Namba 6 - Bislama Bible Revised 2012

Ol rul blong ol Nasiraet

1Nao bakegen, Hae God i givim tok blong hem long Moses

2blong i go talemaot long ol laen* blong Isrel.* Hem i talem se, “Moses. Sipos wan man no wan woman i wantem mekem promes long mi se bambae hem i kam wan Nasiraet,* we i tabu, i spesel man blong mi,

3Luk 1.15bambae hem i no mas dring waen mo ol narafala dring we i save mekem man i drong. Hem i no mas dring ol dring we ol man oli stap wokem long grep,* mo i no mas kakae ol frut blong rop ya tu, nating we oli tekem we i jes raep no i sandrae.

4Sipos man i kam Nasiraet, bambae i tabu blong hem i kakae wan samting blong rop ya, nating we sid blong hem, no skin blong frut blong hem, be i tabu blong hem i kakae.

5“Mo sipos wan man i mekem promes long mi mo i kam Nasiraet, man ya i kam tabu, i man blong mi. Mo hem i mas holem promes ya blong hem gogo kasem en blong taem ya we hem i putum, mo hem i mas letem hea blong hem mo mustas blong hem i gru go kasem en blong taem ya.

6-7Hea blong hem bambae i soemaot we hem i tabu, i man blong mi. Mo sipos man i mekem promes olsem, bambae hem i no mas go klosap long dedbodi, from we dedbodi bambae i mekem hem i kam doti long fes blong mi. I nomata we dedman ya i papa blong hem no mama blong hem, no brata blong hem, no sista blong hem, be hem i no mas go klosap long hem.

8Olwe long taem ya we hem i Nasiraet, hem i tabu, i man blong mi.

9“Mo sipos wan man i ded wantaem nomo klosap long wan Nasiraet, samting ya i mekem hea blong Nasiraet ya i no moa klin long fes blong mi, i no moa tabu. Nasiraet ya i mas wet go kasem we seven dei i pas, nao hem i mas sevemaot hea blong hem wetem mustas blong hem, blong kam klin bakegen long fes blong mi.

10Nao long namba eit dei blong hem, hem i mas tekem tu sotleg* no tu nawimba i kam long pris long doa blong yad blong Haos Tapolen blong mi.

11Nao pris i mas tekem wan long tufala pijin ya, i mekem spesel sakrefaes ya blong tekemaot sin blong man ya, mo i mas tekem narawan, i mekem sakrefaes ya we i bonem i bon evriwan blong mekem wosip long mi. Pris i mas mekem ol samting ya blong mekem Nasiraet ya i klin bakegen long fes blong mi, from we hem i stap klosap long man ya taem i ded. Nao long sem dei ya nomo, man ya bambae i mas mekem promes, se taem hea blong hem i gru, bambae i tabu, i blong mi bakegen,

12mo hem i mas mekem narafala promes long mi bakegen, se bambae hem i tabu, i man blong mi blong hamas yia ya bakegen we hem i promes blong mekem fastaem. Bambae hem i no save kaontem ol yia ya blong hem blong fastaem, from we dedbodi ya i mekem hea blong hem i no moa klin long fes blong mi. Mo hem i mas tekem wan smol sipsip i kam we i gat wan yia blong hem, blong mekem sakrefaes long hem blong mekem hem i klin bakegen long fes blong mi.

13-15 Wok 21.23,24 “Mo sipos wan Nasiraet i finisim taem blong hem, ol samting we hem i mas mekem i olsem. Hem i mas tekem tri sipsip we i no gat wan samting i rong long bodi blong trifala, i tekem trifala i kam long doa blong yad blong Haos Tapolen blong mi blong givim i kam long mi, wetem ol kakae blong garen* mo waen we Loa i talem se i mas givim wetem trifala. Trifala sipsip ya, wan i mas smol man sipsip we i gat wan yia blong hem, we i blong mekem sakrefaes ya we i blong bonem i bon evriwan blong mekem wosip long mi, mo wan i mas smol woman sipsip we i gat wan yia blong hem, we i blong mekem spesel sakrefaes long hem blong tekemaot sin, mo wan i mas man sipsip bakegen we i blong mekem sakrefaes ya we i soemaot we man i stap fren gud wetem mi. Mo bakegen, hem i mas tekem wan basket kakae we oli wokem long flaoa we i no gat is long hem. Long basket ya, i mas gat ol bred* ya we i no gat is long hem, we oli wokem long flaoa ya we i beswan, we oli tantanem flaoa blong hem wetem olifoel,* mo ol bisket* we oli ravem olifoel long olgeta. Olgeta samting ya, hem i mas tekem olgeta i kam blong givim i kam long mi.

16“Nao pris i mas givim olgeta samting ya i kam long mi. Hem i mas mekem spesel sakrefaes ya blong tekemaot sin, mo sakrefaes ya we i blong bonem i bon evriwan,

17mo hem i mas mekem sakrefaes long narafala man sipsip ya we hem i bonem haf, man ya i kakae haf blong soemaot we hem i stap fren gud wetem mi. Mo taem hem i bonem sakrefaes ya, hem i mas givim basket kakae ya tu i go wetem, mo i mas tekem ol narafala kakae mo waen, i givim i kam long mi.

18Long taem ya, Nasiraet ya i mas kam stanap long doa blong yad blong Haos Tapolen blong mi, mo i mas sevemaot ol hea blong hed blong hem, mo i mas bonem long faea ya we pris i stap bonem haf blong man sipsip ya long hem.

19“Nao pris i mas kukum narafala haf blong man sipsip ya, mo taem i tan, hem i mas tekemaot solda blong hem, i tekem i kam long Nasiraet ya, i putum long han blong hem wetem wan bred we i no gat is long hem, mo wan bisket, we i tekemaot tufala long basket ya.

20Nao biaen, hem i mas tekemaot ol samting ya bakegen, i leftemap olgeta long fes blong mi blong givim olgeta i kam long mi. Olgeta samting ya i tabu, i spesel presen long pris blong hem i kakae. Presen ya i antap long jes mo leg blong man sipsip ya we Loa i talem se i blong pris. Nao biaen, Nasiraet ya i save dring waen bakegen.

21“Hemia nao ol rul blong Nasiraet. Be sipos wan Nasiraet i promes blong givim sam samting i kam long mi we i bitim mak we ol rul ya i talem, hem i mas mekem samting ya stret olsem we hem i promes blong mekem.”

Tok blong ol pris blong blesem ol man

22Nao bakegen, Hae God i givim tok blong hem long Moses

23blong i go talemaot long Hae Pris Eron wetem tufala pikinini ya blong hem. Mo Moses i go talemaot we Hae God i talem se, “Eron. Yu wetem tufala pikinini blong yu, mo olgeta we bambae oli stap kamaot biaen long yufala, sipos yufala i blesem ol laen* blong Isrel,* bambae yufala i mas talem se,

24‘Prea blong mi,

we Hae God bambae i blesem yu,

mo i stap lukaot gud long yu,

25hem bambae i kaen gud long yu,

mo i gat sore long yu,

26hem bambae i stap lukluk i kam long yu oltaem,

blong givhan long yu long gladhat blong hem,

mo hem bambae i givim pis long yu.’

27Mo sipos yufala i blesem ol man long nem blong mi, mi bambae mi blesem olgeta.”