Esra 6 - Bislama Bible Revised 2012

King Darias i faenem ripot blong King Sirus

1Nao King Darias i talem long ol man blong hem blong oli go lukaot tok ya blong King Sirus long ol buk ya long haos ya long Babilon, we ol king oli stap putumgud ol ripot blong olgeta long hem.

2Be oli no faenem tok ya blong hem long Babilon, oli faenem long buk blong ol ripot we i stap long taon ya Ekbatana, we i kaptel blong provins ya Media. Tok ya i talem se,

3“Long taem we King Sirus i stap rul, long fas yia blong hem, hem i talemaot se haos* blong God long Jerusalem,* ol man Juda* oli mas wokem bakegen, blong oli gat ples blong bonem ol sakrefaes, mo blong givim ol presen i go long God blong olgeta. Haos ya, hae blong hem bambae i kasem twanti seven meta, mo bigfala blong hem bambae i kasem twanti seven meta.

4Wol blong hem bambae oli mekem i go antap we bambae oli putum tri laen blong ston, wan laen blong timba, tri laen blong ston, wan laen blong timba, mo bambae oli mekem olsem, gogo oli finisim wol blong hem. Mo ol mane blong mekem wok ya bambae i kamaot long mane blong gavman.

5Mo olgeta samting blong haos ya we oli wokem olgeta long gol mo long silva, we oli stap yusum bifo blong mekem wosip, we King Nebukadnesa i bin tekemaot olgeta long haos ya, i karem i kam long Babilon, be bambae oli mas gobak long prapa ples blong olgeta long niufala haos ya blong God we bambae oli wokem long Jerusalem.”

King Darias i talemaot se wok i mas gohed

6Nao King Darias i sanem ansa blong hem i go long olgeta, i talem se,

“Tatenae. Yu yu resedenkomisina blong mi long provins ya Narasaed Yufretes Reva long Wes, mo mi mi raet i kam long yu mo long yu Setara Bosenae, mo long ol narafala haeman we oli stap wetem yutufala long provins ya.

“Mi mi talem long yufala, se yufala i no go klosap long olgeta ya.

7Yufala i no pusum nus blong yufala long wok ya blong haos* blong God. Yufala i letem distrikejen* ya blong mi long Juda* wetem ol lida blong olgeta oli gohed blong wokem haos ya bakegen long sem ples we haos ya i stap long hem bifo.

8“Mo mi mi talem long yufala se, yufala tu i mas givhan long olgeta blong oli wokem haos ya bakegen. Olgeta mane we oli nidim long wok ya, yufala i mas tekemaot long ol mane blong takis, we yufala i stap tekem long nem blong mi long provins ya blong yufala, mo sipos oli askem, bambae yufala i mas givim kwiktaem long olgeta, blong wok i save gohed gud.

9Mo evri dei, sipos ol pris* blong olgeta oli wantem ol yang bul, no ol man sipsip, no ol smol man sipsip, blong oli bonem blong mekem sakrefaes long God ya blong heven, no sipos oli wantem wit,* no sol, no waen, no olifoel,* bambae yufala i mas givim long olgeta.

10Yufala i mas mekem ol samting ya, blong olgeta oli save mekem ol sakrefaes we God ya blong heven i glad long hem, mo blong oli save prea long hem blong hem i blesem mi wetem ol pikinini blong mi.

11“Mo bakegen, mi mi talem long yufala, se sipos wan man i no obei long tok ya blong mi, ol man blong mi bambae oli mas go pulumaot wan wud blong haos blong hem, oli sapenem, oli planem i gotru long bodi blong hem, mo haos blong hem, oli mas mekem i kam ples blong sakem doti.

12God ya i jusumaot ples ya Jerusalem* mo i talem se, ‘Ol man oli mas kam long ples ya blong mekem wosip long mi.’ Mo prea blong mi, we hem bambae i flatemgud king no neson we i no obei long tok ya blong mi, i traem kam spolem haos ya blong hem.

“Mi mi King Darias, mo hemia tok blong mi. Olgeta man oli mas ona gud long tok ya.”

Ol man Juda oli finisim haos blong God

13Nao Tatenae we i resedenkomisina, mo Setara Bosenae wetem ol narafala haeman blong provins ya Narasaed Yufretes Reva long Wes oli mekem evri samting stret olsem we king i talem.

14Hag 1.1; Sek 1.1Ol lida blong ol laen* blong Isrel* oli gohed gud long wok ya, mo Profet Hagae wetem Profet Sekaraea, tufala i stap leftemap tingting blong olgeta blong oli mekem wok ya. Nao oli finisimgud haos* ya, olsem we God blong yumi ol laen blong Isrel i bin talem, mo olsem we King Sirus, mo King Darias, mo King Ataksekses i bin talem long taem ya we trifala ya wanwan i king blong Pesia.

15Haos ya blong God, oli finisimgud long namba sikis yia blong King Darias, long manis ya Adara* we i namba twelef manis, long namba tri dei blong hem.

Ol man Juda oli mekem haos blong God i tabu, i blong hem, mo oli mekem Lafet blong Pasova

16Nao ol pris* wetem ol Livaet* mo ol narafala laen* blong Isrel* we oli aot long Babilonia oli kambak, olgeta oli glad tumas, mo oli mekem prea blong mekem haos* ya i tabu, i blong Hae God.

17Long dei ya we olgeta oli mekem haos ya i tabu, oli kilim wan handred bul, mo tu handred man sipsip, mo fo handred smol man sipsip blong mekem sakrefaes, mo oli kilim twelef man nani blong mekem sakrefaes blong tekemaot sin, we ol nani ya wanwan i blong makem ol twelef laen ya blong olgeta.

18Mo long taem ya, oli putum ol pris wetem ol Livaet long ol grup blong olgeta, blong bambae oli stap mekem ol wok blong olgeta evri dei long haos blong Hae God long Jerusalem,* olsem we tok long buk blong Moses i talem.

19 Eks 12.1-20 Nao long nekis yia blong hem, long fas manis,* long namba fotin dei blong hem, olgeta oli mekem Lafet* blong Pasova.*

20Be fastaem, ol pris wetem ol Livaet oli mekem olgeta oli klin long fes blong Hae God. Nao ol Livaet oli kilim ol anamol blong mekem ol sakrefaes blong Pasova. Ol sakrefaes ya oli blong olgeta, mo blong ol pris, mo blong ol narafala man ya we oli kambak.

21Olgeta we oli kam long lafet ya, i gat ol laen blong Isrel we oli aot long Babilonia oli kambak, wetem ol laen blong olgeta we oli stap nomo long Isrel mo long Juda,* be oli lego ol rabis fasin blong ol hiten man we oli stap long ples ya, oli kambak oli mekem wosip bakegen long Hae God, mo olgeta evriwan oli kakae ol mit blong sakrefaes ya.

22Mo long ol seven dei blong Lafet ya we oli Kakae Bred* we i No Gat Is long hem, olgeta oli glad tumas. Oli glad from we Hae God i mekem we king blong Pesia we narafala nem blong hem king blong Asiria, hem i glad long olgeta, i givhan long olgeta blong oli wokem haos ya blong God ya we i God blong yumi i gud bakegen.