Eksodas 40 - Bislama Bible Revised 2012

Hae God i talem long Moses blong i stanemap Haos Tapolen ya, mo i mekem i tabu

1Nao Hae God i talem long Moses se,

2“Nekis yia, long fas manis* blong yia, long fas dei blong hem, bambae yufala i stanemap Haos Tapolen ya blong mi, we bambae yufala i stap kam long hem blong mit wetem mi.

3Bambae yufala i tekem Bokis ya we i Saen blong Promes* blong mi, we i gat tufala flat ston ya i stap insaed, nao yufala i putum i go insaed long Haos Tapolen ya, mo yufala i tekem kaliko ya we i blong brekem rum ya long tu haf, yufala i hangem long fran blong Bokis ya blong blokem.

4Nao bambae yufala i tekem Tebol ya blong Bred, yufala i putum narasaed kaliko ya saed i kam, mo yufala i putum ol samting blong hem long hem. Nao bambae yufala i tekem Ples blong Putum Laet i kam, mo yufala i stanemap ol laet blong hem long hem.

5Nao bambae yufala i tekem Olta ya blong Bonem Insens, we yufala i blokem ol wud blong hem long gol, yufala i karem i kam, yufala i putum klosap long kaliko ya we i blokem Bokis ya we i Saen blong Promes blong mi. Nao bambae yufala i tekem kaliko ya blong blokem doa blong Haos ya, yufala i hangem long doa.

6Nao bambae yufala i tekem Olta ya blong Bonem Sakrefaes, yufala i putum long fran blong Haos Tapolen ya,

7mo bambae yufala i tekem Bras Besin ya i kam, yufala i putum long medel blong Olta ya mo Haos Tapolen, mo yufala i fulumap wota long hem.

8Nao bambae yufala i stanemap fenis ya i goraon long hem, mo yufala i hangem ol kaliko ya blong blokem Haos ya, wetem kaliko ya long doa blong hem blong blokem ples ya.

9“Nao bambae yu tekem tabu oel ya, yu kafsaedem smol i go long Haos Tapolen ya wetem olgeta samting blong hem, blong mekem olgeta oli tabu, oli blong mi.

10Mo bambae yu kafsaedem smol i go long Olta ya blong Bonem Sakrefaes, wetem olgeta samting blong hem blong mekem olgeta oli tabu, oli blong mi, nao bambae Olta ya i kam tabu we i tabu, i blong mi olgeta.

11Mo bambae yu kafsaedem smol i go long Bras Besin ya tu wetem ples blong hem, blong mekem i tabu i blong mi.

12“Nao bambae yu tekem Eron wetem ol pikinini blong hem, oli kam stanap long doa blong Haos Tapolen ya, yu talem long olgeta blong oli swim long wota ya long Bras Besin, blong mekem olgeta oli klin long fes blong mi.

13Nao bambae yu tekem ol spesel klos ya blong Eron, yu putum long hem, mo bambae yu tekem tabu oel ya, yu kafsaedem smol i go long hem, blong makemaot hem i tabu, i pris* blong mi blong mekem ol wok blong mi.

14Nao bambae yu tekem ol pikinini blong hem oli kam, yu putum ol spesel sot ya long olgeta,

15nao yu tekem oel ya bakegen, yu kafsaedem smol i go long olgeta, olsem we yu mekem long papa blong olgeta, blong mekem olgeta oli tabu, oli pris blong mi blong oli mekem wok blong mi. Fasin ya, we bambae yu kafsaedem oel ya i go long olgeta, bambae i mekem olgeta, wetem ol pikinini blong olgeta, mo olgeta we bambae oli kamaot biaen long olgeta oli tabu, oli pris blong mi blong mekem ol wok blong mi, gogo i no save finis.”

16Nao Moses i mekem evri samting ya, stret olsem we Hae God i talem.

17Long seken yia biaen long taem ya we ol laen* blong Isrel* ya oli aot long Ijip, long fas manis blong yia, long fas dei blong hem, Moses olgeta oli stanemap Haos Tapolen ya.

18Olgeta oli putumrere ol spesel stamba blong ol frem* mo ol pos blong hem, nao oli stanemap ol frem blong hem, mo oli putum ol rel blong holemtaet olgeta, mo oli stanemap ol pos blong hem.

19Nao oli pulum tapolen blong hem i go antap long ol frem ya, mo oli pulum narafala tapolen ya i go antap long hem bakegen, olsem we Hae God i talem.

20Nao Moses i tekem tufala ston ya, i putum tufala i go insaed long Bokis ya we i Saen blong Promes blong Hae God, mo i tekem tufala stik ya blong karem Bokis ya, i pusum tufala i gotru long ol ring blong Bokis ya, mo i putum Lid ya long hem we i Ples we Hae God i stap Tekemaot Sin blong olgeta.

21Nao hem i tekem Bokis ya, i putum i go insaed long Haos Tapolen ya, mo i tekem kaliko ya we i blong brekem rum ya long tu haf, i hangem long fran blong Bokis ya blong blokem, stret olsem we Hae God i talem.

22Nao hem i tekem Tebol ya blong Bred, i go putum insaed long Haos Tapolen ya, long saed i go long not, long narasaed kaliko ya saed i kam,

23mo i tekem ol Tabu Bred ya we ol man oli givim i go long Hae God, i putum olgeta long Tebol ya, stret olsem we Hae God i talem.

24Nao hem i tekem Ples ya blong Putum Laet, i go putum insaed long Haos Tapolen ya, long narasaed rum ya, long saed i go long saot.

25Nao long ples ya, long fes blong Hae God, hem i laetem ol laet ya, stret olsem we Hae God i talem.

26Mo hem i tekem Olta ya blong Bonem Insens, we oli blokem ol wud blong hem long gol, i go putum insaed long Haos Tapolen ya, klosap long kaliko ya we i blokem Bokis ya we i Saen blong Promes blong Hae God.

27Nao hem i tekem insens* ya we i gat gudfala smel, i bonem long Olta ya, stret olsem we Hae God i talem.

28Nao hem i tekem kaliko ya we i blong blokem doa blong Haos Tapolen ya, i go hangem long doa.

29Nao hem i tekem Olta ya blong Bonem Sakrefaes i kam, i putum long fran blong doa blong Haos ya. Nao hem i tekem anamol blong sakrefaes, i kilim mo i tekem kakae blong garen* we ol man oli givim i go long Hae God, nao i bonem tufala long Olta ya, we tufala i bon evriwan blong mekem sakrefaes, stret olsem we Hae God i talem.

30Nao hem i tekem Bras Besin ya, i putum i stap long medel blong Olta mo Haos Tapolen ya, mo oli fulumap wota long hem.

31-32Nao oltaem, sipos Moses no Eron, no wan long ol pikinini blong Eron i wantem go insaed long Haos Tapolen ya, be fastaem, hem i mas wasem han blong hem mo leg blong hem long ples ya, stret olsem we Hae God i talem.

33Nao oli stanemap fenis ya we i goraon long Haos Tapolen ya wetem Olta ya, mo oli hangem kaliko ya long doa blong hem blong blokem ples ya.

Nao long fasin ya, olgeta wok blong Haos Tapolen ya we Hae God i talem long Moses blong i mekem, i finis.

Bigfala klaod ya we i stanap i kam kavremap Haos Tapolen ya(Namba 9.15-23)

34 1 King 8.10,11; Aes 6.4; Esik 43.4,5; Rev 15.8 Nao bigfala klaod ya we i stanap stret i kam kavremap Haos Tapolen ya blong Hae God, we ol laen* blong Isrel* oli stap go long hem blong mit wetem hem, mo bigfala laet ya we i saen we i saen, we i soemaot we Hae God i stap, hem i stap saen i kam fulap long Haos Tapolen ya.

35Nao from samting ya, Moses i no moa save go insaed long Haos Tapolen ya bakegen.

36-37Mo oltaem, fasin we olgeta oli stap folem blong muvum ples blong olgeta i olsem. Taem we klaod ya i stap kavremap Haos Tapolen ya, nating we i stap longtaem olsem wanem, be oli no save muvum ples blong olgeta. Oli save muvum ples blong olgeta long taem ya nomo we klaod ya i aot, i go antap.

38Nao oltaem long taem ya we oli stap muv olbaot long draeples ya, long dei, oli save luk bigfala klaod ya blong Hae God i stap kavremap Haos Tapolen ya, mo long naet, oli save luk wan faea i stap laet insaed long klaod, antap long Haos Tapolen ya.