Sam 28 - Bislama Bible Revised 2012

Prea we man i mekem blong Hae God i givhan long hem(Sing ya, Deved i wokem.)(Tok i go long Hae God.)

1Hae God.

Mi mi krae i kam long yu

from we yu nomo yu strong sefples blong mi,

plis yu harem krae blong mi.

Sipos yu no mekem wan samting,

bambae mi lus wetem olgeta

we oli stap godaon long Hom* blong ol Dedman.

2Sipos mi luk long tabu haos* blong yu,

mi leftemap han blong mi,

mi prea,

plis yu lesin long mi.

Sipos mi kam, mi krae long yu

blong yu givhan long mi,

plis yu harem krae blong mi.

3Sipos yu jajem ol man nogud ya,

plis yu no kaontem mi wetem olgeta.

Olgeta ya oli stap talem ol gudfala

tok long ol narafala man,

be long tingting blong olgeta,

oli no laekem ol man ya nating,

oli agens long olgeta.

4 Rev 22.12 Plis yu panisim olgeta

from ol samting we oli bin mekem,

mo ol rabis fasin ya we oli bin folem.

Yu mekem olgeta

oli kakae frut blong ol samting ya bakegen.

5Hae God.

Olgeta ya oli no tingting nating

long ol wok blong yu,

mo long ol samting we yu yu mekem.

Taswe bambae yu yu panisim olgeta,

yu flatemgud olgeta

we oli no save girap bakegen samtaem.

(Tok i go long ol man.)

6Mi mi mas presem Hae God,

from we hem i harem mi finis

we mi stap krae long hem

blong i givhan long mi.

7Hem i paoa blong mi

mo hem i stap lukaot gud long mi.

Mi mi trastem hem.

Hem i stap givhan long mi,

mo i stap mekem mi mi glad.

Mi mi stap presem hem,

long ol singsing blong glad.

8Yumi ol man blong Hae God,

mo hem nomo i stap givim paoa long yumi,

mo hem i stap sevem yumi.

Hem i makemaot mi,

mo i putumap mi mi king.

Oltaem hem i stap blokemgud mi,

mo i stap sevem mi.

(Tok i go long Hae God.)

9Hae God.

Plis yu sevem ol man blong yu,

yu blesem olgeta.

Olgeta oli olsem sipsip blong yu.

Plis yu lukaot gud long olgeta oltaem,

gogo i no save finis.