1 Korin Sotfala stori blong buk ya - Bislama Bible Revised 2012
Sotfala stori blong buk yaFas leta ya we Pol i raetem i go long ol Kristin man long Korin, Pol i raetem from we i gat ol problem i girap long laef blong ol Kristin man long ples ya, mo hem i sanem leta ya i go blong givhan long olgeta. Jos ya long Korin, Pol nao i statem.Korin i wan bigfala taon blong ol man Gris, mo i kaptel blong provins ya Akaea*, we i anda long Rom. I gat plante man blong ol naranarafala kantri long ples ya, mo i wan ples we ol man oli savegud hem long saed blong bisnes, mo long saed blong kastom blong olgeta, mo long saed blong ol rabis fasin blong olgeta, mo long saed blong wosip blong olgeta we oli stap mekem wosip long plante naranarafala god.Ol bigfala samting we Pol i tokbaot long leta ya i olsem. Hem i tokbaot problem ya we ol man long jos oli stap seraot, mo problem ya we olgeta oli stap mekem i nogud wetem woman. Mo hem i ansarem ol kwestin blong olgeta long saed blong mared, mo long saed blong kakae we man i stap givim long ol aedol. Mo hem i tokbaot stret rod blong folem long wosip long jos, mo ol paoa we Tabu Spirit i stap givim long jos, mo fasin ya we man i save laef bakegen. Pol i soemaot we hem i savegud ol problem mo kwestin ya, mo i soemaot we gud nius blong Jisas nomo i givim ansa long olgeta.Long japta 13 hem i tokbaot fasin ya blong lavem God mo ol man tumas we hemia i nambawan fasin blong ol man blong God oli folem. Japta ya ol man oli savegud, i bitim ol narafala haf blong buk ya.Ol haf blong buk yaFastok 1.1-9Ol man long jos oli stap seraot 1.10—4.21Fasin nogud wetem woman, mo laef blong famle 5.1—7.14Ol Kristin man mo ol man we oli no save God 8.1—11.1Ol rod blong ol Kristin man oli folem long wosip 11.2—14.40Jisas i laef bakegen, mo ol man we oli bilif long hemoli save laef bakegen 15.1-58Kleksen blong sanem i go long ol Kristin man long Judia 16.1-4Lastok 16.5-24
