1 1 Kron 16.34; 2 Kron 5.13; 7.3; Esra 3.11; Sam 100.5; 106.1; 118.1; 136.1; Jer 33.11 Olgeta.
!Oltaem yumi mas talem
tangkiu long Hae God,
from we hem i gud tumas!
!Oltaem bambae hem i lavem yumi
gogo i no save finis!
2Yumi evriwan ya we hem i sevem yumi,
i gud yumi stap taltalem tok ya long yumi oltaem
blong leftemap nem blong hem.
Fastaem yumi stap long han blong ol enemi blong yumi,
be hem i tekemaot yumi i mekem yumi fri.
3Hem i tekemaot yumi long ol narafala kantri,
long is mo long wes mo long not mo long saot,
nao yumi kambak long kantri blong yumi bakegen.
4I gat sam long yumi
we fastaem oli stap wokbaot krangke long draeples
we oli no save faenem rod blong gotru long wan taon
we bambae oli save stap gud long hem.
5Olgeta ya oli hanggri mo oli tosta,
nao tingting blong olgeta i foldaon olgeta.
6Be taem oli stap long trabol ya,
oli singaot long Hae God,
nao hem i tekemaot olgeta
long trabol ya.
7Hem i lidim olgeta long wan stret rod,
i tekem olgeta oli go long wan taon
we oli save stap gud long hem.
8I gud olgeta oli talem tangkiu long Hae God
from fasin blong hem we oltaem hem i lavem olgeta tumas,
mo from ol bigbigfala samting
we hem i stap mekem
blong givhan long olgeta.
9Hem i stap givim wota
long olgeta we oli tosta,
blong oli dring, oli harem gud,
mo i stap givim gudfala kakae
long olgeta we oli hanggri,
blong oli kakae, oli fulap gud.
10-11God i hae we i hae,
be i gat sam long yumi
we fastaem oli girap
oli tanem baksaed long ol tok blong hem
oli agens long hem.
Nao from samting ya,
olgeta oli stap long tudak,
long laef we i nogud.
Olgeta oli stap long kalabus,
mo ol man oli fasem olgeta long jen,
nao oli stap harem nogud.
12Olgeta ya oli hadwok tumas
nao oli slak from.
Oli stap folfoldaon,
be i no gat man i givhan long olgeta.
13Be taem oli stap long trabol ya,
oli singaot long Hae God,
nao hem i tekemaot olgeta
long trabol ya.
14Hem i brebrekem ol jen blong olgeta,
mo i tekemaot olgeta long tudak,
long laef ya we i nogud.
15I gud olgeta oli talem tangkiu long Hae God
from fasin blong hem we oltaem hem i lavem olgeta tumas,
mo from ol bigbigfala samting
we hem i stap mekem
blong givhan long olgeta.
16Hem i stap brebrekem ol doa blong kalabus
we ol man oli wokem long bras,
mo i stap smasem ol aean
we oli putum blong lokem olgeta.
17Mo i gat sam long yumi
we fastaem oli no gat hed.
Olgeta ya oli stap mekem sin,
mo oli stap folem ol rabis fasin,
nao ol samting ya i stap mekem
we olgeta oli harem nogud tumas
long bodi blong olgeta.
18Olgeta oli luk kakae
be oli no wantem kakae nating,
oli sik tumas we klosap oli ded.
19Be taem oli stap long trabol ya
oli singaot long Hae God,
nao hem i tekemaot olgeta
long trabol ya.
20Hem i tok, nao oli kam gud bakegen.
Hem i sevem olgeta blong oli no ded.
21I gud olgeta oli talem tangkiu long Hae God
from fasin blong hem we oltaem hem i lavem olgeta tumas,
mo from ol bigbigfala samting
we hem i stap mekem
blong givhan long olgeta.
22Oli mas mekem ol sakrefaes
blong talem tangkiu long hem,
mo oli mas glad, oli mas singsing,
mo oli mas talemaot olgeta samting
we hem i mekem.
23Mo i gat sam long yumi
we fastaem oli stap go olbaot long solwota,
oli stap boskru long ol sip,
blong kasem mane blong oli laef long hem.
24Olgeta ya oli stap luk ol samting
we Hae God i mekem.
Oli savegud ol bigbigfala wok ya blong hem
we hem i stap mekem long solwota.
25Taem hem i tok,
strong win i stat blu,
nao i mekem si i girap,
26i stap leftemap ol sip oli go antap we antap olgeta,
mo i stap sakem olgeta
oli godaon we daon olgeta.
Samting ya i mekem
tingting blong ol man long sip i foldaon.
27Olgeta oli stap folfoldaon olbaot,
mo oli stap wokbaot krangke,
olsem man we i drong.
Waes blong olgeta long solwota
i no save givhan long olgeta.
28Be taem oli stap long trabol ya,
oli singaot long Hae God,
nao hem i tekemaot olgeta
long trabol ya.
29Hem i mekem strong win ya i godaon,
mo si i kam kwaet.
30Nao ol man ya oli glad tumas
from we ples i kwaet,
mo hem i tekem olgeta oli gotru gud nomo
long pasis we oli wantem go long hem.
31I gud olgeta oli talem tangkiu long Hae God
from fasin blong hem we oltaem hem i lavem olgeta tumas,
mo from ol bigbigfala samting
we hem i stap mekem
blong givhan long olgeta.
32I gud olgeta oli leftemap hae nem blong hem
long medel blong olgeta man,
mo oli presem hem long fes blong ol lida blong olgeta
insaed long kaonsel blong olgeta.
33Oltaem Hae God i stap mekem
ol wota oli drae olgeta,
mo i stap blokem ol springwota
blong oli no moa ron.
34Hem i stap mekem gudfala graon
i kam fulap long sol
we i no gat samting i save gru long hem,
from ol rabis fasin blong ol man
we oli stap long ples ya.
35Oltaem hem i stap mekem ol hol long draeples
i kam fulap long wota,
mo i stap mekem ol ples we i no gat wota
i kam fulap long ol springwota.
36Hem i stap letem olgeta we oli hanggri
oli stap long ol ples olsem,
mo oli mekem taon blong olgeta
blong oli stap long hem.
37Oli stap wokem ol garen blong olgeta
mo oli stap planem grep,*
nao oli stap kasem plante kakae mo waen
long ol garen ya.
38Oltaem hem i stap blesem olgeta
nao oli gat plante pikinini,
mo i stap lukaot gud long ol buluk blong olgeta
blong namba blong olgeta i no godaon.
39Ol man blong Hae God.
Samtaem ol man oli winim yumi long faet.
Olgeta oli smasem yumi,
nao oli mekem yumi stap daon,
yumi stap harem nogud
aninit long han blong olgeta.
40Be oltaem, taem oli mekem olsem,
hem i stap soemaot
we hem i no laekem nating olgeta ya
we oli stap spolem yumi,
hem i stap mekem
we olgeta oli stap wokbaot krangke long draeples
we i no gat rod long hem.
41Yumi pua tumas,
be hem i stap tekemaot yumi
long ol trabol blong yumi,
nao hem i stap mekem ol pikinini blong yumi
oli kam plante we plante.
42Taem ol stret man oli luk ol samting ya,
oli glad tumas,
be taem ol man nogud oli luk,
olgeta evriwan oli no save tok.
43I gud olgeta we oli waes
oli stap tingbaot ol samting ya,
i gud oli luksave fasin blong Hae God
we oltaem hem i lavem man tumas.
Who We AreWhat We EelieveWhat We Do
2025 by iamachristian.org,Inc All rights reserved.
