Amos 4 - Bislama Bible Revised 2012

1Mo profet i talem se, “Ol rij woman blong Sameria. Yufala i mas lesin gud long tok blong mi. Oltaem yufala i stap spolem olgeta we oli no strong, mo yufala i stap mekem i strong tumas long ol puaman, mo oltaem, yufala i stap talem long ol man blong yufala blong oli stap givim waen long yufala. Nao from samting ya, yufala i kam fatfat gud olsem ol buluk blong ples ya Basan.

2Hae God i Masta blong yumi, mo hem i tabu, fasin blong hem i stret olgeta. Mo hem i promes finis se, ‘I gat dei blong yufala i stap kam we bambae ol enemi blong yufala oli kam hukum yufala long ol huk, oli pulum yufala i goaot long ples ya, yufala i go longwe. Bambae yufala evriwan i hang long ol huk ya olsem fis.

3Nao bambae oli pulum yufala i go long ol hol blong bigfala stonwol blong taon ya we oli stap klosap nomo, oli pulum yufala i gotru, yufala i go afsaed, long saed blong go long hil ya Hemon. Mi mi Hae God, mo hemia tok blong mi.’ ”

Ol man Isrel, hed blong olgeta i strong tumas

4Mo Profet Amos i talemaot we Hae God i talem se, “Ol man Isrel.* Oltaem yufala i laekem tumas blong kam long tabu ples ya Betel blong mekem wosip, be ol wosip blong yufala, sin nomo. Yufala i laekem moa blong kam long tabu ples ya Gilgal blong mekem wosip long ples ya, be blong dabolem ol sin blong yufala nomo. Evri moning, yufala i stap tekem ol anamol blong yufala i kam blong mekem sakrefaes, be long fasin we i nogud olgeta. Mo evri tri dei, yufala i stap tekem ol taet* blong yufala i kam blong givim long mi, be long fasin we i no stret nating.

5Taem yufala i givim bred i kam long mi blong talem tangkiu long mi, yufala i stap mekem sin nomo. Mo taem yufala i givim presen long mi we i ova long mak we Loa i putum, be yufala i girap, yufala i stap tok flas from. !Hemia nao fasin blong yufala stret! Mi mi Hae God, mi Masta* blong yufala, mo hemia tok blong mi.

6“Plante taem, long ol taon blong yufala, mi mi mekem we yufala i gat hadtaem blong kasem kakae, be yufala i no tanem tingting blong yufala nating, from ol rabis fasin ya blong yufala, blong kam long mi bakegen.

7Mo long taem ya we yufala i wantem tumas blong ren i kam wasem ol garen blong yufala, be mi stap blokem ren blong i no kam. Oltaem, mi stap mekem we long sam taon i gat ren, be long samfala taon i no gat, mo long sam ples, ren i stap wasem ol garen, be long samfala ples, ol garen oli kam drae olgeta.

8From ol samting ya, ol man blong samfala taon we oli hafded long tosta, oli stap traehad blong go long narafala taon blong lukaot wota, be taem oli faenem, wota ya i no naf blong mekem olgeta oli harem gud. !Be yufala i no tanem tingting blong yufala nating blong kambak long mi!

9“Bifo mi mekem win we i hot we i hot i kam bonem ol garen blong yufala, nao i mekem olgeta i drae. Taem yufala i putumgud ol kakae blong garen i stap, be mi mekem we olgeta oli kam nogud kwiktaem. Ol plantesen blong grep* wetem ol figtri,* mo ol tri ya olif* blong yufala, mi letem ol lokis* oli kam kakae olgeta. !Be yufala i no tanem tingting blong yufala nating blong kambak long mi bakegen!

10“Long taem ya, mi sanem wan rabis sik i kam long yufala we i sem mak long hemia we i kasem ol man Ijip bifo. Mo mi kilim olgeta yang man blong yufala evriwan i ded long taem blong faet, mo mi tekemaot ol hos blong yufala tu i gowe long yufala. Mi mekem we ples blong yufala i sting we i sting from ol dedman ya. !Be yufala i no tanem tingting blong yufala nating blong kambak long mi bakegen!

11 Jen 19.24 “Sam long yufala, mi kilim olgeta i ded, stret olsem we bifo, mi kilim ol man blong tufala taon ya Sodom mo Gomora oli ded. Mo yufala we i stap laef yet, yufala i olsem wud we i go long faea, mo i laet, be biaen, man i pulumaot bakegen. !Be yufala i no tanem tingting blong yufala nating blong kambak long mi bakegen! Mi mi Hae God, mo hemia tok blong mi.

12“!Ol man Isrel! From ol samting ya, bambae mi mi panisimgud yufala. Mo from we mi bambae mi mekem olsem, yufala evriwan i mas mekemrere blong kam stanap long fes blong mi.”

13Nao profet i talem se,

“God ya,

hem nao i mekem ol hil,

mo hem nomo i mekem win i blu.

Hem i letem long ol man

blong oli save tingting blong hem,

mo hem i gat paoa

blong mekem delaet i kam tudak.

Hem i hae we i hae,

mo hem i stap rul long olgeta ples long wol ya.

Nem blong hem,

‘Hae God we i Gat Olgeta Paoa’,

mo hem i God blong yumi.”