Dutronome 10 - Bislama Bible Revised 2012

Seken taem we Hae God i givim Tenkomanmen long Moses long hil ya Sinae(Eksodas 34.1-10)

1Nao Moses i gohed bakegen, i talem se, “Nao long taem ya, Hae God i talem long mi se, ‘Moses. I gud yu tekem tu ston bakegen, yu katem tufala i flat, stret olsem tufala ya fastaem. Mo yu wokem wan bokis long wud blong putum tufala i stap long hem. Mo taem yu katem tufala finis, yu karem tufala i kam antap long hil ya,

2nao bambae mi mi raetem ol tok ya bakegen long tufala, we i stap long tufala ston ya we yu brekem finis. Nao biaen, bambae yu go putumgud tufala long bokis ya.’

3“Nao mi wokem wan bokis long wud ya kasis,* mo mi katem tu ston olsem tufala ya fastaem, mi karem tufala i go antap long hil ya.

4Nao Hae God i tekem tufala ston ya, i raetem Tenkomanmen ya bakegen long tufala, mo i givim tufala long mi. Mo ol tok blong hem i sem mak nomo long olgeta we hem i givim fastaem, long taem ya we yumi kam wanples antap long hil ya, nao hem i kamtru long faea, i toktok long yumi.

5Nao mi kamdaon bakegen, mo mi putum tufala ston ya long bokis ya we mi wokem, olsem we hem i talem. Mo tufala i stap yet long bokis ya kam kasem tede.”

6 Nam 20.28; 33.38 (Biaen long ol samting ya, ol laen* blong Isrel* oli aot long ples ya we i gat ol wel blong ol man Jahakan i stap long hem, nao oli go long ples ya Mosera. Mo taem oli stap long ples ya, Hae Pris* Eron i ded, mo oli berem hem. Nao pikinini blong hem Eleasara i tekem ples blong hem, i kam hae pris.

7Nao oli aot long ples ya bakegen, oli go stap long Gudgoda, mo biaen, oli go stap long Jotbata, ples ya we i gat plante wota long hem.

8Nam 3.5-8Mo long taem ya, Hae God i jusumaot ol laen blong Livae* blong oli stap lukaot long Bokis ya we i Saen blong Promes* blong hem, mo blong stanap long fes blong hem blong mekem ol wok blong hem, mo blong blesem ol man long nem blong hem. Long taem ya, ol Livaet* oli kam man blong givhan long pris, mo oli stap holem ol wok ya kam kasem tede.

9From samting ya, olgeta ya oli no kasem sam graon, olsem we ol narafala laen blong Isrel oli kasem. Hae God i God blong olgeta laen blong Isrel, be hem i talem long olgeta ya se, “Long yufala, mi bambae mi olsem graon blong yufala.”)

10 Eks 34.28 Nao Moses i talem se, “Long taem ya, mi mi stap long hil ya bakegen foti dei mo foti naet, olsem we mi mekem fastaem. Mo bakegen, Hae God i harem prea blong mi, nao from samting ya, hem i no kilim yumi.

11Nao hem i talem long mi se, ‘Yu girap, yu lidim ol man ya, blong yufala i wokbaot gogo yufala i go holem kantri ya, olsem we mi mi promes* finis long ol bubu blong yufala bifo, se bambae mi givim long yufala.’ ”

Ol samting we Hae God i wantem blong olgeta oli mas mekem

12Nao Moses i talem se, “Olgeta. Hae God i God blong yumi, mo ol samting we hem i wantem blong yumi mekem i olsem. Yumi mas tinghevi long hem, mo yumi mas ona long hem, mo yumi mas folem ol fasin blong hem, mo yumi mas lavem hem, mo yumi mas mekem ol samting we hem i talem long yumi, long olgeta tingting blong yumi, mo long olgeta laef blong yumi,

13mo yumi mas obei long olgeta loa blong hem. Mi mi stap talemaot ol tok ya long yufala tede blong i save givhan long yufala long samting ya.

14Heven ya we i antap we i antap wetem ol gudgudfala samting blong hem, mo wol ya wetem olgeta samting we i stap long hem oli blong Hae God nomo.

15Be from we hem i lavem trifala bubu ya blong yumi tumas, hem i livim ol man blong ol narafala laen,* nao i jusumaot yumi ya we yumi kamaot biaen long trifala ya, blong yumi man blong hem. Mo yumi man blong hem yet, kam kasem tede.

16Nao from samting ya, yufala i mas lego fasin ya we yufala i stap stronghed tumas, nao yufala i mas obei long hem nomo.

171 Tim 6.15; Rev 17.14; 19.16; Wok 10.34; Rom 2.11; Gal 2.6; Efes 6.9Hae God ya, hem i hae moa, i winim ol narafala god, mo hem i gat paoa moa, i winim ol narafala god no wanem we i gat paoa. Hem i hae we i hae, hem i gat paoa blong winim ol enemi blong hem, mo i stret blong ol narafala man oli fraet long hem. Taem we hem i jajem man, hem i no save wok wan saed, mo hem i no save mekem olsem man we i kasem mane long man nogud blong haedem ol rong blong hem.

18Hem i stap givhan gud long ol wido mo long ol pikinini we papa blong olgeta i ded, blong ol man oli no ravem olgeta, mo hem i stap soemaot we hem i lavem ol strenja we oli stap wetem yumi, mo hem i stap givim kakae mo klos long olgeta.

19Nao from samting ya, yumi tu, yumi mas soemaot we yumi lavem ol strenja ya, from we bifo, yumi tu i strenja long Ijip.

20Oltaem yumi mas tinghevi long hem, mo yumi mas onagud long hem, mo yumi mas mekem ol samting we hem i talem. Yumi mas mekem we tingting blong yumi i stap strong long hem nomo, mo ol promes we bambae yumi mekem, bambae yumi mas mekem long nem blong hem nomo.

21Oltaem yumi mas presem hem, from we hem nomo i God blong yumi, mo yumi luk long ae blong yumi nomo ol bigbigfala samting ya blong sapraes we hem i mekem blong sevem yumi.

22Jen 46.27; Jen 15.5; 22.17Bifo, taem ol bubu blong yumi oli go stap long Ijip fastaem, olgeta oli no plante, olgeta seventi nomo. Be naoia, Hae God i mekem we yumi kam plante we plante olsem ol sta long skae.”