Filipae Sotfala stori blong buk ya - Bislama Bible Revised 2012

Sotfala stori blong buk yaPol i raetem leta ya i go long jos long Filipae we oli fas man long Yurop we Pol i prij long olgeta, nao oli kam Kristin. Filipae i wan taon long provins ya Masedonia we i stap anda long gavman blong Rom bifo. Pol i raetem leta ya long wan taem we hem i stap long kalabus, mo long taem ya i gat sam Kristin man we oli stap agens long hem. Mo hem i harem nogud tu long ol giaman tijing we i stap insaed long jos long Filipae. Be leta ya i soemaot we Pol i trastem God, mo i glad we i glad, nao yumi save se hem i mekem olsem from we hem i bilif strong long Jisas Kraes*.Pol i raetem leta ya blong talem tangkiu long ol Kristin man long Filipae we oli bin givhan long hem long ol nid blong hem. Olgeta ya oli bin sanem sam mane i go long hem blong givhan long hem. Mo hem i raetem leta ya i go long olgeta, blong leftemap tingting blong olgeta blong oli stap bilif strong long Jisas Kraes.Hem i mekem olsem from we i nogud oli harem we hem i stap long kalabus, nao bambae oli harem nogud tumas from. Hem i talem long olgeta blong oli mas mekem tingting blong olgeta i stap daon, olsem tingting blong Jisas Kraes. I nogud oli stap flas, mo oli stap tingbaot olgeta nomo. Hem i talem long olgeta se niufala laef ya we oli gat long Jisas Kraes, hem i samting we God i givim nomo long olgeta long gladhat blong hem, mo oli kasem nomo long bilif blong olgeta. Oli no kasem from we oli obei long Loa* blong ol laen* blong Isrel*, nogat, oli kasem from we oli bilif long Jisas Kraes. Pol i wantem se ol Kristin man long Filipae oli mas kasem fasin blong Kraes. Hem i talem se olgeta we oli joen gud long Jisas Kraes oli gat tru pis mo oli stap glad oltaem, from we God nomo i givim pis ya long olgeta, mo i mekem olgeta oli glad.Wan bigfala samting we Pol i tokbaot long leta ya, hemia we ol Kristin man oli mas joen gud long Kraes, mo we oli mas glad, mo we tingting blong olgeta mo bilif blong olgeta i mas stap strong long hem oltaem. Leta ya i soem long yumi we Pol i lavem tumas ol Kristin man long jos long Filipae.Ol haf blong buk yaFastok 1.1-11

Ol samting we i stap hapen long Pol 1.12-26

Laef blong ol Kristin man i masfolem laef blong Kraes 1.27—2.18

Pol i mekem plan blong sanem Timotii go long ol man Filipae mo i sanemEpafrodaetas i gohom bakegen 2.19-30

Pol i wonem ol Kristin man long Filipaeblong oli mas lukaot gud long ol enemi blong olgeta 3.1—4.9

Pol mo ol fren blong hem long Filipae 4.10-20

Lastok 4.21-23