Amos 3 - Bislama Bible Revised 2012

1Nao profet i talem se, “!Ol laen blong Isrel! Yufala i lesin gud long tok we Hae God i talem. Bifo hem i tekemaot ol olfala bubu blong yumi long Ijip, mo tok ya blong hem i jajem yumi evriwan we i kamaot biaen long ol olfala ya. Hem i talem se,

2‘Long olgeta man long wol, be yufala ya nomo we mi mi jusumaot yufala blong yufala i man blong mi. Be oltaem yufala i stap mekem sin agens long mi, nao from samting ya, bambae mi mi panisim yufala.’ ”

Wok blong man we i profet

3Nao Profet Amos i talem se, “!Yufala i traem tingbaot! ?Sipos tu man i no mekem plan blong kam wanples fastaem, yufala i ting se tufala i save wokbaot wanples?

4“?Sipos laeon i no luk wan samting we i save kakae, yufala i ting se hem i save singaot bigwan?

“?Taem smol laeon i stap kakae, sipos brata blong hem i no kam klosap long hem, yufala i ting se hem i save mekenoes?

5“?Sipos man we i putum trap i no putum kakae long hem, yufala i ting se trap ya i save kasem faol?

“?Sipos wan samting i no go insaed long trap ya, yufala i ting se trap ya i save jam?

6“?Sipos ol lida oli blu long pupu blong singaot ol man blong faet, yufala i ting se ol man blong ples ya oli no save fraet?

“Taem trabol i kam kasem ol man long wan ples, be hemia Hae God nomo we i sanem i kam.

7“Hae God i Masta* blong yumi, mo ol profet oli man blong wok blong hem, mo oltaem, sipos hem i wantem mekem wan samting, hem i stap soemaot ol plan blong hem fastaem long olgeta.

8“?Sipos wan laeon i stap singaot bigwan, yufala i ting se ol man oli no save fraet long hem?

“Hae God i Masta blong yumi, mo sipos hem i tok, ol profet blong hem oli mas go talemaot ol tok blong hem.”

Hae God bambae i panisim ol man Sameria

9Nao Profet Amos i talem se, “Naoia, yufala i go talemaot tok blong mi long ol haeman we oli stap long haos blong king blong Filistia long Asdod, mo long ol haos blong king blong Ijip. Yufala i go talem long olgeta se, ‘I gud yufala evriwan i kam long Sameria,* yufala i kam stap long ol hil raonabaot long taon ya. Nao bambae yufala i save luk we ol samting long ples ya i olbaot tumas, mo we plante man oli stap mekem i strong tumas long ol narafala man.’ ”

10Mo hem i talemaot we Hae God i talem se, “Stret fasin i no stap nating long laef blong ol man Sameria. Oltaem oli stap stil, mo oli stap kilim man, nao ol haos blong olgeta i fulap gud long olting blong ol narafala man we oli stap kasem long fasin ya.

11Be ol enemi bambae oli kam hivap raon long ples blong olgeta blong mekem faet long olgeta, nao bambae oli brekemdaon ol strong ples blong haed blong olgeta, mo bambae oli go insaed long ol haos ya blong olgeta, oli tekemaot olting ya blong olgeta, oli karem i go.

12“Naoia, ol man Sameria oli stap slip gud long ol gudfala bed blong olgeta, be taem ol enemi ya oli aot long olgeta bakegen, bambae oli livim olgeta i stap, olsem sipsip we laeon i kakae, we taem man blong lukaot long sipsip i go faenem, i luk we tu leg blong hem nomo, no haf blong wan sora nomo blong hem i stap.

13“Mi mi Hae God, mi Masta* blong olgeta man, mo mi gat olgeta paoa. Mo mi mi talem long yufala, se yufala i mas lesin gud long tok ya blong mi. Mo yufala i mas tok strong long ol laen* ya blong Jekob,* blong wekemap olgeta.

14

15Ol haos ya blong olgeta we oli stap yusum long koltaem, wetem olgeta we oli stap yusum long hot taem, bambae mi spolem olgeta. Ol bigbigfala haos ya blong olgeta we oli flasem olgeta long tut blong elefen, be bambae mi spolem olgeta evriwan.”