Rut 1 - Bislama Bible Revised 2012

Elimelek wetem ol pikinini blong hem oli go stap long Moab

1-2Bifo, long taem ya we ol laen* blong Isrel* oli stap long han blong ol haeman blong olgeta nomo, i gat wan man long laen blong Juda* we hom blong hem long taon ya Betlehem. Man ya, nem blong hem Elimelek, mo woman blong hem, nem blong hem Nomi, mo tufala pikinini boe blong hem, nem blong tufala Malon mo Kilion. Nao i gat hadtaem i kasem olgeta, we oli no gat kakae nating long kantri ya, mo from samting ya, man ya wetem woman blong hem mo tufala pikinini blong tufala oli aot long ples ya, oli go stap long kantri ya Moab. Olgeta ya oli man Betlehem we olfala nem blong hem Efrata, be oli aot, oli go mekem ples blong olgeta long Moab. Oli stap long ples ya gogo,

3Elimelek i ded, mo woman blong hem i stap hem wan, wetem tufala boe ya blong tufala.

4Nao tufala boe ya i tekem tu gel Moab we nem blong tufala, Opa mo Rut, mo olgeta oli stap long kantri ya, gogo kasem samwe long ten yia,

5nao Malon mo Kilion tufala tu i ded, Nomi nomo i stap.

Nomi i kambak long Betlehem mo Rut i biaen long hem

6Nao Nomi i harem nius we Hae God i stap givhan gud long ol man ples blong hem, i stap givim plante kakae long olgeta bakegen. Nao hem i mekemrere blong i aot long Moab blong kambak long Juda,* mo tufala wido blong tufala pikinini blong hem, tufala i mekemrere blong kam wetem hem.

7Ale, trifala i aot blong kam long Juda, nao taem trifala i stap long hafrod,

8hem i talem se, “Tufala. I moa gud yutufala i gobak long ples blong yutufala, yutufala i go stap wetem tufala mama blong yutufala. Prea blong mi we Hae God bambae i givhan long yutufala, olsem we bifo yutufala i stap givhan long mi, mo long tufala ya we i lus.

9Hem bambae i mekem rod, blong yutufala i mared bakegen, blong yutufala i save gat pikinini.”

Nao hem i kis* long tufala blong talem tata long tufala. Be tufala i krae bigwan,

10nao tufala i talem long hem se, “No, mitufala i mas kam wetem yu blong go stap wetem ol famle blong yu.”

11Be hem i talem se, “Tufala dota blong mi. ?Blong wanem yutufala i wantem kam wetem mi? I gud yutufala i gobak, from we mi mi no moa save bonem tu pikinini boe bakegen, blong yutufala i mared long tufala.

12Yutufala i gobak long ples blong yutufala. Mi mi olfala finis, mi no save mared bakegen. Sipos mi talem long yutufala se, ‘Yutufala i wet, bambae mi gat tu pikinini boe blong mi bakegen blong yutufala i mared long tufala,’

13be tok ya i no save blokem yutufala, blong yutufala i no go mared long sam narafala man. ?Sipos mi mared long naet ya nomo, nao mi bonem tu pikinini boe blong mi, yutufala i ting se yutufala i save wet gogo tufala ya i kam bigwan, blong yutufala i mared long tufala? Tufala. Samting ya i no save kamtru. Hae God i tanem baksaed long mi finis, nao mi harem we mi sore tumas long yutufala.”

14Nao tufala i stat krae bigwan bakegen, nao Opa i kis long hem blong talem tata long hem, mo i gobak. Be Rut i no save lego hem nating.

15Nao Nomi i talem long hem se, “Dota blong mi. Yu luk. Sista blong yu i gobak finis long ol man ples blong hem, mo long ol god blong hem. I gud yu tu, yu gobak wetem hem.”

16Be Rut i talem long hem se, “Plis yu no talem long mi blong mi lego yu. Mi wantem kam wetem yu. Plis yu no blokem mi. Ples we yu bambae yu go long hem, mi tu bambae mi go long hem. Ples we yu bambae yu stap long hem, mi tu bambae mi stap long hem. Ol man ples blong yu bambae oli man ples blong mi, mo God blong yu bambae i God blong mi.

17Ples we yu bambae yu ded long hem, mi bambae mi ded long hem, mo bambae oli berem mi tu long ples ya. Tru mi talem long yu, i no gat wan samting we bambae i save tekemaot mi long yu, ded nomo bambae i save tekemaot mi. Sipos mi brekem tok ya blong mi, i gud Hae God i givim panis long mi.”

18Nao taem hem i luk we tingting blong Rut i strong tumas blong kam wetem hem, hem i no moa save tok bakegen.

19Nao tufala i aot, mo taem tufala i kam kasem Betlehem, olgeta evriwan oli sek gud long tufala. Nao ol woman oli stap asaskem se, “?E, hu ya? ?Nomi ya, no hu?”

20Be hem i talem se, “Mi Nomi, be yufala i no moa singaot mi se ‘Nomi’ we i min se ‘Harem gud’. I moa gud yufala i singaot mi se ‘Mara’ we i min se ‘Harem nogud’. Hae God i gat olgeta paoa, mo hem i mekem mi mi harem nogud tumas.

21Taem mi mi aot long ples ya, mi gat plante samting, be naoia, hem i tekem mi mi kambak we mi no gat wan samting nating. I nogud yufala i stap singaot mi se ‘Nomi’, from we hem i tanem baksaed finis long mi, i mekem we bigfala trabol i kasem mi.”

22Long fasin ya nao, Nomi i aot long Moab, i kambak long ples blong hem, mo woman Moab ya Rut, we i wido blong pikinini blong hem i biaen long hem, nao tufala i kam stap long Betlehem. Tufala i kamtru long ples ya, stret long taem we ol man oli stat blong tekemaot bale* long ol garen* blong olgeta.