1 Kronikel 15 - Bislama Bible Revised 2012

King Deved i mekemrere bakegen blong go karem Bokis ya i kam long Jerusalem

1Nao King Deved i wokem ol haos blong hem long haf ya blong Jerusalem* we nem blong hem “Taon* blong King Deved”. Mo hem i mekemrere wan ples tu blong i putum Bokis ya we i Saen blong Promes blong Hae God i stap long hem, mo i putumap wan haos tapolen blong Bokis ya.

2

5Nao long ol Livaet, i gat wan handred twanti man long laen blong Kohat, we Uriel i lida long olgeta.

6Mo i gat tu handred twanti man long laen blong Merari, we Asaea i lida long olgeta.

7Mo i gat wan handred toti man long laen blong Geson, we Joel i lida long olgeta.

8Mo i gat tu handred man long laen blong Elijafan, we Semaea i lida long olgeta.

9Mo i gat eiti man long laen blong Hebron, we Eliel i lida long olgeta.

10Mo i gat wan handred twelef man long laen blong Usiel, we Aminadab i lida long olgeta.

11Nao king i singaot tufala pris ya Jadok mo Abiata wetem ol sikis lida ya blong ol Livaet

12mo i talem long olgeta, se, “Yumi evriwan i laen blong Isrel, mo Hae God i God blong yumi, be yufala i lida blong ol Livaet. Bokis ya i Saen blong Promes blong Hae God, mo yufala i mas mekem yufala wetem ol man blong yufala, yufala i klin long fes blong hem, blong bambae yufala i save karem Bokis ya i kam long ples ya we mi mekemrere finis blong putum long hem.

13Bifo ya, yufala i no kam wetem mifala blong karem Bokis ya i kam, mo from samting ya, Hae God i panisim mifala, from we mifala i no mekem wosip long hem olsem we hem i wantem.”

14Nao ol pris wetem olgeta Livaet oli mekem olgeta oli klin long fes blong Hae God blong oli save tekem Bokis ya i kam.

15Eks 25.14Mo taem ol Livaet oli karem Bokis ya, oli karem long tu longfala stik long solda blong olgeta, olsem we Hae God i bin talem long Moses bifo.

16Nao king i talem long ol lida blong ol Livaet blong oli jusumaot sam man blong olgeta blong oli singsing mo oli plei long gita mo bras simbol* blong mekem ol singsing blong glad.

17-21Nem blong ol man blong singsing we oli jusumaot blong plei long simbol i olsem.

I gat Heman, we papa blong hem Joel, we i laen blong Kohat, mo Asaf, we papa blong hem Berekia, we i laen blong Geson, mo Etan, we papa blong hem Kusaea, we i laen blong Merari.

Mo olgeta we oli jusumaot blong plei long gita we oli putum long hae ki, nem blong olgeta i olsem.

I gat Sekaraea, mo Jahasiel, mo Semiramot, mo Jehiel, mo Uni, mo Eliab, mo Mahasea, mo Benaea.

Mo olgeta we oli jusumaot blong plei long gita we oli putum long lo ki, nem blong olgeta, Matitia, mo Elifelehu, mo Miknea mo Asasia, mo Obededom, wetem Jehiel, we biaen, tufala i kam man blong gad long Haos blong Hae God.

22Mo from we Kenania i nambawan man blong miusik, oli jusumaot hem blong hem i lida blong ol man ya.

23-24Mo oli jusumaot fo man blong gad long Bokis ya, we nem blong olgeta, Berekia, mo Elkana, mo Obededom, mo Jehia.

Mo oli jusumaot ol pris blong oli wokbaot i go fastaem long fran blong Bokis ya, blong oli blu long trampet, we nem blong olgeta, Sebania, mo Josafat, mo Netanel, mo Amasae, mo Sekaraea, mo Benaea, mo Eliesa.

Bokis ya i go long Jerusalem(2 Samuel 6.12-22)

25Nao King Deved wetem olgeta lida blong Isrel* mo olgeta komanda blong ol soldia oli go luk Obededom, nao oli tekemaot Bokis ya we i Saen blong Promes blong Hae God, mo oli karem i kam we oli glad we i glad.

26Mo from we Hae God i stap givhan gud long ol Livaet* we oli stap karem Bokis ya i kam, ol pris oli kilim seven bul mo seven man sipsip, mo oli mekem sakrefaes long olgeta blong talem tangkiu long hem.

27Long taem ya, king wetem ol Livaet we oli man blong singsing, mo Kenania we i lida blong olgeta, mo ol man ya we oli stap karem Bokis ya, olgeta ya evriwan oli werem ol klos we oli wokem long linen* we i beswan, mo king i stap werem wan efod* tu,

28mo ol narafala laen* blong Isrel oli biaen long Bokis ya. Nao long fasin ya, oli tekem Bokis ya i kam long Jerusalem* we oli stap singsingaot bigwan, mo oli glad we oli glad tumas. Mo ol Livaet oli stap blu long trampet, mo oli stap bangem bras simbol,* mo oli stap plei gita.

29Nao taem we oli stap karem Bokis ya i kam insaed long taon, Mikal, woman blong king we i dota blong King Sol, hem i stap insaed long haos, mo i lukluk i kamtru long windo, nao i luk we king i stap danis mo i stap jamjam we i glad tumas, nao hem i no laekem fasin ya nating, i lukluk rabis long hem.