Eksodas 38 - Bislama Bible Revised 2012

Bejalehel i wokem Olta blong Bonem Sakrefaes(Eksodas 27.1-8)

1-4Nao Bejalehel i wokem Olta ya blong Bonem Sakrefaes, we haf blong hem antap, hem i wokem long ol plang blong wud ya kasis* we i blokem long bras, mo haf blong hem daon, hem i wokem long bigfala netwaea, we ol waea blong hem oli bras, mo oli bigbigwan. Olta ya i skwea, we bigfala blong hem i kasem tu meta twanti sentemeta, mo hae blong hem i kasem klosap wan meta foti sentemeta. Hem i wokem fo samting olsem hon* blong buluk i stap stanap long ol fo kona blong hem, we oli haf blong Olta ya nomo, mo i blokem olgeta wud blong Olta ya long bras. Mo hem i wokem wan baket blong Olta ya, blong karemaot asis wetem gris we i kamaot long hem, mo i wokem ol smol savel, mo ol besin, mo ol fok, wetem ol baket blong karemaot sakol faea we i stap laet, we oli blong Olta ya. Olgeta samting ya, hem i wokem long bras. Mo hem i wokem bigfala netwaea long bras, we ol waea blong hem oli bigbigwan, mo i wokem haf blong ol fo saed blong Olta ya daon long hem. Mo hem i wokem fo ring long bras, i hangem long ol fo kona blong netwaea ya, blong tu stik we i blong karem Olta ya bambae i gotru long olgeta.

5Olta ya i gat strap long bras i goraon long medel blong ol fo saed blong hem, nao netwaea ya i stat long ples ya, i godaon kasem graon.

6Hem i wokem tu stik blong karem Olta ya long wud ya kasis, mo i blokem tufala long bras,

7nao i pusum tufala stik ya i gotru long ol ring ya, we wan stik i stap wan saed, wan stik i stap wan saed. Haf blong Olta ya antap, hem i wokem long ol plang blong kasis, mo i wokem we i gat hol blong hem olsem bokis.

Bejalehel i wokem Bras Besin(Eksodas 30.18)

8 Eks 30.18 Nao Bejalehel i wokem wan bigfala Besin long bras mo i wokem ples blong hem tu long bras. Long taem ya, ol woman we oli stap mekem wok blong Hae God long doa blong Haos Tapolen blong hem oli gat ol lukingglas we man i wokem long bras mo i ravem blong mekem i saen gud, be oli givim ol bras ya i go long Hae God, nao Bejalehel i yusum blong wokem tufala samting ya.

Bejalehel i wokem ol samting blong fenis blong Haos Tapolen blong Hae God(Eksodas 27.9-19)

9Nao Bejalehel i wokem ol samting blong fenis ya we i goraon long Haos Tapolen ya blong Hae God. Hem i somap waet kaliko ya linen* we i beswan blong blokem ples ya. Long saed blong hem i go long saot, longfala blong kaliko ya i kasem foti fo meta,

10mo i gat twanti pos long hem, wetem twanti spesel stamba blong olgeta we bambae oli stanap long olgeta, we evriwan, hem i wokem long bras, mo i gat ol huk mo ol rel blong hem tu, we evriwan, hem i wokem long silva, blong kaliko ya i hang long olgeta.

11Mo long saed blong hem i go long not, olgeta samting blong hem i sem mak nomo.

12Mo long saed blong hem i go long wes, longfala blong kaliko blong hem i kasem twanti tu meta, mo i gat ten pos wetem ten spesel stamba blong olgeta blong kaliko ya i hang long olgeta.

13Mo long saed blong hem i go long is, we i gat doa long hem, bigfala blong ples ya tu i kasem twanti tu meta.

14Nao long saed blong doa go kasem kona, longfala blong kaliko blong hem i kasem antap long sikis meta haf, mo i gat tri pos wetem tri spesel stamba blong trifala, blong kaliko ya i hang long trifala,

15mo long narasaed blong doa ya, olgeta samting blong hem i sem mak nomo.

16Olgeta kaliko we i goraon long yad ya, hem i wokem olgeta evriwan long waet kaliko ya linen.

17Mo olgeta spesel stamba blong ol pos ya, hem i wokem olgeta evriwan long bras, be ol huk mo ol rel, hem i wokem olgeta long silva, mo top blong ol pos ya, hem i blokem olgeta long silva. Ol rel ya, hem i hangem olgeta long ol pos ya, blong wokem fenis ya.

18Mo blong blokem doa ya, hem i wokem wan kaliko we longfala blong hem i kasem naen meta, mo bigfala blong hem i moa long tu meta, i sem mak long bigfala blong ol kaliko ya blong blokem fenis. Man we i gat gudhan blong wivim kaliko we i gat pija long hem, hem i tekem gudfala tred ya linen we i waet, mo tred we i blu, mo tred we i pepol, mo tred we i red, nao i wivim kaliko ya blong blokem doa we i gat ol pija olbaot long hem.

19Mo hem i wokem fo pos, mo i wokem fo spesel stamba blong olgeta long bras, mo i blokem top blong ol pos ya long silva, mo i wokem ol huk mo ol rel blong olgeta long silva, blong i hangem kaliko ya long olgeta.

20Mo olgeta aean ya we i blong fasemtaet ol rop blong Haos Tapolen ya long olgeta, mo we i blong fasemtaet ol rop blong holem fenis ya long olgeta, hem i wokem olgeta evriwan long bras.

Ol samting we Bejalehel olgeta oli yusum long Haos Tapolen ya

21Haos Tapolen ya blong Hae God we Bejalehel olgeta oli wokem, narafala nem blong hem “Haos Tapolen blong Promes* blong Hae God”, from we taem Haos ya i finis, olgeta oli tekem tufala ston ya we ol tok blong Promes blong Hae God i stap long tufala, oli putum tufala i stap insaed long hem. Nao long taem ya we Bejalehel olgeta oli stap wokem Haos ya, Moses i talem long Itamara blong i mekem lis blong ol aean we oli yusum long Haos ya. Itamara ya, papa blong hem Eron we i pris,* mo taem hem i mekem lis ya, ol Livaet* oli stap givhan long hem.

22Bejalehel ya, papa blong hem Uri mo bubu blong hem Huru we i laen* blong Juda,* mo hem i wokem olgeta samting ya olsem we Hae God i talem long Moses.

23Mo man blong givhan long hem Oholiab, we papa blong hem Ahisamak we i laen blong Dan,* hem i gat gudhan blong katem ol gudgudfala ston blong flasem ol samting, mo blong mekem plan blong ol gudgudfala samting we bambae i wokem, mo blong wivim waet kaliko ya linen* we i beswan, mo blong flasem ol kaliko ya long tred we i blu, mo tred we i pepol, mo tred we i red.

Ol samting ya we Bejalehel olgeta oli yusum i olsem.

24Olgeta gol ya we ol man oli givim i go long Hae God blong oli yusum long Haos Tapolen ya blong hem, wet blong hem i kasem wan tan. Taem oli skelem ol gol ya, oli yusum stret skel ya we ol pris oli stap yusum long taem ya.

25-26Eks 30.11-16

Mat 17.24Long taem ya, olgeta oli mekem sensas blong kaontem ol man long ol laen blong Isrel* we oli gat twanti yia blong olgeta, no antap long twanti yia, mo namba blong olgeta i kasem sikis handred tri taosen, faef handred fifti man. Olgeta ya oli givim silva i go long wok ya, we i olsem tu handred fifti vatu* wan man, mo taem oli skelem ol silva ya long stret skel blong hem, wet blong hem i kasem tri tan, fo handred toti kilo.

27Bejalehel olgeta oli yusum tri tan fo handred kilo blong hem, blong wokem wan handred spesel stamba blong ol frem* blong Haos Tapolen ya blong Hae God, mo blong wokem ol pos ya we kaliko ya we i brekem rum blong hem long tu haf i hang long olgeta. Hemia toti fo kilo silva long wan, toti fo kilo silva long wan.

28Mo long toti kilo ya blong hem we i stap, oli wokem ol rel mo ol huk blong ol pos, mo oli blokem top blong ol pos ya long hem.

29Olgeta bras we ol man oli givim i go long Hae God, wet blong hem i kasem tu tan fo handred twanti faef kilo.

30Mo Bejalehel olgeta oli yusum ol bras ya blong wokem ol spesel stamba blong ol pos ya we kaliko ya we i blokem doa blong Haos Tapolen ya i hang long olgeta, mo blong wokem Olta blong Bonem Sakrefaes, wetem bigfala netwaea long bras we i goraon long hem, mo olgeta samting we i blong yusum long Olta ya.

31Mo oli wokem tu ol spesel stamba blong ol pos blong fenis we i goraon long Haos Tapolen ya, wetem ol stamba blong ol pos blong doa blong hem, mo olgeta aean we i blong fasemtaet ol rop blong Haos ya long olgeta, mo we i blong fasemtaet ol rop blong fenis ya long olgeta.