Aesea 8 - Bislama Bible Revised 2012

Wan pikinini blong Profet Aesea bambae i wan saen long ol man Juda

1Nao Profet Aesea i talemaot we Hae God i talem long hem se, “Aesea. Yu go tekem wan bigfala pepa, yu raetemdaon nem ya long hem, se Mahe-salal-has-bas, we i min se ‘Tekem kwiktaem long faet, lusum bakegen kwiktaem long faet.’

2Nao yu mas tekem tu gudfala man i kam, blong tufala i witnes long nem ya. I gud yu tekem Hae Pris ya Uria wetem Sekaraea we papa blong hem Jeberekia.”

3Nao profet i talem se, “Nao i no longtaem, woman blong mi i gat bel, mo i bonem wan boe blong mitufala bakegen. Nao Hae God i talem long mi se, ‘Yu mas putum nem ya long hem, se Mahe-salal-has-bas.

4Taem we pikinini ya i no save toktok yet blong talem se, “Mama” no “Papa”, be king blong Asiria bambae i kam mekem faet long ol man Damaskes, i tekemaot olgeta gudgudfala samting blong taon ya. Mo bambae hem i kam mekem faet tu long ol man Sameria,* i tekemaot olgeta samting ya bakegen we ol man blong ples ya oli bin tekem long taem blong faet.’ ”

King blong Asiria bambae i kam blong mekem faet long ol man Juda

5Nao bakegen, Profet Aesea i talemaot we Hae God i talem long hem se,

6“!Aesea! !Yu luk! Ol man ya oli no wantem dring wota ya blong Siloa we i stap ron gud nomo. Oli no wantem gudfala fasin blong mi, from we oli stap fraet tumas long King Resin blong Damaskes mo long King Peka blong Sameria.*

7-8“From samting ya, bambae mi tekem King blong Asiria wetem ol soldia blong hem oli aot long ples blong olgeta, oli kam mekem faet long ples ya. Bambae oli kam plante, mo bambae oli kilim plante man oli ded. Bambae oli kam olsem Yufretes Reva we i ron bigwan tumas, i bitim ples blong hem, nao i kam kasem ples ya we klosap i kavremap evri ples blong hem.”

Nao profet i talem se, “!God i stap wetem yumi! Han blong hem bambae i blokem yumi, i holem kantri blong yumi i stap gud.”

Profet Aesea i tok long ol narafala kantri raonabaot

9Nao Profet Aesea i talem se, “!Ol man blong ol narafala kantri! Yufala i stap olbaot long narasaed wol, yufala i mas lesin. Yufala i save kam wanples, be i gud yufala i fraet. Yufala i save mekemrere blong mekem faet, be bambae Hae God i smasem yufala. Yes, yufala i save mekemrere blong mekem faet, be bambae hem i smasem yufala.

10Yufala i save mekem ol plan blong yufala, be bambae oli no save gotru, mo yufala i save talemaot tok blong yufala, be bambae i no save stanap, from we hem i stap wetem mifala.”

Hae God i tok long Profet Aesea blong wekemap hem

11Nao Profet Aesea i talem se, “Hae God i holem mi, i tok long mi blong wekemap mi, blong mi no folem fasin blong ol narafala man Juda.* Hem i talem se,

121 Pita 3.14,15‘Aesea. Sipos ol man ya oli luk wan samting, nao oli talem se, “!Hemia wan plan blong ol enemi blong yumi ya!”, be i nogud yu wetem ol man blong yu, yufala tu i talem se, “!Yes, i tru! !Wan plan ya!” Sipos olgeta ya oli fraet long ol samting olsem, be i nogud yufala tu i fraet long olgeta. Ol samting olsem oli no samting blong mekem man i seksek.

13Mi mi Hae God, mi gat olgeta paoa, mo mi mi tabu. I stret blong yufala i ona long mi nomo, yufala i fraet long mi, we yufala i seksek from.

14 1 Pita 2.8 “ ‘Mi mi tabu ples blong haed blong yufala, we yufala i save kam haed long mi. Be long ol man Jerusalem,* mo long king blong Juda wetem ol man blong hem, mo long king blong Isrel* wetem ol man blong hem, mi mi olsem wan ston we bambae oli bangem leg blong olgeta long hem. Mi mi olsem wan bigfala ston we bambae oli foldaon long hem, oli smas, mo mi olsem wan trap, no wan net we bambae i kasem olgeta.

15Mo plante long olgeta bambae oli bangem leg blong olgeta long ston ya, no bambae oli foldaon long bigfala ston ya, oli smas, no bambae oli foldaon long trap ya, no bambae oli fas long net ya, we oli no save aot bakegen.’ ”

Profet Aesea i stap tijim ol man blong hem

16Nao profet i talem long ol man blong hem se, “Olgeta. Ol tok ya we Hae God i stap tijim mi long hem, yufala i mas raetem long wan buk, mo yufala i mas putumgud i stap.

17Hib 2.13Yumi ol laen* blong Jekob* ya bifo, mo yumi ol man blong Hae God, mo hem i stap haedem fes blong hem, blong yumi no save luk hem. Be mi mi bilif long hem, mo tingting blong mi i stap strong long hem.

18 Hib 2.13 “!Yufala i luk! Hae God ya i gat olgeta paoa, mo hem i king blong yumi. Hem i stap long hil ya Saeon,* i stap rul long yumi. Mi wetem tufala boe ya blong mi we hem i givim long mi, mitrifala i stap. Mo hem i sanem mitrifala i kam long yufala, we mitrifala i olsem tok blong hem we i laef, mitrifala i olsem saen blong hem long fes blong yufala.

19“Bambae ol man ya oli save talem long yufala, blong yufala i go traem harem tok blong ol kleva, mo tok blong olgeta ya we oli gat nakaemas. Be tok blong ol man olsem i olsem tok blong smol pijin nomo. Ol tok blong olgeta i olbaot, i no klia nating. Bambae ol man raonabaot oli save talem long yufala se, ‘!Gudfala fasin ya! !Man i save go lukaot tok blong ol smosmol devel! !Man we i laef i save kasem waes long ol devel blong ol dedman! !Hemia i gud nomo!’

20Be yufala, yufala i mas tok strong long olgeta se, ‘Yufala i mas lesin long ol tok ya nomo we Hae God i stap tijim yufala long hem. Bambae yufala i no go lesin long olgeta ya we oli gat nakaemas. Tok blong ol man olsem i olsem naet nomo, we i tudak olgeta, i no gat delaet nating.’ ”

Bigfala trabol bambae i kam long ol man Juda

21Nao Profet Aesea i talem se, “Olgeta. Bambae ol man oli stap wokbaot long kantri ya, we tingting blong olgeta i foldaon finis, mo oli hanggri tumas. Mo from we oli hanggri tumas, mo oli kros tumas, bambae oli stap tok nogud long king, oli stap singaot* trabol i kam long hem, mo bambae oli stap tok nogud long God tu. Maet oli stap lukluk i go antap long skae,

22no oli stap lukluk i godaon long graon, be bambae oli luk we evri ples i tudak we i tudak olgeta, mo we ol man oli stap kasem trabol we i nogud tumas. Bambae oli luk tudak ya i stap we i blak olgeta, mo ol enemi blong olgeta bambae oli ronemaot olgeta oli go long tudak ya. Mo taem trabol ya i kam, bambae i no gat rod blong man i ronwe long hem.”