Aesea Sotfala stori blong buk ya - Bislama Bible Revised 2012
Sotfala stori blong buk yaProfet Aesea, hem i wan profet we i stap long Jerusalem* long taem ya we i gat moa long seven handred yia* i stap yet blong kam kasem yia we Kraes i bon long hem, mo buk ya OL TOK BLONG PROFET AESEA, hem i tekem nem blong hem. Sam man oli ting se profet ya i raetem buk ya, mo sam man oli ting se hem i raetem haf blong hem nomo, mo biaen, ol man we oli holem ol tijing blong hem, oli raetem ol narafala haf blong hem, mo oli putum nem blong hem long hem.Buk ya i gat tri bigfala haf blong hem.Long japta 1 go kasem japta 39, profet i tokbaot taem ya we ol man Asiria oli kam blong traem spolem ol man Juda.* Kantri ya Asiria i strong we i strong, be profet i luk se bigfala problem blong ol man Juda i no stap long samting ya nomo, i stap long ol sin blong olgeta, from we oli no obei long Hae God, mo oli no trastem hem. Profet i soemaot i klia long olgeta long ol toktok blong hem, mo long ol samting we hem i mekem, we ol man wetem ol lida blong olgeta oli mas tanem tingting blong olgeta, mo oli mas folem ol fasin we i stret, mo oli mas jajem man long stret fasin. Hem i talemaot long olgeta, se sipos oli no lesin long tok ya blong Hae God we hem i talemaot long olgeta, bambae Hae God i tekem bigfala trabol i kam long olgeta, we bambae i flatemgud olgeta. Mo profet i talemaot tu, se i gat gudfala taem i stap kam, we bambae ol man oli stap gud nomo long olgeta ples long wol, mo wan laen blong King Deved bambae i kam king blong olgeta, mo fasin blong hem bambae i stret olgeta.Long japta 40 go kasem japta 55, profet i tokbaot wan taem we plante man Juda oli stap wok slef* longwe long kantri ya Babilonia, mo ol man oli mekem i nogud tumas long olgeta, nao tingting blong olgeta i foldaon olgeta. Be hem i talemaot se Hae God bambae i mekem ol man blong hem oli fri bakegen, mo bambae i tekem olgeta oli kambak bakegen long Jerusalem we i hom blong olgeta, nao long ples ya, bambae oli statem niufala laef bakegen. Wan bigfala tingting we i kamaot long ol japta ya, hemia we Hae God i stamba blong olgeta samting we i hapen, mo hem i bos long ol samting ya. Ol laen* blong Isrel* ya oli man blong hem, mo hem i gat plan blong olgeta se bambae oli go talemaot hem long ol man blong olgeta kantri long wol, mo bambae hem i yusum olgeta blong blesem ol man ya. Ol haf we i tokbaot Man ya blong Wok blong Hae God, plante man oli savegud, bitim plante narafala haf blong Oltesteman.Long japta 56 go kasem japta 66, profet i tokbaot wan taem we ol man bambae oli kambak long Jerusalem bakegen, mo hem i tok blong leftemap tingting blong olgeta, mo blong soemaot long olgeta we ol promes* blong Hae God bambae oli stap kamtru. Profet i soemaot we Hae God i wantem tumas blong ol man blong hem oli mekem ol fasin we i stret, mo blong oli jajem ol man long stret fasin. Mo hem i wantem tumas blong oli folemgud ol loa blong Sabat* dei, mo blong oli stap mekem ol sakrefaes, mo blong oli stap prea oltaem. Taem Jisas* i statem wok blong hem, hem i yusum japta 61 vas 1 mo vas 2 blong soemaot we Hae God i singaot hem blong i mekem wok ya.Ol haf blong stori long buk yaOl promes mo ol tok blong wekemap olgeta 1.1—12.6Panis we bambae ol naranarafala kantri oli kasem 13.1—23.18Hae God bambae i jajem olgeta man long wol 24.1—27.13Ol promes mo ol narafala tok bakegen blong wekemap olgeta 28.1—35.10Stori blong King Hesekia blong Juda mo ol man Asiria 36.1—39.8Ol promes mo ol tok blong leftemap tingting blong ol man Juda 40.1—55.13Ol promes mo ol tok blong wekemap olgeta 56.1—66.24
