, no wan narafala man we i stap wetem yufala i tekem wan anamol i kam blong mekem sakrefaes ya we i blong bonem i bon evriwan blong mekem wosip long mi, blong fulumap promes blong hem, no blong givim presen long mi we i givim nomo long gladhat blong hem, bambae anamol ya i no mas gat wan samting i rong long bodi blong hem.

19Sipos man ya i tekem wan bul, no wan man sipsip no wan man nani we i no gat wan samting i rong long bodi blong hem, mi bambae mi glad long hem.

20Dut 17.1Sipos yufala i mekem sakrefaes long wan anamol we i gat wan samting i rong long bodi blong hem, bambae mi mi no save glad long sakrefaes ya.

21Mi mi Hae God, mo taem wan man i wantem mekem sakrefaes ya we pris i bonem haf, hem i kakae haf blong soemaot we hem i stap fren gud wetem mi, we sakrefaes ya i blong fulumap promes blong hem, no blong givim presen long mi we i givim nomo long gladhat blong hem, bambae hem i mas kilim wan anamol we i no gat wan samting i rong long bodi blong hem. Sipos no, bambae mi mi no save glad long sakrefaes ya blong hem.

22Anamol we ae blong hem i nogud, no wan leg blong hem i nogud, no we wan samting i spolem bodi blong hem, no we skin blong hem i nogud, no we i gat soa we wota blong hem i stap ron, no soa we i no finis gud, bambae yufala i no mas kilim anamol olsem blong mekem sakrefaes long mi. Bambae yufala i no mas bonem wan anamol olsem long Olta ya blong givim i kam long mi.

23Sipos wan man i wantem mekem sakrefaes long wan anamol we bodi blong hem i no gru gud, i smol, no we wan samting i spolem bodi blong hem lelebet, bambae hem i save givim nomo long mi long gladhat blong hem, be i no mas tekem anamol olsem blong kam mekem sakrefaes long hem blong fulumap promes blong hem.

24Yufala i no mas tekem anamol we wan samting i rong long bol blong hem, no we yufala i mekem natamap* long hem, blong yufala i mekem sakrefaes long hem. Mi mi Hae God, mo yufala i no mas mekem samting olsem long ples blong yufala.

25Mo yufala i no mas tekem wan anamol we fastaem i blong man Kenan,* blong kam mekem sakrefaes long hem we bambae pris i bonem long Olta blong givim i kam long mi. Olgeta oli stap mekem natamap long ol anamol blong olgeta, mo mi mi no save glad long ol sakrefaes olsem.”

26Bakegen, Hae God i talem long Moses se,

27“Sipos wan pikinini blong buluk, no wan smol sipsip, no wan smol nani i jes bon, bambae yufala i no mas tekemaot long mama blong hem blong mekem sakrefaes long hem gogo kasem seven dei blong hem. Nao taem seven dei i pas, bambae yufala i save tekem i kam blong bonem long Olta blong givim i kam long mi.

28Bambae yufala i no mas mekem sakrefaes long woman buluk wetem pikinini blong hem, no woman sipsip wetem pikinini blong hem, no woman nani wetem pikinini blong hem, we yufala i kilim tufala wantaem long sem dei nomo.

29Mi mi Hae God, mo sipos yufala i mekem sakrefaes blong talem tangkiu long mi, bambae yufala i mas folem ol rul ya, blong mi mi save glad long sakrefaes ya blong yufala.

30Mo bambae yufala i mas kakae ol mit blong sakrefaes olsem long sem dei nomo, yufala i no mas livim haf i stap go kasem long nekis dei blong hem.

31-33“Mi mi Hae God, mi God blong yufala, mo yufala i mas obei long ol tok ya blong mi. Nem blong mi i tabu, mo yufala i no mas spolem nem blong mi. Yufala i mas save we mi mi tabu, mo mi stap mekem yufala i tabu. Mi nao mi tekemaot yufala long Ijip, mi tekem yufala i kam, blong bambae mi mi God blong yufala, mo yufala i man blong mi.”