1Nao Hae God i talem long Moses se,
2-3“Moses. Yu go tekem Eron wetem ol pikinini ya blong hem, yufala i kam long doa blong yad blong Haos Tapolen ya we bambae yufala i stap kam long hem blong mit wetem mi. Mo yu mas tekem ol spesel klos ya blong pris wetem tabu oel ya we i blong makemaot man we mi mi jusumaot, mo yu mas tekem wan smol bul blong bonem blong mekem sakrefaes blong tekemaot sin blong olgeta, mo tu man sipsip mo wan basket kakae we oli wokem long flaoa we i no gat is long hem. Mo yu mas singaot olgeta man i kam wanples long ples ya.”
4Nao Moses i mekem olsem we Hae God i talem long hem. Mo taem olgeta man ya oli stap wanples finis,
5hem i talem long olgeta se, “Olgeta samting we bambae mi mekem naoia, Hae God nomo i talem long mi blong mi mekem olsem.”
6Nao hem i tekem Eron wetem ol pikinini ya blong hem oli kam long fran, long fes blong olgeta man ya, nao i talem long olgeta blong oli swim long yad blong Haos Tapolen ya blong kam klin long fes blong Hae God.
7Nao hem i tekem spesel sot blong hae pris, i putum long Eron, mo i fasem sot ya long spesel strap ya we oli wokem blong hem, mo i tekem spesel kot blong hem tu, i putum long hem. Mo hem i putum spesel klos ya efod* long hem, mo i fasem klos ya long gudfala strap blong hem we oli wokem i haf blong klos ya nomo.
8Mo hem i tekem spesel paos ya we i blong hangem long jes blong hae pris, i fasemgud long fran blong efod ya, mo i tekem Yurim* mo Tumim,* i putum insaed long paos ya.
9Mo hem i tekem spesel hat blong hae pris, i putum long hed blong hem, mo long fran blong hat ya, hem i hangem smol brasplet* ya we oli wokem long gol, we i gat tok long hem se, “Man ya i tabu, i blong Hae God.” Olgeta samting ya, hem i mekem stret olsem we Hae God i talem long hem.
10Nao Moses i tekem tabu oel ya, i go sakem smosmol i go long Haos Tapolen we oli kam long hem blong mit wetem Hae God, mo long olgeta samting we i stap insaed long hem, mo long fasin ya, hem i makemaot olgeta samting ya se oli tabu, oli blong Hae God.
11Mo hem i go sakem oel ya smosmol seven taem long Olta blong Bonem Sakrefaes, wetem ol tul blong hem, mo long Bras Besin wetem ples blong hem, blong makemaot olgeta tu se oli tabu, oli blong Hae God.
12Nao biaen, hem i kafsaedem oel ya i go long hed blong Eron blong putumap hem i kam hae pris.
13Nao hem i tekem ol pikinini blong Eron oli kam stanap long fes blong ol man, mo i tekem ol spesel sot blong pris, i putum long olgeta, mo i fasem ol sot ya long ol spesel strap blong pris we oli wokem blong olgeta. Mo hem i fasem ol spesel hat blong pris long hed blong olgeta, stret olsem we Hae God i talem long hem.
14Nao hem i tekem smol bul ya we i blong mekem sakrefaes blong tekemaot sin blong Eron wetem ol pikinini ya blong hem, mo olgeta oli kam putum han blong olgeta long hed blong bul ya.
15Nao hem i kilim bul ya, i tekem sam blad blong hem, i pusum fingga blong hem long blad ya, mo i putum long ol fo hon* blong Olta ya. Mo haf blad we i stap, hem i kafsaedem i go long stamba blong Olta ya. Long fasin ya, hem i mekem Olta ya i kam klin, i tabu, i blong Hae God.
16Nao hem i tekem olgeta gris blong gat blong buluk ya, mo gudfala haf blong leva blong hem, mo tufala kidni blong hem wetem ol gris blong tufala, i bonem evriwan long Olta ya.
17Be hem i tekem ol haf blong buluk ya, wetem skin mo gat blong hem, i karemaot long ples ya, i go bitim ples we ol haos tapolen blong olgeta i stap long hem, i go bonem olgeta afsaed, olsem we Hae God i talem long hem.
18Nao hem i tekem wan man sipsip blong mekem sakrefaes blong Eron wetem ol pikinini blong hem, we sakrefaes ya i blong bonem i bon evriwan, mo olgeta ya oli kam putum han blong olgeta long hed blong sipsip ya.
19Nao Moses i kilim sipsip ya, i tekem blad blong hem, i kafsaedem i go long ol fo saed blong Olta ya blong givim i go long Hae God.
20-21Hem i katkatemaot ol haf blong sipsip ya, mo i tekem wota, i wasem gat blong sipsip ya, wetem olgeta samting we i stap long hem, mo tufala leg blong hem, nao i bonem olgeta evriwan long Olta, wetem hed blong hem mo ol gris blong hem, olsem we Hae God i talem long hem. Sakrefaes ya we i bonem i bon evriwan, hem i wan presen we i blong bonem long Olta blong givim i go long Hae God, mo gudfala smel blong hem i mekem Hae God i glad tumas long hem.
22Nao Moses i tekem wan man sipsip bakegen blong mekem sakrefaes long hem blong putumap Eron i kam hae pris mo blong putumap ol pikinini ya blong hem oli kam pris, mo olgeta ya oli putum han blong olgeta long hed blong sipsip ya.
23Nao hem i kilim sipsip ya, mo i tekem smol blad blong hem, i putum long raet sora blong Eron, long ples we i sofsof, mo long bigfala fingga blong raet han blong hem, mo long bigfala fingga blong raet leg blong hem.
24Mo hem i tekem ol pikinini ya blong hem i kam stanap long fes blong ol man, i putum smol blad long raet sora blong olgeta, long ples we i sofsof, mo long bigfala fingga blong raet han blong olgeta, mo long bigfala fingga blong raet leg blong olgeta. Nao hem i tekem haf blad we i stap, i kafsaedem i go long ol fo saed blong Olta blong givim i go long Hae God.
25Nao hem i tekem ol gris blong sipsip ya wetem tel blong hem we i gat gris long hem, mo olgeta gris we i stap long ol mit we i katemaot long gat blong hem, mo gudfala haf blong leva blong hem, mo tufala kidni blong hem wetem ol gris blong tufala, mo raet leg blong hem, i putumgud olgeta.
26Basket kakae ya we oli wokem long flaoa we i no gat is long hem, hem i prea long hem finis blong mekem i tabu, i blong Hae God, nao i tekem basket ya, i tekemaot wan bred* we i no gat is long hem, mo flaoa ya we taem oli wokem, oli tekem flaoa we i beswan, oli tantanemgud wetem olifoel* mo oli fraenem, mo wan bisket* we oli ravem olifoel long hem, mo i putum trifala antap long ol gris ya, wetem raet leg blong sipsip ya.
27Nao hem i putum olgeta samting ya long han blong Eron wetem ol pikinini ya blong hem blong oli leftemap long fes blong Hae God, blong makemaot olgeta se i wan spesel presen blong hem.
28Nao hem i tekem ol samting ya bakegen, i go putum olgeta antap long sakrefaes ya we i blong bonem i bon evriwan we i stap bon long Olta. Ol samting ya i wan presen we i blong bonem blong givim i go long Hae God, mo gudfala smel blong hem i mekem Hae God i glad tumas long hem. Hemia nao i sakrefaes blong putumap olgeta oli kam pris.
29Nao hem i tekem jes blong sipsip ya we i mekem sakrefaes ya long hem, i leftemap long fes blong Hae God blong makemaot se i wan spesel presen blong hem, nao jes ya i haf blong sakrefaes ya we i blong Moses blong i kakae. Long olgeta samting ya, hem i mekem stret olsem we Hae God i talem long hem.
30Nao hem i tekem smol tabu oel, i miksim wetem smol blad we i tekem long Olta, mo i sakem smosmol i go long Eron, mo long ol spesel klos ya blong hem, mo long ol pikinini blong hem, mo long ol spesel klos blong olgeta. Long fasin ya, hem i mekem olgeta ya wetem ol spesel klos ya blong olgeta oli tabu, oli blong Hae God.
31Nao hem i talem long Eron wetem ol pikinini ya blong hem se, “Hae God i talem se yufala i tekem mit ya, yufala i mas kukum long ples ya nomo, long doa blong yad blong Haos Tapolen blong hem, mo yufala i mas kakae wetem kakae ya we i stap long basket wetem ol narafala presen ya we i blong putumap yufala. Yufala i go mekem stret olsem we hem i talem.
32Mo sipos haf blong mit ya no haf blong kakae ya i stap kasem tumora, bambae yufala i mas bonem.
33Bambae yufala i mas stap long ples ya go kasem seven dei, gogo kasem we yufala i finisimgud olgeta fasin ya blong putumap yufala.
34Ol samting ya we yumi mekem tede, Hae God nomo i talem long mi blong yumi mekem olsem, blong tekemaot ol sin blong yufala.
35Oltaem, long dei mo long naet, bambae yufala i mas stap long doa blong yad blong Haos Tapolen ya, go kasem seven dei, mo oltaem yufala i mas mekem ol samting we Hae God i talem. Sipos yufala i no mekem olsem, bambae yufala i ded from. Hemia nao ol samting we Hae God i talem long mi.”
36Nao Eron wetem ol pikinini ya blong hem oli mekem evri samting stret olsem we Hae God i bin talem long Moses blong oli mekem.
Who We AreWhat We EelieveWhat We Do
2025 by iamachristian.org,Inc All rights reserved.
