Sam 65 - Bislama Bible Revised 2012

Sing blong presem God mo blong talem tangkiu long hem(Sing ya, Deved i wokem.)(Tok i go long God.)

1God.

I stret blong mifala i presem yu long Saeon,*

mo blong mifala i holem ol promes ya

we mifala i mekem long yu,

2from we oltaem,

yu yu stap ansa long ol prea blong mifala.

Olgeta man long evri ples

bambae oli mas kam long yu,

3from we oli stap mekem sin.

Ol fasin nogud blong mifala

oli stap winim mifala,

be yu yu stap fogivim mifala,

yu stap tekemaot sin blong mifala.

4Olgeta man we yu yu stap jusumaot olgeta,

mo yu stap tekem olgeta

oli kam long tabu ples blong yu,

oli save harem gud.

Bambae mifala i harem gud

long ol gudgudfala samting ya

blong haos* blong yu,

bambae mifala i stap klosap nomo long yu

long tabu haos ya blong yu.

5Taem mifala i krae long yu,

yu yu stap ansa long mifala,

yu stap mekem mifala i win,

yu stap mekem ol bigbigfala samting

blong sevem mifala.

Ol man long olgeta ples long wol

oli stap trastem yu.

6Yu yu stanemap ol bigbigfala hil

long paoa blong yu.

Long fasin ya,

yu soemaot we yu yu gat olgeta paoa.

7Yu stap mekem ol rafsi

oli kam kwaet,

mo yu stap blokem ol bigsi

oli no mekem noes.

Yu mekem ol man

oli no moa raorao olbaot,

oli stap kwaet.

8Ol man long olgeta ples long wol

oli fraet long ol bigbigfala wok

we yu yu mekem,

nao oli stap ona long yu from.

Ol wok blong yu i mekem

ol man long wol ya oli hapi tumas

oli stap singsingaot,

i stat long narasaed blong wol,

i go kasem narasaed blong hem.

9Yu yu soemaot

we yu stap lukaot gud long wol ya,

from we yu stap sanem ren i kam,

nao yu mekem graon blong hem

i kam gud we i gud.

Yu mekem we ol wota oli stap ron,

mo we graon i karem plante kakae.

Fasin blong yu blong mekem i olsem.

10Yu stap sanem plante ren i kam long ol garen

we ol man oli planem finis,

blong mekem graon i wetwet.

Yu mekem graon i sofsof long ren,

nao yu mekem ol samting oli gru.

11Gudfala fasin ya blong yu i mekem

we oltaem i gat plante gudfala kakae i stap.

Long evri ples we yu yu pas long hem,

yu stap givim plante kakae long ol man.

12Ol ples olbaot

oli fulap long kakae blong sipsip,

mo evri samting long ol hil

oli stap harem gud.

13Ol open ples

oli fulap gud long ol sipsip,

ol levelples long medel blong ol hil

oli fulap gud long wit.*

Long evri ples,

olgeta samting oli stap

singsingaot, mo oli stap singsing

from we oli glad tumas.