1Nao Hae God i talem long Moses se, “Moses. Fasin we bambae yu mas folem blong putumap Eron wetem ol pikinini blong hem oli kam pris,* oli wok blong mi, bambae i olsem. Bambae yu tekem wan yang bul mo tu yang man sipsip blong mekem sakrefaes, we i no gat wan samting i rong long bodi blong trifala.
2Mo bambae yu tekem flaoa we oli wokem long wit* we i beswan, yu kukum sam bred* long hem we i no gat is* long hem. Sam long ol bred ya, taem yu wokem, bambae yu putum olifoel* long hem, mo sam, bambae yu no putum oel ya long hem, mo sam, bambae yu wokem i kam bisket* nao biaen yu kafsaedem oel ya i go long hem.
3Mo bambae yu fulumap olgeta long wan basket, nao taem yu kilim bul ya wetem tufala sipsip ya blong mekem sakrefaes long mi, bambae yu givim ol bred ya i kam long mi.
4“Nao bambae yu tekem Eron mo ol pikinini blong hem oli kam long doa blong Haos Tapolen ya blong mi, mo yu talem long olgeta blong oli swim, blong mekem oli klin long fes blong mi.
5Nao bambae yu tekem ol spesel klos ya blong Eron, yu putum long hem. Hemia sot, mo kot, mo efod,* mo paos, mo strap ya we yufala i wokem.
6Mo bambae yu putum spesel hat ya long hed blong hem, mo yu tekem tabu brasplet* ya we i gat tok long hem se, ‘Man ya, hem i tabu, i blong Hae God,’ yu fasem long fran blong hat ya.
7Nao bambae yu tekem tabu oel ya, yu kafsaedem i go long hed blong hem blong makemaot hem, se i tabu, i blong mi.
8“Nao biaen, bambae yu tekem ol spesel klos ya blong ol pikinini blong hem i kam, yu putum long olgeta. Hemia ol sot blong olgeta
9wetem ol strap blong olgeta, mo ol hat blong olgeta. Hemia nao fasin we bambae yu folem blong putumap Eron, wetem ol pikinini blong hem blong oli kam pris. Olgeta ya wetem ol pikinini blong olgeta mo olgeta we bambae oli kamaot biaen long olgeta bambae oli pris blong mi, mo bambae oli stap wok blong mi oltaem. Hemia i wan loa blong mi, we bambae i stap oltaem, gogo i no save finis.
10“Nao bambae yufala i tekem bul ya i kam long fran blong Haos Tapolen ya blong mi, mo yu talem long Eron wetem ol pikinini blong hem blong oli putum han blong olgeta long hed blong hem.
11Nao bambae yu kilim i ded long fes blong mi, stret long doa blong Haos Tapolen ya.
12Mo bambae yu tekem smol blad blong hem, yu pusum fingga blong yu i go long hem, nao yu ravem i go long ol fo hon* blong Olta ya. Mo yu tekem haf blad ya we i stap, yu kafsaedem i go long stamba blong Olta ya.
13Mo bambae yu tekemaot olgeta gris we i kavremap ol gat blong bul ya, mo yu tekemaot nambawan haf blong leva blong hem, mo tufala kidni blong hem wetem gris blong tufala, nao yu bonem olgeta long Olta ya.
14Be ol mit blong hem wetem skin blong hem mo gat blong hem, bambae yu go bonem olgeta longwe, afsaed long ples blong yufala. Bul ya, bambae yu bonem blong mekem sakrefaes blong tekemaot sin blong ol pris ya.
15“Nao bambae yu tekem wan long tufala man sipsip ya i kam, mo yu talem long Eron wetem ol pikinini blong hem blong oli putum han blong olgeta long hed blong hem.
16Nao bambae yu kilim sipsip ya, mo yu tekem blad blong hem, yu saksakem i go long ol fo saed blong Olta ya.
17Nao bambae yu katkatem sipsip ya, mo yu wasemgud ol gat blong hem wetem tufala leg blong hem, yu putum olgeta antap long hed blong hem wetem ol narafala haf blong hem.
18
20Nao bambae yu kilim sipsip ya, mo yu tekem smol blad blong hem, yu putum long raet sora blong Eron long ples we i sofsof, mo long raet sora blong ol pikinini blong hem olsem, mo long bigfala fingga blong raet han blong olgeta mo long bigfala fingga blong raet leg blong olgeta. Nao bambae yu tekem haf blad blong sipsip ya we i stap, yu saksakem i go long ol fo saed blong Olta ya.
21Nao bambae yu tekemaot sam blad ya bakegen we i stap long Olta, yu miksim wetem smol tabu oel, nao yu saksakem smosmol i go long Eron, mo long ol spesel klos ya blong hem, mo long ol pikinini blong hem, mo long ol spesel klos blong olgeta. Nao long fasin ya, Eron mo ol pikinini blong hem, wetem ol spesel klos ya blong olgeta bambae oli tabu, oli blong mi.
22“Bambae yu katemaot ol gris blong sipsip ya, wetem tel blong hem we i gat fulap gris long hem, mo ol gris ya we i kavremap ol gat blong hem. Mo bambae yu tekemaot nambawan haf blong leva blong hem, mo tufala kidni blong hem wetem gris blong tufala, mo raet leg blong hem.
23Mo bambae yu tekemaot tri bred long basket ya we yu givim finis long mi. Bambae yu tekemaot wan bred we yu putum olifoel i go long hem taem yu kukum, mo wan we yu no putum oel ya long hem, mo wan we yu wokem i kam bisket.
24Bambae yu tekem trifala bred ya wetem ol mit ya, yu putum long han blong Eron mo long han blong ol pikinini blong hem, mo yu talem long olgeta blong oli leftemap long fes blong mi blong soemaot we ol samting ya i tabu, i wan spesel presen blong mi.
25Nao bambae yu tekemaot ol samting ya long olgeta bakegen, yu bonem olgeta long Olta ya, antap long fas sipsip ya we yu bonem finis i bon evriwan. Ol samting ya i presen we yu bonem blong givim i kam long mi, mo smel blong hem bambae mi mi glad tumas long hem.
26“Nao bambae yu tekem jes blong sipsip ya, yu leftemap long fes blong mi blong soemaot we samting ya i tabu, i wan spesel presen blong mi. Nao jes ya bambae i blong yu, blong yu kakae.
27“Oltaem, taem yu putumap man i kam pris, man sipsip we bambae yu yusum blong putumap hem, jes blong hem wetem raet leg blong hem bambae yu mekem i tabu, i wan spesel presen blong mi. Nao tufala haf ya blong sipsip oli blong ol pris blong oli kakae.
28Mo taem yu mekem sakrefaes ya we bambae yu bonem haf, yufala i kakae haf, blong soemaot we yufala i stap fren gud wetem mi, jes blong anamol ya wetem raet leg blong hem bambae tufala i blong ol pris blong oli kakae. Tufala haf blong anamol ya bambae i wan spesel presen blong mi we bambae yufala i stap givim long mi. Yufala i man blong mi, mo hemia i wan rul blong mi we bambae yufala i mas folem oltaem.
29“Nao sipos Eron i ded, ol spesel klos ya blong hem we hem i stap werem from we i hae pris bambae oli blong ol pikinini blong hem wetem olgeta we bambae oli kamaot biaen long hem, blong oltaem man we yu putumap hem i kam hae pris bambae i stap werem.
30Nao taem yu putumap wan long olgeta i tekem ples blong olfala blong olgeta, i kam hae pris, be taem hem i kam insaed fastaem long Haos Tapolen blong mi blong mekem wok blong mi long Rum ya we i Tabu, bambae hem i stap werem ol spesel klos ya seven dei.
31“Be bakegen, long bisnes ya blong putumap Eron mo ol pikinini blong hem oli kam pris, bambae yu tekem haf mit blong sipsip ya we i stap yet, yu go kukum insaed long yad ya, from we ples ya i tabu, i blong mi.
32Nao long doa blong Haos Tapolen ya blong mi, Eron wetem ol pikinini blong hem bambae oli kakae mit ya wetem haf bred ya we i stap yet long basket.
33Taem yu putumap olgeta ya, yu mekem olgeta oli tabu, oli pris blong mi, bambae yu mas mekem sakrefaes blong mekem rod blong mi mi tekemaot sin blong olgeta, mo haf kakae blong sakrefaes ya we bambae i stap yet, ol pris ya bambae oli kakae. Ol narafala man oli no save kakae ol kakae ya, from we i tabu, i blong mi.
34Mo sipos olgeta oli no finisim ol kakae ya, nao haf i stap go kasem nekis moning, bambae yu mas bonem, from we ol kakae ya i tabu i blong mi, bambae narafala man i no save kakae.
35“Hemia nao ol fasin we bambae yu mas folem taem yu putumap Eron wetem ol pikinini blong hem oli kam pris. Bambae yu mas mekem ol samting ya go kasem seven dei, stret olsem we mi talem long yu.
36Evri dei, bambae yu mas kilim wan bul, mo yu mas bonem blong mekem sakrefaes blong tekemaot sin blong yufala. Long fasin ya, bambae yu mekem Olta ya i kam klin long fes blong mi. Mo taem sakrefaes i bon finis, bambae yu mas kafsaedem tabu oel ya i go long Olta ya blong mekem i tabu, i blong mi.
37Bambae yu mas mekem olsem evri dei go kasem seven dei, nao long fasin ya, Olta ya bambae i kam tabu we i tabu, i blong mi olgeta. Nao sipos wan man no wan samting i tajem Olta ya, paoa blong Olta ya bambae i spolem hem.”
Tufala sakrefaes we ol laen blong Isrel bambae oli mas mekem evri dei(Namba 28.1-8)38Mo Hae God i talem long Moses se, “Evri dei, bambae yufala i mas kilim tu smol sipsip, we tufala i gat wan yia blong tufala, yufala i mas bonem tufala long Olta ya blong mekem sakrefaes long mi. Fasin ya bambae yufala i mas mekem oltaem, gogo i no save finis.
39Wan, bambae yufala i kilim blong mekem sakrefaes long hem long moning, mo narawan long sapa.
40-41Long moning, taem yufala i bonem fas sipsip ya, bambae yufala i tekem wan kilo flaoa we oli wokem long wit* we i beswan, mo wan lita olifoel* we i klin gud, yufala i miksim tufala, yufala i bonem wetem. Mo bambae yufala i kafsaedem wan lita waen tu i go wetem sakrefaes ya, we i presen blong yufala long mi. Mo long sapa, taem yufala i bonem seken sipsip ya, bambae yufala i mekem sem fasin ya bakegen. Ol samting ya i presen we yufala i bonem we i bon evriwan blong givim i kam long mi, mo smel blong hem bambae mi mi harem gud long hem.
42Oltaem, yufala wetem ol pikinini we bambae oli kamaot biaen long yufala, bambae yufala i mas mekem tufala sakrefaes ya long doa blong Haos Tapolen blong mi, mo stret long ples ya nao, bambae mi mi stap mit wetem yufala, mo bambae mi stap toktok wetem yu.
43Yufala i laen* blong Isrel,* yufala i man blong mi, mo long ples ya nao, bambae mi mi stap kam mit wetem yufala, nao bigfala laet ya we i soemaot we mi mi stap bambae i saen long ples ya, i mekem ples ya i tabu, i ples blong mi.
44Haos Tapolen ya wetem Olta ya, bambae mi mekem tufala i tabu, i blong mi, mo Eron wetem ol pikinini blong hem, bambae mi mekem olgeta oli tabu, oli pris* blong mi.
45-46Mi mi Hae God, mi God blong yufala. Oltaem bambae mi mi stap wetem yufala, mo oltaem bambae mi mi God blong yufala. Nao bambae yufala i save we mi ya nao mi tekemaot yufala long Ijip, blong bambae mi save stap oltaem wetem yufala.”
Who We AreWhat We EelieveWhat We Do
2025 by iamachristian.org,Inc All rights reserved.
